ମଣିପୁର ହିଂସାକୁ ୨ ବର୍ଷ ପୂରିଲା; ସଂଘର୍ଷପୀଡ଼ିତ ରାଜ୍ୟକୁ ଏଡ଼ାଇ ଚାଲିଛନ୍ତି ମୋଦୀ: କଂଗ୍ରେସ

ନୂଆଦିଲ୍ଲୀ: ମଣିପୁରରେ ଘଟିଥିବା ଜାତିଗତ ହିଂସାକୁ ଶନିବାର ୨ ବର୍ଷ ପୂରିଛି। ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ କଂଗ୍ରେସ ଟାର୍ଗେଟ୍ କରିଛି। ପ୍ରଧାନମନ୍ତ୍ରୀ ମୋଦୀ ମଣିପୁରକୁ ବାରମ୍ବାର ଉପେକ୍ଷା କରି ଚାଲିଛନ୍ତି ବୋଲି କଂଗ୍ରେସ ଅଭିଯୋଗ କରିଛି। ବରିଷ୍ଠ କଂଗ୍ରେସ ନେତା ଜୟରାମ ରମେଶ କଡ଼ା ଶବ୍ଦରେ କହିଛନ୍ତି, ଠିକ୍ ଦୁଇ ବର୍ଷ ତଳେ ମଣିପୁରରେ ଉତ୍ତେଜନା ଦେଖାଦେଇଥିଲା। ୨୦୨୨ ଫେବ୍ରୁଆରିରେ ବିଧାନସଭା ନିର୍ବାଚନରେ ରାଜ୍ୟବାସୀ ବିଜେପି ଓ ଏହାର ସହଯୋଗୀ ଦଳକୁ ନିର୍ଣ୍ଣାୟକ ଜନାଦେଶ ଦେବା ପରେ ଏହା ଘଟିଥିଲା।

ରମେଶ କହିଛନ୍ତି ଯେ ଏବର୍ଷ ଫେବ୍ରୁଆରି ୧୩ରେ ମୋଦୀ ସରକାର ରାଷ୍ଟ୍ରପତି ଶାସନ ଲାଗୁ କରିଥିଲେ। ରାଜ୍ୟ ବିଧାନସଭାରେ କଂଗ୍ରେସ ପକ୍ଷରୁ ଅନାସ୍ଥା ପ୍ରସ୍ତାବ ଆଗତ ହେବା ପରେ ମୁଖ୍ୟମନ୍ତ୍ରୀ ଇସ୍ତଫା ଦେବାକୁ ବାଧ୍ୟ ହୋଇଥିଲେ ବୋଲି ସେ ଦର୍ଶାଇଛନ୍ତି। ମଣିପୁରର ଦୁଃଖ ଜାରି ରହିଛି। ରାଜନୈତିକ ଖେଳ ଖେଳାଯାଉଛି। କୌଣସି ବୁଝାମଣା ପ୍ରକ୍ରିୟା ନାହିଁ। ୬୦,୦୦୦ରୁ ଅଧିକ ଆଭ୍ୟନ୍ତରୀଣ ବିସ୍ଥାପିତ ଲୋକ ଏବେ ବି ଅତ୍ୟନ୍ତ ଦୁଃଖରେ ରିଲିଫ୍ ଶିବିରରେ ରହୁଛନ୍ତି ବୋଲି ରମେଶ କହିଛନ୍ତି। ମଣିପୁରରେ ଅନୁପସ୍ଥିତ ଥିବାରୁ ସେ ପ୍ରଧାନମନ୍ତ୍ରୀଙ୍କୁ ସମାଲୋଚନା କରିଥିଲେ। ପ୍ରଧାନମନ୍ତ୍ରୀ ସମଗ୍ର ବିଶ୍ୱକୁ ଯାଇଛନ୍ତି, କିନ୍ତୁ ଅଶାନ୍ତ ରାଜ୍ୟକୁ ଯାଇ ସେଠାକାର ଲୋକଙ୍କ ପାଖରେ ପହଞ୍ଚିବା ପାଇଁ ସମୟ ପାଇନାହାନ୍ତି କିମ୍ବା ଆଗ୍ରହ ରଖିନାହାନ୍ତି। ରମେଶ ଆହୁରି କହିଛନ୍ତି ଯେ ମଣିପୁରରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ବିଫଳ ସାବ୍ୟସ୍ତ ହୋଇଛନ୍ତି। 

ହିଂସାକୁ ୨ ବର୍ଷ ପୂରଣ ଅବସରରେ ମୈତେୟୀ ଓ କୁକି ସଂଗଠନ ପକ୍ଷରୁ ରାଜ୍ୟବ୍ୟାପୀ ବନ୍ଦ ଡାକରା ଦିଆଯାଇଥିଲା। ବଜାର, ସ୍କୁଲ ଓ ସରକାରୀ କାର୍ଯ୍ୟାଳୟ ବନ୍ଦ ରହିଥିବା ବେଳେ ସମ୍ବେଦନଶୀଳ ଅଞ୍ଚଳରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। ଇମ୍ଫାଲ ଉପତ୍ୟକାରେ ମଣିପୁର ଅଖଣ୍ଡତା ସମ୍ପର୍କିତ ସମନ୍ୱୟ ସମିତି (କୋକୋମି) ଏକ ମହମବତି ଶୋଭାଯାତ୍ରାର ନେତୃତ୍ୱ ନେଇ ‘ମଣିପୁର ପିପୁଲ୍ସ କନଭେନସନ’ ଆୟୋଜନ କରିଥିବା ବେଳେ କୁକି ଗୋଷ୍ଠୀ ପାହାଡ଼ିଆ ଜିଲ୍ଲାମାନଙ୍କରେ ‘ଅଲଗା ହେବା ଦିବସ’ ପାଳନ କରିଥିଲେ। ମେ ୨୦୨୩ରେ ମୈତେୟୀ ଓ କୁକି ସମ୍ପ୍ରଦାୟ ମଧ୍ୟରେ ହିଂସା ଆରମ୍ଭ ହେବା ପରଠାରୁ ୨୬୦ରୁ ଅଧିକ ଲୋକ ପ୍ରାଣ ହରାଇଛନ୍ତି ଏବଂ ୭୦,୦୦୦ରୁ ଅଧିକ ଲୋକ ବିସ୍ଥାପିତ ହୋଇଛନ୍ତି। ରାଷ୍ଟ୍ରପତି ଶାସନ ଓ ସୁରକ୍ଷା ବାହିନୀ ମୁତୟନ ସତ୍ତ୍ୱେ ରାଜ୍ୟରେ ଉତ୍ତେଜନା ଲାଗି ରହିଛି।