ମତଦାନର ତିନିଦିନ ପୂର୍ବରୁ ଛତିଶଗଡ଼ରେ ବିଜେପି ନେତାଙ୍କୁ ହତ୍ୟା କଲେ ମାଓବାଦୀ
ରାୟପୁର: ଛତିଶଗଡରେ ବିଧାନସଭା ନିର୍ବାଚନ ପାଇଁ ପ୍ରଥମ ପର୍ଯ୍ୟାୟ ମତଦାନର ତିନି ଦିନ ପୂର୍ବରୁ ମାଓବାଦୀମାନେ ପ୍ରଚାର କରୁଥିବା ଜଣେ ବରିଷ୍ଠ ବିଜେପି ନେତାଙ୍କୁ ହତ୍ୟା କରିଛନ୍ତି। ମାଓବାଦୀ ହତ୍ୟା କରିଥିବା ବିଜେପି ନେତାଙ୍କ ନାମ ରତନ ଦୁବେ ହୋଇଥିବା ବେଳେ ସେ ବିଜେପିର ନାରାୟଣପୁର ଜିଲ୍ଲା ୟୁନିଟର ଉପାଧ୍ୟକ୍ଷ ଥିଲେ। ପୁଲିସ ପକ୍ଷରୁ ମିଳିଥିବା ସୂଚନା ମୁତାବକ ଏହି ଘଟଣା ନାରାୟଣପୁରର କୌଶଳନଗର ବଜାରରେ ଘଟିଛି, ଯେଉଁଠାରେ ପ୍ରଚାର ସମୟରେ ୩ରୁ ୪ ଜଣ ନକ୍ସଲ କୁରାଢ଼ୀରେ ଆକ୍ରମଣ କରି ବିଜେପି ନେତାଙ୍କୁ ହତ୍ୟା କରିଛନ୍ତି। କୁହାଯାଉଛି ଯେ ରତନ ଦୁବେ ଛତିଶଗଡ ନିର୍ବାଚନ ପାଇଁ ପ୍ରଚାର କରୁଥିଲେ। ଏହି ସମୟ ମଧ୍ୟରେ ନକ୍ସଲମାନେ ତାଙ୍କୁ ଟାର୍ଗେଟ କରିଥିଲେ ।
Sambad is now on WhatsApp
Join and get latest news updates delivered to you via WhatsApp
ବର୍ତ୍ତମାନ ପୁଲିସ ଏହି ଘଟଣାର ତଦନ୍ତ କରୁଛି। ଉଲ୍ଲେଖ ଥାଉ କି ରାଜ୍ୟରେ ବିଧାନସଭା ନିର୍ବାଚନ ପାଇଁ ମତଦାନ ୭ ଏବଂ ୧୭ ନଭେମ୍ବରରେ ଦୁଇଟି ପର୍ଯ୍ୟାୟରେ ଅନୁଷ୍ଠିତ ହେବ। ବାସ୍ତବରେ କିଛି ବର୍ଷ ହେଲା ଏହା ଦେଖିବାକୁ ମିଳୁଛି ଯେ ନକ୍ସଲମାନେ ରାଜନୈତିକ ଦଳର ନେତାମାନଙ୍କୁ ଟାର୍ଗେଟ କରିଛନ୍ତି। ଏହାପୂର୍ବରୁ ଛତିଶଗଡରେ ଏଭଳି ମାମଲା ଦେଖିବାକୁ ମିଳିଛି। ଗତ ବର୍ଷ ମଧ୍ୟ ବିଜେପି ଜିଲ୍ଲା ଉପାଧ୍ୟକ୍ଷ ସାଗର ସାହୁଙ୍କୁ ନକ୍ସଲମାନେ ନାରାୟଣପୁରରେ ତାଙ୍କ ଘରେ ପ୍ରବେଶ କରି ଗୁଳି ମାରି ହତ୍ୟା କରିଥିଲେ |