ବାଂଲାଦେଶରେ ସଂଖ୍ୟାଲଘୁ ସଂପ୍ରଦାୟ ହିଂସାର ଶିକାର: ସାଧୁସନ୍ଥଙ୍କ ବିରୋଧରେ ଦେଶଦ୍ରୋହ ମାମଲା

ଢାକା: ବାଂଲାଦେଶର ଅନ୍ତରୀଣ ସରକାରର କାର୍ଯ୍ୟକଳାପ ଓ ଭୁଲ ପଦକ୍ଷେପକୁ ବିଶ୍ଳେଷଣ କରୁଥିବା ଏକ ରିପୋର୍ଟ ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସଙ୍କ ନେତୃତ୍ୱାଧୀନ ଶାସନକୁ ପଦାରେ ପକାଇଛି। ଏଥିରେ ଉଲ୍ଲେଖ କରାଯାଇଛି ଯେ ସେନା ସମର୍ଥିତ ଶାସନର ପ୍ରଥମ ୧୦୦ ଦିନ ମଧ୍ୟରେ ‘ଧାର୍ମିକ ଓ ଜାତିଗତ ସଂଖ୍ୟାଲଘୁ ତଥା ଅବହେଳିତ ସମ୍ପ୍ରଦାୟ’ ହିଂସାର ଶିକାର ହୋଇଛନ୍ତି। ବର୍ଲିନସ୍ଥିତ ନାଗରିକ ସମାଜ ସଂଗଠନର ବାଂଲାଦେଶ ଶାଖା ଟ୍ରାନ୍ସପେରେନ୍ସି ଇଣ୍ଟର୍‌ନ୍ୟାସନାଲ୍‌ ବାଂଲାଦେଶ (ଟିଆଇବି)ର ରିପୋର୍ଟରେ ଏହା ମଧ୍ୟ ଉଲ୍ଲେଖ କରାଯାଇଛି ଯେ ହିଂସାତ୍ମକ ବିକ୍ଷୋଭ ପ୍ରଧାନମନ୍ତ୍ରୀ ଶେଖ ହସିନାଙ୍କୁ ଅଗଷ୍ଟ ୫ ତାରିଖରେ ପଳାୟନ କରିବାକୁ ବାଧ୍ୟ କରିବା ପରେ ଭିନ୍ନମତ ରଖୁଥିବା ଲୋକମାନେ ହିଂସାର ସମ୍ମୁଖୀନ ହୋଇଛନ୍ତି। ତେବେ ବାଂଲାଦେଶର ହିନ୍ଦୁମାନଙ୍କ ବିରୋଧରେ ହିଂସା ଖବରକୁ ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସ ଖଣ୍ଡନ କରିଥିଲେ।

ସାଧୁସନ୍ଥଙ୍କ ବିରୋଧରେ ଦେଶଦ୍ରୋହ ମାମଲା
୧୦୦ ଦିନର ରିପୋର୍ଟରେ ୟୁନୁସ୍ ସରକାରଙ୍କ ପର୍ଦ୍ଦାଫାସ

ଐକ୍ୟ ପରିଷଦ ଦ୍ବାରା ପ୍ରକାଶିତ ରିପୋର୍ଟ ଅନୁଯାୟୀ, ‘ଅଗଷ୍ଟ ୫ରୁ ୨୦ ମଧ୍ୟରେ ସାମ୍ପ୍ରଦାୟିକ ହିଂସାର ୨୦୧୦ଟି ଘଟଣା ଘଟିଛି’ ଯାହାଫଳରେ ‘ଏକ ସଂଖ୍ୟାଲଘୁ ସମ୍ପ୍ରଦାୟର ୯ ଜଣଙ୍କ ମୃତ୍ୟୁ ଘଟିଛି’। ଐକ୍ୟ ପରିଷଦ ହେଉଛି ମାନବାଧିକାର ସ୍ୱେଚ୍ଛାସେବୀ ସଂଗଠନ ବାଂଲାଦେଶ ହିନ୍ଦୁ-ବୌଦ୍ଧ-ଖ୍ରୀଷ୍ଟିଆନ ଏକତା ପରିଷଦର ଏକ ସଂକ୍ଷିପ୍ତ ରୂପ। ବାଂଲାଦେଶରେ ଧର୍ମଭିତ୍ତିକ ରାଜନୀତିର ପ୍ରଭାବ ବୃଦ୍ଧି ପାଉଛି ଏବଂ ଅକ୍ଟୋବରରେ ଦୁର୍ଗାପୂଜା ଉତ୍ସବ ସମୟରେ ଉଠାଯାଇଥିବା ସୁରକ୍ଷା ଚିନ୍ତାକୁ ମଧ୍ୟ ଟିଆଇବି ରିପୋର୍ଟରେ ଉଲ୍ଲେଖ କରାଯାଇଛି। ମୁସଲମାନ ବହୁଳ ଦେଶରେ ସଂଖ୍ୟାଲଘୁଙ୍କ ପାଇଁ ସୁରକ୍ଷା ଗ୍ୟାରେଣ୍ଟି ଦାବିରେ ଆନ୍ଦୋଳନର ନେତୃତ୍ୱ ନେଉଥିବା ସାଧୁଙ୍କ ସାହସ ଭାଙ୍ଗିବା ଉଦ୍ଦେଶ୍ୟରେ ପୂର୍ବ ସହର ଚଟ୍ଟଗ୍ରାମରେ କେତେକ ହିନ୍ଦୁ ସାଧୁସନ୍ଥ ଓ ଅନ୍ୟ ୧୮ ଜଣ ହିନ୍ଦୁଙ୍କ ବିରୋଧରେ ଗୈରିକ ପତାକା ନେଇ ଦେଶଦ୍ରୋହ ମାମଲା ରୁଜୁ ହୋଇଛି। ନଭେମ୍ବର ୧୮ର ରିପୋର୍ଟରେ ମହମ୍ମଦ ୟୁନୁସଙ୍କ ନେତୃତ୍ୱାଧୀନ ସରକାରଙ୍କୁ ଧାର୍ମିକ ସଂଖ୍ୟାଲଘୁ ଓ ଅସନ୍ତୁଷ୍ଟଙ୍କ ବିରୋଧରେ ହିଂସା ମାମଲାରେ ପ୍ରଭାବଶାଳୀ ତଦନ୍ତର ଅଭାବ ପାଇଁ ସମାଲୋଚନା କରାଯାଇଥିଲା।

ମହମ୍ମଦ ୟୁନୁସ୍ ସରକାର ସଂଖ୍ୟାଲଘୁଙ୍କ ବିରୋଧରେ ହିଂସା ଅଭିଯୋଗର ତଦନ୍ତ କରି ନ ଥିଲେ। ଶେଖ୍ ହସିନା ଶାସନର ପତନ ପରେ ବିଶୃଙ୍ଖଳାର ପ୍ରଥମ ତିନି ଦିନ ମଧ୍ୟରେ ହିନ୍ଦୁଙ୍କ ସମେତ ସଂଖ୍ୟାଲଘୁ ସମ୍ପ୍ରଦାୟର ୫ ଜଣଙ୍କୁ ହତ୍ୟା ସମେତ ଅତି କମ୍‌ରେ ୨୦୫ଟି ଆକ୍ରମଣ ହୋଇଥିଲା। ବାଂଲାଦେଶ ହିନ୍ଦୁ-ବୌଦ୍ଧ-ଖ୍ରୀଷ୍ଟିଆନ ଏକତା ପରିଷଦ ଏବଂ ବାଂଲାଦେଶ ପୂଜା ଉଦ୍‌ଯାପନ ପରିଷଦ ଅନ୍ତରୀଣ ସରକାରଙ୍କ ମୁଖ୍ୟ ମହମ୍ମଦ ୟୁନୁସଙ୍କ ଉଦ୍ଦେଶ୍ୟରେ ଏକ ଖୋଲା ଚିଠିରେ ଏହି ତଥ୍ୟ ପ୍ରଦାନ କରିଛନ୍ତି। ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଆମେରିକାର ନବନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ହିନ୍ଦୁମାନଙ୍କ ଉପରେ ଆକ୍ରମଣକୁ ସମାଲୋଚନା କରିବା ସହ ସେମାନଙ୍କୁ ସୁରକ୍ଷା ଦେବାର ଆବଶ୍ୟକତା ବିଷୟରେ କହିଛନ୍ତି।