ନୂଆଦିଲ୍ଲୀ : ପପୁଲାର ଫ୍ରଣ୍ଟ୍ ଅଫ ଇଣ୍ଡିଆ (ପିଏଫଆଇ) ସଂପର୍କରେ କେତେକ ସାଂଘାତିକ ତଥ୍ୟ ତଦନ୍ତରୁ ଜଣାପଡ଼ିଛି । ସରକାରଙ୍କ ଦ୍ବାରା ନିଷିଦ୍ଧ ଘୋଷିତ ଏହି ସଂଗଠନରେ ସକ୍ରିୟ ସଭ୍ୟ ତାଲିକାରେ ରହିଛନ୍ତି ଅନେକ ସରକାରୀ କର୍ମଚାରୀ, ଇଂଜିନିୟର, ନେତା, ଲାଇବ୍ରେରିଆନ ଓ ସମାଜର ପ୍ରତିଷ୍ଠିତ ବ୍ୟକ୍ତି ।
Sambad is now on WhatsApp
Join and get latest news updates delivered to you via WhatsApp
ଏନଆଇଏ ସୁତ୍ରକୁ ଉଦ୍ଧାର କରି ଏକ ଗଣମାଧ୍ୟମ ରିପୋର୍ଟ ପ୍ରକାଶ କରିଛି ଯେ, ପିଏଫଆଇର ସଭାପତି ଓମା ସଲାମ କେରଳ ସରକାରଙ୍କ ଅଧିନସ୍ଥ କେରଳ ରାଜ୍ୟ ବିଦ୍ୟୁତ ବୋର୍ଡର ଜଣେ କର୍ମଚାରୀ । ତେବେ ସେ ପିଏଫଆଇ ପରି ଏକ ସଂଦିଗ୍ଧ ସଂସ୍ଥାର ସଭାପତି ଥିବା ଜଣାପଡ଼ିବା ପରେ ୨୦୨୦ରେ ତାକୁ ଚାକିରିରୁ ନିଲମ୍ବିତ କରାଯାଇଥିଲା ।
ସେହିପରି ପିଏଫଆଇର ଉପ-ସଭାପତି ଅବଦୁର ରେହେମାନ ପୂର୍ବରୁ କୋଚିନ ୟୁନିଭର୍ସିଟି ଅଫ ସାଇନ୍ସ ଏଣ୍ଡ ଟେକନଲୋଜୀର ଜଣେ ଲାଇବ୍ରେରିଆନ ଭାବେ କାର୍ଯ୍ୟ କରୁଥିଲେ । ସେ ମଧ୍ୟ ପୂର୍ବରୁ ସିମିର ଜଣେ କାର୍ଯ୍ୟକର୍ତ୍ତା ଥିଲେ ।
ପିଏଫଆଇର ଜାତୀୟ ମହାସଚିବ ପି.କୋୟା ଜଣେ ସାମ୍ବାଦିକ । ସାମ୍ବାଦିକ ହେବା ପୂର୍ବରୁ ସେ ମଧ୍ୟ ଏର୍ଣ୍ଣାକୁଲମରେ ଜଣେ ଅଧ୍ୟାପକଭାବେ କାମ କରୁଥିଲେ । ସେ ଏସଡିପିଆଇ ଟିକେଟରେ ୨୦୧୪ ଲୋକସଭା ନିର୍ବାଚନ ବି ଲଢିଥିଲେ ।
ଏହିପରିଭାବେ ଅନେକ ସରକାରୀ ବିଭାଗ, ଘରୋଇ କମ୍ପାନି, ସାମାଜିକ ସଂଗଠନ ଓ ରାଜନୈତିକ ଦଳରେ ପିଏଫଆଇ ଅନୁପ୍ରବେଶ କରିସାରିଥିଲା ।
ସୂଚନାଯୋଗ୍ୟ ଯେ କେନ୍ଦ୍ର ସରକାର ବୁଧବାରଦିନ ପିଏଫଆଇକୁ ୫ ବର୍ଷ ପାଇଁ ନିଷିଦ୍ଧ ଘୋଷଣା କରିଛନ୍ତି । ଏହା ସହିତ ପିଏଫଆଇର ସବୁ ଶାଖା କମ୍ପାନିଗୁଡ଼ିକୁ ବି ନିଷିଦ୍ଧ କରାଯାଇଛି ।