ବିବାହିତ ବ୍ୟକ୍ତି ‌ହୋଇଥିବାରୁ ମୁଁ ରାଗେ ନାହିଁ: କଂଗ୍ରେସ ମୁଖ୍ୟଙ୍କୁ କହିଲେ ଉପରାଷ୍ଟ୍ରପତି ଧନଖଡ଼

ନୂଆଦିଲ୍ଲୀ: ମୁଁ ଜଣେ ବିବାହିତ ବ୍ୟକ୍ତି ଏବଂ ବାହାହେବାର ୪୫ ବର୍ଷରୁ ଅଧିକ ହେଲାଣି। ମୁଁ କେବେ ରାଗେ ନାହିଁ ବୋଲି ଆଜି ଉପରାଷ୍ଟ୍ରପତି ତଥା ରାଜ୍ୟସଭା ଅଧ୍ୟକ୍ଷ ଜଗଦୀପ ଧନଖଡ଼େ କଂଗ୍ରେସ ମୁଖ୍ୟ ମଲ୍ଲିକାର୍ଜୁନ ଖଡ଼ଗେଙ୍କୁ କହିବାରୁ ଗୃହରେ ହାସ୍ୟରୋଳ ସୃଷ୍ଟି ହୋଇଥିଲା।

ଧାରା ୨୬୭ ଅନୁଯାୟୀ ମଣିପୁର ହିଂସା ଉପରେ ଆଲୋଚନା କରିବା ଲାଗି କଂଗ୍ରେସ ଅଧ୍ୟକ୍ଷ ଅନୁରୋଧ କରୁଥିଲେ। କିନ୍ତୁ, ରାଜ୍ୟସଭା ଅଧ୍ୟକ୍ଷ କହିଲେ ଯେ, ଆଲୋଚନା ପାଇଁ ସ୍ବଳ୍ପ ସମୟ ଦେଉଥିବା ଧାରା ୧୭୬ ଅନୁଯାୟୀ ମଣିପୁର ପ୍ରସଙ୍ଗ ଆଲୋଚନା କରିବାକୁ ସରକାର ପ୍ରସ୍ତୁତ ଅଛନ୍ତି।

ଅଧ୍ୟକ୍ଷଙ୍କୁ ଖଡ଼ଗେ କହିଲେ, ଧାରା ୨୬୭ ଅନୁସାରେ ଜାରି ନୋଟିସ୍‌ ଦାବି କରୁଛି ଯେ, ଅନ୍ୟ ସମସ୍ତ କାମ ପଛରେ ପକାଇ ଏହି ଘଟଣା ଉପରେ ପ୍ରାଧାନ୍ୟ ଦିଆଯିବା ଉଚିତ। ଏହା ଏକ ବ୍ୟବସ୍ଥା। କିନ୍ତୁ, ଏହା କେମିତି ମର୍ଯ୍ୟାଦାର କଥା ହେଲା ମୁଁ ବୁଝିପାରୁନି। ଧାରା ୨୬୭ ଅନୁସାରେ ଆଲୋଚନା କରିବାକୁ ହେଲେ କାରଣ ଲୋଡ଼ା ବୋଲି ଆପଣ କହିଲେ, ଆମେ କାରଣ ଦର୍ଶାଇଲୁ।

ଖଡ଼ଗେ ପୁଣି କହିଲେ, ଗତକାଲି ବି ମୁଁ ଆପଣଙ୍କୁ ଅନୁରୋଧ କରିଥିଲି, ଆପଣ ବୋ‌ଧହୁଏ ରାଗିଗଲେ। ଖଡ଼ଗେଙ୍କ କଥା ଶୁଣି ଗୃହରେ ଉପସ୍ଥିତ ସଦସ୍ୟମାନେ ହସିଉଠିଲେ।

Image Courtesy of India Today

ଧନଖଡ଼ ମଧ୍ୟ ହସି ପକାଇ କହିଲେ, ମୁଁ ଜଣେ ବିବାହିତ ବ୍ୟକ୍ତି। ମୋ ବାହାଘରକୁ ୪୫ ବର୍ଷରୁ ଅଧିକ ହେଲାଣି। ମୁଁ କେବେ ରାଗେ ନାହିଁ। ଧନଖଡ଼ଙ୍କ କଥା ଶୁଣି ପୁଣି ଗୃହରେ ହାସ୍ୟରୋଳ ଲାଗିଲା।

କଂଗ୍ରେସ ନେତା ଚିଦମ୍ବରମ୍‌ଙ୍କ ଦୃଷ୍ଟାନ୍ତ ଦେଇ ଧନଖଡ଼ ପୁଣି କହିଲେ, ପ୍ରସିଦ୍ଧ ତଥା ବରିଷ୍ଠ ଆଡ୍‌ଭୋକେଟ୍‌ ଚିଦମ୍ବରମ୍‌ ଜାଣିଥିବେ। ବରିଷ୍ଠ ଆଡ୍‌ଭୋକେଟ୍‌ ଭାବେ ଆମର କ୍ରୋଧ ପ୍ରକଟ କରିବାର ଅଧିକାର ନାହିଁ। ଅନ୍ତତଃ କର୍ତ୍ତୃପକ୍ଷଙ୍କ ନିକଟରେ। ଆଜ୍ଞା, ଆପଣ (ଖଡ୍‌ଗେ) ଜଣେ କର୍ତ୍ତୃପକ୍ଷ।

ତାଙ୍କ କଥା ଶୁଣି ଖଡ଼ଗେ କହିଲେ, ଆପଣ ବାହାରକୁ ରାଗ ଦେଖାନ୍ତି ନାହିଁ, ଭିତରେ ଭିତରେ ରାଗନ୍ତି।

ଖଡ଼ଗେଙ୍କ ଉତ୍ତର ଶୁଣି ଧନଖଡ଼ଙ୍କ ସମେତ ପୁଣି ଗୃହର ସଦସ୍ୟମାନେ ହସି ଉଠିଲେ।

ସୂଚନାଯୋଗ୍ୟ, ମଣିପୁର ହିଂସା ଆଲୋଚନା ପାଇଁ ନିୟମ ବା ଧାରାକୁ ନେଇ ପ୍ରାୟ ୨ ସପ୍ତାହ ହେବ ‌ରାଜ୍ୟସଭା ଚାଲିବାରେ ବାଧା ସୃଷ୍ଟି ହୋଇ ଆସୁଛି।