ଇସ୍ରାଏଲ ଆକ୍ରମଣରେ ଇରାନ୍‌ର ବହୁ ସାମ୍ବାଦିକଙ୍କ ମୃତ୍ୟୁ

ତେହରାନ: ଇସ୍ରାଏଲ-ଇରାନ ମଧ୍ୟରେ ଆରମ୍ଭ ହୋଇଥିବା ସଂଘର୍ଷ ଭୟଙ୍କର ରୂପ ନେଇଛି। ‌ଇରାନର ସରକାରୀ ରେଡିଓ ଓ ଟେଲିଭିଜନ (ଆଇଆର୍‌ଆଇବି) କୋଠା ଉପରେ ଆକ୍ରମଣ ଯୋଗୁଁ ବହୁ ସାମ୍ବାଦିକଙ୍କର ମୃତ୍ୟୁ ହୋଇଛି। ବହୁ ସଂଖ୍ୟକ ସାମ୍ବାଦିକ ଏହି ଆକ୍ରମଣରେ ଆହତ ହୋଇଛନ୍ତି। ସାମାଜିକ ଗଣମାଧ୍ୟମ ଏକ୍ସରେ ଭାରତରେ ଅବସ୍ଥାପିତ ଇରାନ ଦୂତାବାସ ପକ୍ଷରୁ ଇସ୍ରାଏଲର ଏହି କାର୍ଯ୍ୟାନୁଷ୍ଠାନକୁ ଦୃଢ଼ ନିନ୍ଦା କରାଯିବା ସହିତ ଏହାକୁ ଆପରାଧିକ କାର୍ଯ୍ୟ ବୋଲି ଅଭିହିତ କରାଯାଇଛି। ଏହା ସମସ୍ତ ପ୍ରକାର ଅନ୍ତର୍ଜାତୀୟ ନିୟମକୁ ଉଲ୍ଲଂଘନ କରୁଛି। ଭାରତରେ ସ୍ବାଧୀନ ଗଣମାଧ୍ୟମଗୁଡ଼ିକ ଏହି ଘଟଣାକୁ ନିନ୍ଦା କରିବାକୁ ମତ ପ୍ରକାଶ ପାଇଛି। 

ଟେଲିଭିଜନ୍‌ ପ୍ରସାରଣ ଚାଲିଥିବାବେଳେ ଇସ୍ରାଏଲ ଆକ୍ରମଣ କରିଥିଲା। ଜଣେ ମହିଳା ଆଙ୍କର ଟେଲିଭିଜନ୍‌ ଷ୍ଟୁଡିଓରେ ଖବର ପଢ଼ୁଥିବାବେଳେ ପ୍ରଚଣ୍ଡ ବିସ୍ଫୋରଣ ଶବ୍ଦ ଶୁଣିବାକୁ ମିଳିଥିଲା। ଏହାର ଘଣ୍ଟାଏ ପୂର୍ବରୁ ଇସ୍ରାଏଲ ଟିଭି ଷ୍ଟୁଡିଓ ଥିବା ଅଞ୍ଚଳରେ ଲୋକମାନଙ୍କୁ ସୁରକ୍ଷିତ ସ୍ଥାନକୁ ଚାଲିଯିବା ପାଇଁ ସତର୍କ କରିଥିଲା। ତେବେ ମୃତାହତ ସାମ୍ବାଦିକଙ୍କ ସଂଖ୍ୟା ରିପୋର୍ଟ ଲେଖାହେବା ପର୍ଯ୍ୟନ୍ତ ଜଣାପଡ଼ିନାହିଁ।  ଇସ୍ରାଏଲ ମଧ୍ୟ ଇରାନର ଗଣମାଧ୍ୟମ ସଂସ୍ଥା ଉପରେ ହୋଇଥିବା ଆକ୍ରମଣକୁ ସ୍ପଷ୍ଟ କରିଛି। ଇସ୍ରାଏଲ ଆକ୍ରମଣରେ ଇରାନର ୪ ଜଣ ବରିଷ୍ଠ ଗୁଇନ୍ଦା ଅଧିକାରୀଙ୍କ ମଧ୍ୟ ମୃତ୍ୟୁ ହୋଇଛି। ସେଥିରେ ଇରାନ ସେନା ଗୁଇନ୍ଦା ବିଭାଗ ମୁଖ୍ୟ ରହିଛନ୍ତି। ଆକ୍ରମଣରେ ମୃତ୍ୟୁ ହୋଇଥିବା ଅଧିକାରୀମାନେ ହେଲେ ମହମ୍ମଦ ହାସନ ମହକିକ, ମହସିନ ବାକ୍‌ରି ଓ ଅବୁ ଅଲ୍‌ ଫଦି  ନିକୋଇ। ଇସ୍ରାଏଲ ବିରୋଧରେ ଇରାନର ଏହି ଅଧିକାରୀମାନେ ପ୍ରମୁଖ ଭୂମିକା ଗ୍ରହଣ କରିଥିଲେ।