ଦେଶର ଅନ୍ୟତମ ସମ୍ମାନନୀୟ ନେତାଙ୍କ ପରଲୋକରେ ଦେଶ ଝୁରୁଛି : ମୋଦୀ

ନୂଆଦିଲ୍ଲୀ : ପୂର୍ବତନ ପ୍ରଧାନମନ୍ତ୍ରୀ ଡ. ମନମୋହନ ସିଂଙ୍କ ପରଲୋକର ସାରା ଦେଶରେ ଶୋକର ଛାୟା ଖେଳିଯାଇଛି । ଦଳମତ ନିର୍ବିଶେଷରେ ସମସ୍ତେ ତାଙ୍କ ପରଲୋକରେ ଦୁଃଖ ପ୍ରକାଶ କରିଛନ୍ତି । 

ଡ.ସିଂଙ୍କ ପରଲୋକରେ ଶୋକ ପ୍ରକାଶ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏକ୍ସରେ ଲେଖିଛନ୍ତି ଯେ ଦେଶର ଜଣେ ସବୁଠାରୁ ସମ୍ମାନନୀୟ ନେତାଙ୍କ ପରଲୋକରେ ସମଗ୍ର ଦେଶ ଝୁରୁଛି । ସାଧାରଣ ପରିବାରରୁ ଆସି ସେ ଜଣେ ବିଶିଷ୍ଟ ଅର୍ଥନୀତିଜ୍ଞ ହୋଇଥିଲେ । ସେ ଅର୍ଥମନ୍ତ୍ରୀ ସମେତ ବିଭିନ୍ନ ସରକାରୀ ପଦବୀରେ ମଧ୍ୟ କାର୍ଯ୍ୟ କରିଥିଲେ ଏବଂ ବର୍ଷ ବର୍ଷ ଧରି ଆମ ଦେଶର ଆର୍ଥିକ ନୀତିରେ ଏକ ଦୃଢ଼ ଛାପ ଛାଡିଥିଲେ । ସଂସଦରେ ତାଙ୍କର ଉପସ୍ଥିତି ମଧ୍ୟ ଅମାୟିକ ଥିଲା । ଆମର ପ୍ରଧାନମନ୍ତ୍ରୀ ଭାବରେ ସେ ଲୋକଙ୍କ ଜୀବନରେ ଉନ୍ନତି ଆଣିବା ପାଇଁ ବ୍ୟାପକ ପ୍ରୟାସ କରିଥିଲେ ।
ଏହା ସହିତ ମୋଦୀ ନିଜର ମୁଖ୍ୟମନ୍ତ୍ରୀତ୍ବ ସମୟରେ ଡ. ସିଂଙ୍କ ସହ ବିଭିନ୍ନ ବିଷୟରେ ହୋଇଥିବା ତାଙ୍କର ଆଲୋଚନା କଥା ଉଲ୍ଲେଖ କରିଥିଲେ । ଏହି ଦୁଃଖର ସମୟରେ ସେ ଡ. ସିଂଙ୍କ ପରିବାର ଓ ବନ୍ଧୁ ଓ ଶୁଭେଚ୍ଛୁମାନଙ୍କ ପ୍ରତି ସମବେଦନା ଜଣାଇଛନ୍ତି । 

ଡ. ସିଂ ଙ୍କ ପରଲୋକରେ କଂଗ୍ରେସ ସାଂସଦ ପ୍ରିୟଙ୍କା ଗାନ୍ଧି ଭଦ୍ରା ମଧ୍ୟ ନିଜର ଶୋକ ପ୍ରକାଶ କରିଛନ୍ତି । ଏକ୍ସ’ରେ ସେ ଲେଖିଛନ୍ତି ଯେ ସର୍ଦ୍ଦାର ମନମୋହନ ସିଂଙ୍କୁ ଯେଭଳି ସମ୍ମାନ ହାସଲ କରିଥିଲେ ତାହା ବିରଳ । ସେ ସବୁବେଳେ ଆମ ସମସ୍ତଙ୍କ ପାଇଁ ପ୍ରେରଣାର ସ୍ରୋତ ରହିବେ ।

ବିଜେପି ସଭାରତି ଜେପି ନଡ୍ଡାଙ୍କ ଶୋକ
ପୂର୍ବତନ ପ୍ରଧାନମନ୍ତ୍ରୀ ତଥା ଅର୍ଥନୀତିଜ୍ଞ ଶ୍ରୀ ମନମୋହନ ସିଂହଙ୍କ ବିୟୋଗ ଦେଶ ପାଇଁ ଏକ ବଡ଼ କ୍ଷତି। ଜଣେ ଦୂରଦର୍ଶୀ ରାଜନେତା ଏବଂ ଭାରତୀୟ ରାଜନୀତିର ଜଣେ ଦକ୍ଷ ବ୍ୟକ୍ତି, ଜନସେବାରେ ତାଙ୍କର ଉଲ୍ଲେଖନୀୟ କ୍ୟାରିୟରରେ ସେ କ୍ରମାଗତ ଭାବରେ ପଛୁଆ ବର୍ଗର କଲ୍ୟାଣ ପାଇଁ ସ୍ୱର ଉତ୍ତୋଳନ କରିଥିଲେ । ତାଙ୍କ ନେତୃତ୍ୱ ଦଳମତ ନିର୍ବିଶେଷରେ ସବୁଠି ପ୍ରଶଂସା ଓ ସମ୍ମାନ ଅର୍ଜନ କରିଥିଲା। ଶ୍ରୀ ମନମୋହନ ସିଂହଙ୍କ ପରମ୍ପରା ପିଢ଼ିକୁ ଦେଶ ନିର୍ମାଣ ପାଇଁ ପ୍ରେରଣା ଯୋଗାଇବ। ତାଙ୍କ ପରିବାର, ବନ୍ଧୁ ଏବଂ ପ୍ରଶଂସକଙ୍କ ପ୍ରତି ମୋର ଗଭୀର ସମବେଦନା । ଓମ୍ ଶାନ୍ତି ।