ବିଜେପିରେ ଖୁସି ନାହାନ୍ତି ମୁଣ୍ଡେ ପରିବାର! ଶରଦ ପାୱାରଙ୍କ ସହ ବୈଠକକୁ ନେଇ ଚର୍ଚ୍ଚା
ମୁମ୍ବାଇ: ବିଜେପିର ଭେଟେରାନ ନେତା ଗୋପୀନାଥ ମୁଣ୍ଡେଙ୍କ ପରିବାର ଏବେ ବିଜେପିର କାର୍ଯ୍ୟକଳାପକୁ ନେଇ ଖୁସି ନାହାନ୍ତି କି? କିଛି ଏଭଳି ପ୍ରଶ୍ନ ଏବେ ମହାରାଷ୍ଟ୍ର ରାଜନୀତିକୁ ସରଗରମ କରିଛି | ବାସ୍ତବରେ ଦିବଙ୍ଗତ ଗୋପୀନାଥ ମୁଣ୍ଡେଙ୍କ ଦୁଇ ଝିଅ ପଙ୍କଜା ଏବଂ ପ୍ରୀତମ ମୁଣ୍ଡେ ଆସନ୍ତାକାଲି ଏକ ଚକ୍ଷୁ ଚିକିତ୍ସାଳୟର କାର୍ଯ୍ୟକ୍ରମରେ ଏନସିପି ମୁଖ୍ୟ ଶରଦ ପାୱାରଙ୍କ ସହ ଯୋଗ ଦେବେ | ତେବେ ଦୁଇ ଭଉଣୀଙ୍କ ବ୍ୟତୀତ ଅନ୍ୟ କୌଣସି ବିଜେପି ନେତା ଏହି କାର୍ଯ୍ୟକ୍ରମରେ ଯୋଗଦେଉନଥିବାରୁ ଦୁଇ ଭଉଣୀଙ୍କ ଉପସ୍ଥିତିକୁ ନେଇ ଚର୍ଚ୍ଚା ଜୋର ଧରିଛି | ଏହି କାର୍ଯ୍ୟକ୍ରମରେ ଶରଦ ପାୱାରଙ୍କ ବ୍ୟତୀତ ମହାରାଷ୍ଟ୍ର ବିକାଶ ଆଘାଡି ସରକାରଙ୍କ ଅନେକ ମନ୍ତ୍ରୀ ଯୋଗଦେବେ। କହିବାକୁ ଗଲେ ପଙ୍କଜା ଏବଂ ପ୍ରୀତମ ମୁଣ୍ଡେ ଦୀର୍ଘ ଦିନ ଧରି ବିଜେପିରେ ଅବହେଳିତ ଅନୁଭବ କରୁଛନ୍ତି। ପ୍ରୀତମ ମୁଣ୍ଡେ ସାଂସଦ ଥିବାବେଳେ ପଙ୍କଜା ମୁଣ୍ଡେ ବିଜେପିର ଜାତୀୟ ସଚିବ ଦାୟିତ୍ୱରେ ଅଛନ୍ତି |
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ଗୁରୁବାର ଦିନ ଶରଦ ପାୱାର ପ୍ରଭାଦେବିର ଏକ ଅଡିଟୋରିୟମରେ ରଘୁନାଥ ନେତ୍ରାଳୟ ଉଦଘାଟନ କରିବାର କାର୍ଯ୍ୟକ୍ରମ ରହିଛି। ଏହି କାର୍ଯ୍ୟକ୍ରମକୁ ପଙ୍କଜା ଏବଂ ପ୍ରୀତମ ମୁଣ୍ଡେଙ୍କୁ ନିମନ୍ତ୍ରଣ କରାଯାଇଛି | ଏହି କାର୍ଯ୍ୟକ୍ରମରେ ଆଦିତ୍ୟ ଠାକରେ, ଧନଞ୍ଜୟ ମୁଣ୍ଡେ ମଧ୍ୟ ଯୋଗଦେବାକୁ ଯାଉଛନ୍ତି। ଏଥିରେ କଂଗ୍ରେସ ନେତା ତଥା ରାଜସ୍ୱ ମନ୍ତ୍ରୀ ବାଲାସାହେବ ଥୋରାଟ ଓ ମନ୍ତ୍ରୀ ଅମିତ ଦେଶମୁଖ ମଧ୍ୟ ଉପସ୍ଥିତ ରହିବେ।
ସୂଚନା ଥାଉ କି ଯେ ପଙ୍କଜା ଏବଂ ପ୍ରୀତମ ମୁଣ୍ଡେ କିଛି ଦିନ ଧରି ବିଜେପିରେ ଅବହେଳିତ ଅନୁଭବ କରୁଛନ୍ତି। ମହାରାଷ୍ଟ୍ର ବିଜେପି ନେତୃତ୍ୱ ସହ ତାଙ୍କର ମତଭେଦ ଥିବା କୁହାଯାଉଛି। ଗତ ବର୍ଷ କେନ୍ଦ୍ର କ୍ୟାବିନେଟର ସମ୍ପ୍ରସାରଣ ହୋଇଥିଲା ଯେଉଁଥିରେ ପ୍ରୀତମ ମୁଣ୍ଡେଙ୍କୁ ମନ୍ତ୍ରୀ ପଦ ମିଳିବା ନେଇ ଆଶା କରାଯାଉଥିଲେ ବି ଏହା ହୋଇନଥିଲା | ଆଉ ଏହା ଘଟିବା ପରେ ଦୁହେଁ ମୁମ୍ବାଇରେ ଶକ୍ତି ପ୍ରଦର୍ଶନ କରିଥିଲେ |