ବୁଲେଟ ପାଇଁ ଅଧାରେ ଭାଙ୍ଗିଲା ବାହାଘର
ଭୋପାଳ: ବୁଲେଟ ପାଇଁ ଭାଙ୍ଗିଗଲା ବାହାଘର | ଆଉ କନ୍ୟାକୁ ନ ନେଇ ବରପକ୍ଷ ଫେରିଯାଇଛନ୍ତି | ମଧ୍ୟପ୍ରଦେଶର ଗୁନାରେ ଏଭଳି ଏକ ଘଟଣା ଘଟିଛି | କନ୍ୟାଘର ପକ୍ଷରୁ ଅଭିଯୋଗ ହୋଇଛି ଯେ ନିକାହ ପଢ଼ାଯିବା ପରେ ମଧ୍ୟ ପୁଅଘର ପକ୍ଷରୁ କନ୍ୟାକୁ ନ ନେଇ ଚାଲିଯାଇଥିଲେ | ପୁଅଘର ପକ୍ଷରୁ ଯୌତୁକ ଦାବି କରାଯାଇଥିଲା | ସେମାନେ ବୁଲେଟ୍ ଗାଡି ସହ ଟଙ୍କା ମାଗିବା ଆରମ୍ଭ କଲେ | ଝିଅର ବାପା କହିଛନ୍ତି ଯେ ଶେଷ ମୁହୂର୍ତ୍ତରେ ସେ କେଉଁଠାରୁ ଟଙ୍କା ଓ ବୁଲେଟ ଆଣିବେ ବୋଲି ପ୍ରଶ୍ନ କରିଥିଲେ | ଏକଥା ଶୁଣି ବରପକ୍ଷ ସେମାନଙ୍କ ଉପରେ ଆକ୍ରମଣ ମଧ୍ୟ କରିଥିଲେ | ଏବାବଦରେ ସୂଚନା ପାଇବା ପରେ ପୁଲିସ ଘଟଣାସ୍ଥଳରେ ପହଞ୍ଚିଥିଲା | ଆଉ ପୁଲିସକୁ ଦେଖି ବରପକ୍ଷ ଖସି ପଳାଇଥିଲେ |
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ ମଧ୍ୟପ୍ରଦେଶର ରାଘରଗଡର ଜଣେ ଯୁବତୀଙ୍କ ସହ ଉମର ରାଇନ ନାମକ ଯୁବକଙ୍କର ବିବାହ ସ୍ଥିର ହୋଇଥିଲା। ଉମର କର୍ଣ୍ଣେଲଗଞ୍ଜର ବାସିନ୍ଦା | ସୂଚନା ଅନୁଯାୟୀ, ଉଭୟଙ୍କର ପ୍ରାୟ ୩ ମାସ ପୂର୍ବରୁ ନିର୍ବନ୍ଧ ହୋଇଥିଲା। ତେବେ ବିବାହ ସମୟରେ ପୁଅର ବାପା ଓ ମା ଯୌତୁକ ଦାବିରେ ଜିଦ୍ ଧରିଥିଲେ। ପୁଅର ପରିବାର ସଦସ୍ୟମାନେ ବୁଲେଟ୍, ସୁନା ଓ ରୂପା ଅଳଙ୍କାର ମାଗିବା ଆରମ୍ଭ କରିଥିଲେ | ଝିଅର ବାପା ନିଜର ଅକ୍ଷମତା ପ୍ରକାଶ କରିବା ପରେ ବର କହିଥିଲା ଯେ କହିଥିବା ଟଙ୍କା ଦେବାକୁ ପଡିବ। ନଚେତ୍ ଆମେ ଝିଅକୁ ନେବୁ ନାହିଁ |
ଏହାପରେ ଯେତେବେଳେ ବିବାଦ ବଢିଥିଲା, ବରପକ୍ଷ କନ୍ୟାର ଭାଇଙ୍କ ଉପରେ ଆକ୍ରମଣ କରିବା ସହ ତାଙ୍କ ଗାଡି ଭାଙ୍ଗିଦେଇଥିଲେ | ଏବାବଦରେ ପୁଲିସକୁ ସୂଚନା ଦିଆଯାଇଥିଲା। ପୁଲିସ ଘଟଣାସ୍ଥଳରେ ପହଞ୍ଚିବା ପରେ ବରପକ୍ଷ ଚିତପଟାଙ୍ଗ ମାରିଥିଲେ | ପୁଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।