ଦେଉଳା(ବିଶ୍ୱଜିତ ମହାନ୍ତି): ବାଲେଶ୍ବର ଜିଲ୍ଲା ଭୋଗରାଇ ବ୍ଲକ୍ରେ ଏମିତି ଏକ ହାଟ ଅଛି, ଯାହା ଓଡ଼ିଶା ଓ ପଶ୍ଚିମବଙ୍ଗ ରାଜ୍ୟର ସୀମାନ୍ତବାସୀଙ୍କ ଅର୍ଥନୈତିକ ଓ ସାମାଜିକ ଜୀବନକୁ ଋଦ୍ଧିମନ୍ତ କରୁଛି। ସେହି ହାଟ ହେଉଛି; ଅନଳିଆ ପଞ୍ଚାୟତ ମାନକୁଣ୍ତା ସାପ୍ତାହିକ ହାଟ। କିଣାବିକା ପାଇଁ ଓଡ଼ିଶା ଓ ପଶ୍ଚିମବଙ୍ଗ ରାଜ୍ୟର ବ୍ୟବସାୟୀ ଓ ଜନସାଧାରଣ ଏଠାକୁ ଆସନ୍ତି। ହାଟ ୧ ଏକର ଜାଗାରେ ରହିଛି। ଯାହା ସୋମବାର ଓ ଶୁକ୍ରବାର ଅପରାହ୍ନରେ ଏବଂ ବୁଧବାର ଓ ଶନିବାର ପୂର୍ବାହ୍ନରେ ବସିଥାଏ। ଉପଲବ୍ଧ ହେଉଥିବା ମାନକୁଣ୍ତା ଗ୍ରାମର କୁଶଳୀ କୁମ୍ଭକାରମାନଙ୍କ ମାଟିପାତ୍ର ଏବଂ ସ୍ଥାନୀୟ ଚାଷୀଙ୍କ ଦ୍ବାରା ଉତ୍ପାଦିତ ପାନ ଏହି ହାଟର ମୁଖ୍ୟ ଆକର୍ଷଣ। ହାଟରେ ଶତାଧିକ ସ୍ଥାୟୀ ଓ ୮୦ରୁ ଅଧିକ ଉଠା ଦୋକାନୀ ସେମାନଙ୍କ ପସରା ମେଲାନ୍ତି। ଦୀର୍ଘ ୩୫ ବର୍ଷ ହେଲା ଏହି ହାଟ ଚାଲିଛି।
Sambad is now on WhatsApp
Join and get latest news updates delivered to you via WhatsApp
ହାଟ ଯୋଗୁ ଓଡ଼ିଶା ଓ ପଶ୍ଚିମବଙ୍ଗ ରାଜ୍ୟର ସୀମାନ୍ତବାସୀଙ୍କ ଅର୍ଥନୈତିକ ବିକାଶ ହେଉଛି। ତା’ ସହିତ ଭାଇଚାରା ଓ ଆତ୍ମୀୟ ସଂପର୍କ ନିବିଡ଼ ହେବାରେ ଲାଗିଛି। ହାଟରେ ଉଭୟ ରାଜ୍ୟର ଲୋକଙ୍କ ସହଯୋଗିତାରେ କାଳୀପୂଜା, ମୈତ୍ରୀ ଉତ୍ସବ, କ୍ରିକେଟ୍ ପ୍ରତିଯୋଗିତା, ନୀଳରୁଦ୍ରେଶ୍ବର ପାଟପର୍ବ ଆଦି ଆୟୋଜିତ ହୋଇଆସୁଛି। ୨୦୧୪ ମସିହା ପାଖରୁ ହାଟକୁ ସରକାର ନିଲାମ ଦେଉଛନ୍ତି। ୨୦୨୩-୨୦୨୪ ଆର୍ଥିକ ବର୍ଷ ପାଇଁ ଭୋଗରାଇ ତହସିଲ ପକ୍ଷରୁ ୩୪ ହଜାର ଟଙ୍କାରେ ହାଟ ନିଲାମ ଦିଆଯାଇଛି। ଓଡ଼ିଶା ପଞ୍ଚାୟତିରାଜ ବିଭାଗ ପକ୍ଷରୁ ହାଟ ପରିସରରେ ୧୪ଟି ଦୋକାନଘର ଏବଂ କାଳୀ ମନ୍ଦିର, ହନୁମାନ ମନ୍ଦିର, ଖେଳପଡ଼ିଆ, ବିଶ୍ରାମାଗାର ଓ ଗୋଷ୍ଠୀ କେନ୍ଦ୍ର ନିର୍ମାଣ ପାଇଁ ସରକାର ୪୦ ଲକ୍ଷ ଟଙ୍କା ଅନୁଦାନ ଯୋଗାଇ ଦେଇଛନ୍ତି। ଗୁରୁତ୍ବ ଦୃଷ୍ଟିରୁ ହାଟର ଯେତିକି ବିକାଶ ହୋଇଛି, ତାହା ଯଥେଷ୍ଟ ନୁହେଁ। ଏଠାରେ ବିକାଶକୁ ଆହୁରି ଆଗକୁ ନେବା ପାଇଁ ହେବ। ସେପରି ହେଲେ ଓଡ଼ିଶା ଓ ପଶ୍ଚିମବଙ୍ଗ ରାଜ୍ୟର ସୀମାନ୍ତବାସୀଙ୍କ ଅର୍ଥନୈତିକ ବିକାଶରେ ଡେଣା ଲାଗିବା ସହ ସାମାଜିକ ଜୀବନ ଅଧିକ ମାର୍ଜିତ ଓ ଶୃଙ୍ଖଳିତ ହୋଇପାରିବ ବୋଲି ବଜାର କମିଟିର ସଭାପତି ତଥାଗତ ମିଶ୍ର, ଘନଶ୍ୟାମ ପାଢ଼ୀ, ରାମଚନ୍ଦ୍ର ବେହେରା, ପ୍ରଦୀପ ସେଠୀ, ଦେବାଶିଷ ଦ୍ୱିବେଦୀ ପ୍ରମୁଖ ପ୍ରକାଶ କରିଛନ୍ତି।