ମଣିଶଙ୍କରଙ୍କ ଅମାନିଆ ତୁଣ୍ଡ… ପାକିସ୍ତାନ ଶାନ୍ତି ଚାହୁଁଛି, ଭାରତ ଯୁଦ୍ଧଖୋର୍
ଦଳରୁ ବିଦା କରିବାକୁ ବରିଷ୍ଠ କଂଗ୍ରେସ ନେତାଙ୍କ ଦାବି
ନୂଆଦିଲ୍ଲୀ : ବୋଧହୁଏ ମଣିଶଙ୍କର ଆୟାରଙ୍କ ମୁଣ୍ଡ କାମ କରୁନି ଅଥବା ସେ ଜାଣିଶୁଣି ବିବାଦୀୟ କଥା କହି ଖବରରେ ରହିବାକୁ ଚାହୁଁଛନ୍ତି । ତାଙ୍କର ବଚନକୁ ଏବେ ରାହୁଲ ଗାନ୍ଧିମଧ୍ୟ ଡରିଲେଣି, କାରଣ ତାଙ୍କ ଯୋଗୁଁ କଂଗ୍ରେସ ଦଳକୁ ମଧ୍ୟ ଅନେକ ଅପବାଦ ସହିବାକୁ ପଡୁଛି । ଗତ ଡିସେମ୍ବର ମାସରେ ଗୁଜୁରାଟ ନିର୍ବାଚନ ପୂର୍ବରୁ ମୋଦିଙ୍କୁ ଛୋଟ ଲୋକ କହିବାରୁ ଅନେକ ବିବାଦ ସୃଷ୍ଟି ହୋଇଥିଲା । ଏବେ ପୁଣି ମୁହଁ ଖୋଲିଛନ୍ତି ମଣିଶଙ୍କର । ତାହା ପୁଣି ପାକିସ୍ତାନରେ ।
Sambad is now on WhatsApp
Join and get latest news updates delivered to you via WhatsApp
ପାକିସ୍ତାନର କରାଚୀରେ ଅନୁଷ୍ଠିତ ଏକ ସାହିତ୍ୟ ସମାରୋହରେ ଯୋଗ ଦେଇ ମଣିଶଙ୍କର କହିଛନ୍ତି, “କାଶ୍ମୀର ସମସ୍ୟାର ଏକମାତ୍ର ସମାଧାନ ହେଉଛି କଥାବାର୍ତ୍ତା । ପାକିସ୍ତାନ ସବୁବେଳେ କଥାବାର୍ତ୍ତାର ଦ୍ୱାର ଖୋଲା ରଖିଛି, କିନ୍ତୁ ଭାରତର ଏହି ନୀତି ନାହିଁ । ଏଣୁ ପାକିସ୍ତାନ ପାଇଁ ଗର୍ବ ଲାଗୁଛି ଓ ଭାରତ ସରକାରଙ୍କ ପାଇଁ ଦୁଃଖ ଲାଗୁଛି ।” ତାଙ୍କର ଏହି କଥା ଶୁଣି ଉପସ୍ଥିତ ଜନତା କରତାଳି ଦେଇଥିଲେ । ଏକ ଭାରତର ଜଣେ ନେତା ନିଜ ଦେଶକୁ ନିନ୍ଦା କରୁଥିବାବେଳେ ଉପସ୍ଥିତ ପାକିସ୍ତାନି ଜନତାଙ୍କୁ ମଜା ଲାଗିବା ଏକ ସ୍ୱାଭାବିକ କଥା ।
ସେ ଆହୁରି ମଧ୍ୟ କହିଥିଲେ ଯେ ପାକିସ୍ତାନୀ ଲୋକମାନେ ଭାରତ ସହ ଶାନ୍ତି ଚାହୁଁଛନ୍ତି, ଭାରତୀୟ ମାନେ ହିଁ ୧୯୪୭ର ବିଭାଜନ ମାନସିକତାରୁ ମୁକୁଳି ପାରିନାହାନ୍ତି । ଅର୍ଥାତ୍ ପାକିସ୍ତାନି ଲୋକମାନେ ଶାନ୍ତିପ୍ରିୟ ମାତ୍ର ଭାରତ ହିଁ ବିବାଦ ଚାହୁଁଛି । ସେ ଆହୁରି ମଧ୍ୟ କହିଛନ୍ତି ଯେ ପୂର୍ବତନ ରାଷ୍ଟ୍ରପତି ପରଭେଜ୍ ମୁଶାରଫଙ୍କ ଦ୍ୱାରା ସ୍ଥାପିତ ଫ୍ରେମଓ୍ଵାର୍କ ଅନୁସାରେ ଉଭୟ ଦେଶ ବିବାଦର ସମାଧାନ କରିବା ଆବଶ୍ୟକ ।
ବାରମ୍ବାର ମଣିଶଙ୍କରଙ୍କ ଏପରି ଲଗାମ ଛଡ଼ା ମନ୍ତବ୍ୟ ଫଳରେ ତାଙ୍କୁ କଂଗ୍ରେସରୁ ବାହାର କରିବାକୁ ଖୋଦ କଂଗ୍ରେସ ଦଳରେ ଦାବି ଉଠିଲାଣି । ପୁରୁଖା କଂଗ୍ରେସ ନେତା ହନୁମନ୍ଥା ରାଓ କହିଛନ୍ତି ଯେ ଆୟାରଙ୍କୁ ବାହାର କରିବାକୁ ସେ ସଭାପତି ରାହୁଲ ଗାନ୍ଧିଙ୍କୁ ଚିଠି ଲେଖିବେ ।