ନୂଆଦିଲ୍ଲୀ: ଭାରତୀୟ ବଂଶୋଦ୍ଭବ ଇଞ୍ଜିନିୟର ରାହୁଲ ପାଣ୍ଡେ ୨୦୨୨ରେ ମେଟା/ଫେସବୁକରେ ଲିଡ୍‌ ଇଞ୍ଜିନିୟର ଓ ମ୍ୟାନେଜର ଭାବେ କାର୍ଯ୍ୟ କରୁଥିଲେ। ତାଙ୍କର ବେତନ ଥିଲା ବାର୍ଷିକ ସାଢ଼େ ୬ କୋଟି ଟଙ୍କାରୁ ଅଧିକ। ହେଲେ, ସେହି ଚାକିରି ଛାଡ଼ିବାକୁ ସେ ନେଇଥିବା ନିଷ୍ପତ୍ତି ଏବେ ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଛି। ତେବେ, ନିକଟରେ ‘ବିଜିନେସ୍‌ ଇନସାଇଡର’କୁ ଏକ ସାକ୍ଷାତକାର ଦେବା ଅବସରରେ ରାହୁଲ ପାଣ୍ଡେ ଉଚ୍ଚ ବେତନର ଚାକିରି ଛାଡିବା ପଛର ମୁଖ୍ୟ କାରଣ ବିଷୟରେ ପ୍ରକାଶ କରିଛନ୍ତି।

Advertisment

ଆମେରିକାର କାଲିଫର୍ଣ୍ଣିଆରେ ଫେସବୁକରେ କାମ କରିବାର ଅଭିଜ୍ଞତା ବିଷୟରେ ରାହୁଲ କହିଛନ୍ତି, ‘କାମ କରିବା ସମୟରେ ମୁଁ ଚିନ୍ତାରେ ପଡ଼ିଥିଲି।‘ ଲିଙ୍କ୍‌ଡଇନ୍‌ରେ କରିଥିବା ଏକ ପୋଷ୍ଟରେ ସେ କହିଛନ୍ତି, ‘୧୦୦ ଆମେରିକୀୟ ଡଲାର ବିଲ୍‌ ଗଣିବା ପାଇଁ ମୋର ଯାତ୍ରା ଏତେ ସହଜ ନଥିଲା। ବାସ୍ତବରେ, ଫେସବୁକରେ ଯୋଗ ଦେବାର ପ୍ରଥମ ଛଅ ମାସ ମୁଁ ଅତ୍ୟନ୍ତ ଚିନ୍ତିତ ଥିଲି। ଜଣେ ବରିଷ୍ଠ ଇଞ୍ଜିନିୟର ଭାବରେ, ମୁଁ ଅନୁଭବ କଲି ଯେ ମୋର ଇମ୍ପୋଷ୍ଟର ସିଣ୍ଡ୍ରୋମ ଅଛି, ମୋତେ କମ୍ପାନି ସଂସ୍କୃତି ଏବଂ ଟୁଲିଂ ସହିତ ଖାପ ଖୁଆଇବା ପାଇଁ ସଂଘର୍ଷ କରିବାକୁ ପଡିବ।’

‘କାମରେ କାହାଠାରୁ ସାହାଯ୍ୟ ମାଗିବାରେ ଦ୍ୱିଧା ଥିଲା। ଜଣେ ବରିଷ୍ଠ ଇଞ୍ଜିନିୟର ହେବାକୁ ସକ୍ଷମ ନଥିବା ବ୍ୟକ୍ତିଙ୍କୁ କମ୍ପାନି ‘ଲାତ’ ମାରିବ ବୋଲି ମନେ ହେଉଥିଲା। ସେ କହିଛନ୍ତି ଯେ କମ୍ପାନିରେ ଯୋଗ ଦେବା ପରେ ଫେସବୁକ ମଧ୍ୟ ସଂଘର୍ଷ କରିବା ଆରମ୍ଭ କରିଥିଲା, ଏହାର ସେୟାର ମଧ୍ୟ ହ୍ରାସ ପାଇବାରେ ଲାଗିଥିଲା। ମୁଁ କେବଳ ଏକ ବର୍ଷ ପାଇଁ କମ୍ପାନିରେ ଥିଲି, ତେଣୁ ମୁଁ ଅନୁଭବ କଲି ଯେ ଏତେ ବଡ଼ ଜାହାଜ (ଫେସବୁକ)ରୁ ଡେଇଁବା ବହୁତ ଶୀଘ୍ର ହେବ। ଏହା ବଦଳରେ ମୁଁ ମୋ ପ୍ରଦର୍ଶନ ଉପରେ ଧ୍ୟାନ ଦେବା ଆରମ୍ଭ କଲି’ ବୋଲି ରାହୁଲ ବିଜନେସ୍‌ ଇନସାଇଡରକୁ ନିଜ ସାକ୍ଷାତକାରରେ କହିଛନ୍ତି।

ମାତ୍ର ଦୁଇ ବର୍ଷ ମଧ୍ୟରେ ରାହୁଲ ପାଣ୍ଡେ ନିଜର ପ୍ରତିଭା ଦେଖାଇବା ଆରମ୍ଭ କରିଥିଲେ ଏବଂ ଫେସବୁକରେ ସମସ୍ତେ ଗ୍ରହଣ କରିଥିବା ଏକ ଟୁଲ୍‌ ତିଆରି କରିବାରେ ସଫଳ ହୋଇଥିଲେ। ରାହୁଲଙ୍କ ଦ୍ୱାରା ବିକଶିତ ଏହି ଟୁଲ୍‌ ବା ଉପକରଣ ଇଞ୍ଜିନିୟରମାନଙ୍କ ପାଇଁ ବହୁତ ସମୟ ସଞ୍ଚୟ କରିଥିଲା। ଏହାପରେ ରାହୁଲ ପାଣ୍ଡେଙ୍କୁ ପଦୋନ୍ନତି ମିଳିଥିଲା ଏବଂ ତାଙ୍କ ମୂଳ ଦରମା ବ୍ୟତୀତ ତାଙ୍କୁ ପାଖାପାଖି ୨ କୋଟି ଟଙ୍କାର ଇକ୍ୱିଟି ମିଳିଥିଲା। ତେବେ, କୋଭିଡ୍‌-୧୯ ମହାମାରୀ କାରଣରୁ ପାଣ୍ଡେ ବିକଳ୍ପ ଖୋଜିବା ଆରମ୍ଭ କରିଥିଲେ।

‘ମୋର ଶେଷ ବର୍ଷ ପାଇଁ, ମୁଁ ମ୍ୟାନେଜର ଭୂମିକାରେ ପରିବର୍ତ୍ତନ କରିଥିଲି ଏବଂ ସେହି ସଂସ୍ଥାରେ ତିନି ବର୍ଷ ରହିବା ପରେ ମୋର ଟିମ୍‌ ପରିବର୍ତ୍ତନ କରିଥିଲି। ୨୦୨୧ ଶେଷ ହେବା ପରେ ମୁଁ ମେଟା ବାହାରେ ଦୁନିଆକୁ ଅନୁସନ୍ଧାନ କରିବା ଆରମ୍ଭ କଲି। ଟେକ୍‌ନୋଲୋଜି କ୍ଷେତ୍ରରେ ପ୍ରାୟ ଏକ ଦଶନ୍ଧି କାର୍ଯ୍ୟ କଲାପରେ ମୁଁ କିଛି ମାତ୍ରାରେ ଆର୍ଥିକ ସ୍ୱାଧୀନତା ହାସଲ କରିଥିଲି ଏବଂ ଅନୁଭବ କରିଥିଲି ଯେ ମୁଁ ଇଞ୍ଜିନିୟରିଂ ବ୍ୟତୀତ ଆହୁରି ଅନେକ ବହୁତ କିଛି ଶିଖିପାରିବି।’