ମଣିପୁରରେ ସେନାର ସ୍ବତନ୍ତ୍ର କ୍ଷମତା ପ୍ରତ୍ୟାହାର ପାଇଁ ଦାବି କରିବି : ନିର୍ବାଚନ ଜିତିବା ପରେ କହିଲେ ମୁଖ୍ୟମନ୍ତ୍ରୀ ବୀରେନ ସିଂ
ଇମ୍ଫାଲ : ମଣିପୁରରେ ପୁଣି ଥରେ ଭାରତୀୟ ଜନତା ପାର୍ଟି (ବିଜେପି) ସରକାର ଗଢିବା ଆଡ଼କୁ ଅଗ୍ରସର ହେଉଛି । ମୁଖ୍ୟମନ୍ତ୍ରୀ ତଥା ବିଜେପି ନେତା ଏନ.ବୀରେନ ସିଂ ହେନଗାଙ୍ଗ୍ ଆସନରୁ ବିଜୟୀ ହୋଇଛନ୍ତି । ସେ ନିଜର ନିକଟତମ ପ୍ରତିଦ୍ବନ୍ଦୀ ତଥା କଂଗ୍ରେସ ପ୍ରାର୍ଥୀ ପି.ଶରଚ୍ଚନ୍ଦ୍ର ସିଂଙ୍କୁ ୧୮,୨୭୧ ଭୋଟ ବ୍ୟବଧାନରେ ପରାସ୍ତ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ବିଜୟ ପରେ ବୀରେନ ସିଂ କହିଛନ୍ତି ଯେ ସେ ସଂପୂର୍ଣ୍ଣ ନିର୍ବାଚନ ଫଳାଫଳ ଘୋଷଣା ହେବା ପର୍ଯ୍ୟନ୍ତ ଅପେକ୍ଷା କରିବେ ଓ କିଛି ସମୟ ନେଇ ରାଜ୍ୟପାଳଙ୍କୁ ଭେଟିବେ ଓ ସରକାର ଗଠନ ପାଇଁ ଦାବି କରିବେ । ମଣିପୁରର କେତେକ ସୀମାବର୍ତ୍ତୀ ଜିଲ୍ଲାକୁ ଛାଡ଼ି ଦେଲେ ଅନ୍ୟ ଜିଲ୍ଲାଗୁଡ଼ିକରୁ ଏଏଫଏସପିଏ (ସେନାର ସ୍ବତନ୍ତ୍ର କ୍ଷମତା ଆଇନ) ପ୍ରତ୍ୟାହାର ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଗୃହମନ୍ତ୍ରୀ ଅମିତ ଶାହାଙ୍କୁ ଭେଟି ଦାବି କରିବେ । ନିର୍ବାଚନରେ ଏହା ଏକ ବଡ଼ ପ୍ରସଙ୍ଗ ହୋଇଥିଲା ।
ସଦ୍ୟତମ ରିପୋର୍ଟ ଅନୁସାରେ ବିଜେପି ୩୧ଟି ଆସନରେ ଆଗୁଆ ରହିଛି । ୬୦ ସଦସ୍ୟ ବିଶିଷ୍ଟ ମଣିପୁର ବିଧାନସଭା ଆସନରେ ସରକାର ଗଢିବାକୁ ୩୧ ବିଧାୟକଙ୍କ ସମର୍ଥନ ଆବଶ୍ୟକ । ବିଜେପିକୁ କେତେକ ସ୍ବାଧୀନ ବିଧାୟକ ସମର୍ଥନ କରିବାର ସମ୍ଭାବନା ଥିବାରୁ ବିଜେପି ସହଜରେ ସରକାର ଗଢିବାକୁ ଆଶା ରଖିଛି ।