ହିମାଳୟ ପାର୍ବତ୍ୟ ଅଞ୍ଚଳ ପାଇଁ ଭାରତୀୟ ସେନାରେ ସାମିଲ ହେବ ଏହି ଯୁଦ୍ଧଯାନ
ନୂଆଦିଲ୍ଲୀ : ସୀମାରେ ଉଭୟ ଚୀନ ଓ ପାକିସ୍ତାନ ପଟୁ ବିପଦ ବଢୁଥିବାରୁ ଭାରତ ନିଜର ସାମରିକ ଶକ୍ତିକୁ ବୃଦ୍ଧି କରିଚାଲିଛି । ବିଶେଷକରି ଚୀନକୁ ଲାଗିଥିବା ହିମାଳୟ ପାର୍ବତ୍ୟାଞ୍ଚଳରେ ଚୀନ ପଟୁ ସର୍ବାଧିକ ବିପଦ ଥିବାରୁ ଉକ୍ତ ପରିବେଶ ଅନୁସାରେ ଯୁଦ୍ଧଯାନ ଓ ଉପକରଣ ସାମିଲ କରୁଛି ଭାରତ ।
Sambad is now on WhatsApp
Join and get latest news updates delivered to you via WhatsApp
ଏପରି ଏକ ଉପକରଣ ହେଉଛି ରାଷ୍ଟ୍ରାୟତ୍ତ ପ୍ରତିରକ୍ଷା ଉଦ୍ୟୋଗ ଅର୍ଡିନାନ୍ସ ଫାକ୍ଟ୍ରି ବୋର୍ଡ ଦ୍ୱାରା ପ୍ରସ୍ତୁତ ଇନଫାଣ୍ଟ୍ରି କମ୍ବାଟ ଭେହିକ୍ଲ (ଆଇସିଭି) । ଆଇସିଭି ଗୁଡ଼ିକ ମୁଖ୍ୟ ଯୁଦ୍ଧ ଟ୍ୟାଙ୍କ ତୁଳନା ହାଲକା ଓ ଉଚ୍ଚ ପାର୍ବତ୍ୟ ଅଞ୍ଚଳକୁ ଏହାକୁ ନେଇହେବ । ଏଣୁ ଏଗୁଡ଼ିକୁ ମିନି ଟ୍ୟାଙ୍କ ବୋଲି ମଧ୍ୟ କୁହାଯାଏ । ମୋଟ ୧୫୬ଟି ଆଇସିଭି ଯୋଗାଣ ପାଇଁ ଭାରତୀୟ ସେନା ଅର୍ଡିନାନ୍ସ ଫାକ୍ଟ୍ରି ବୋର୍ଡକୁ ଅର୍ଡର ଦେଇଛି । ଏସବୁ ମିନି ଟ୍ୟାଙ୍କ ଗୁଡ଼ିକ ଅର୍ଡିନାନ୍ସ ଫାକ୍ଟ୍ରି ବୋର୍ଡର ତେଲେଙ୍ଗାନାର ମେଡକସ୍ଥିତ କାରଖାନାରେ ଉତ୍ପାଦନ କରାଯାଉଛି । ଆସନ୍ତା ବର୍ଷ ସୁଦ୍ଧା ଏଗୁଡ଼ିକର ଯୋଗାଣ ସଂପୂର୍ଣ୍ଣ ହେବ । ଏବେ ଅର୍ଡିନାନ୍ସ ଫାକ୍ଟ୍ରି ବୋର୍ଡ ପକ୍ଷରୁ ରାତିରେ କାର୍ଯ୍ୟକରିପାରୁଥିବା ଆଇସିଭିର ବିକାଶ କରାଯାଉଛି । ଏଥିରେ ଶକ୍ତିଶାଳୀ ମେସିନଗନ ଲାଗିବା ସହ ଛୋଟ ମିସାଇଲ ମଧ୍ୟ ନିକ୍ଷେପ କରିହେବ ।
ଏସବୁ ମିନି ଟ୍ୟାଙ୍କଗୁଡ଼ିକୁ ଭାରତୀୟ ସେନା ଚୀନକୁ ଲାଗିଥିବା ଦୁର୍ଗମ ପାହାଡ଼ିଆ ଅଞ୍ଚଳରେ ମୁତୟନ କରିବାର ସମ୍ଭାବନା ରହିଛି । ଏଗୁଡ଼ିକୁ ଆମେରିକା ନିର୍ମିତ ଚିନୁକ ହେଲିକପ୍ଟର ମାଧ୍ୟମରେ ସହଜରେ ପର୍ବତ ଉପରକୁ ନେଇ ମୁତୟନ କରିହେବ । ଏହା ଦ୍ୱାରା ଭାରତୀୟ ସେନାର ଶକ୍ତି ବୃଦ୍ଧି ହେବା ଆଶା କରାଯାଉଛି ।