ଇସ୍ତଫା ଦେଲେ କେନ୍ଦ୍ର ବୈଦେଶିକ ବ୍ୟାପାର ରାଷ୍ଟ୍ରମନ୍ତ୍ରୀ ଏମ.ଜେ.ଆକବର
ନୂଆଦିଲ୍ଲୀ : ମି-ଟୁ ଅଭିଯୋଗର ସମ୍ମୁଖୀନ ହୋଇଥିବା କେନ୍ଦ୍ର ବୈଦେଶିକ ବ୍ୟାପାର ରାଷ୍ଟ୍ରମନ୍ତ୍ରୀ ଏମ.ଜେ.ଆକବର ଆଜି ଇସ୍ତଫା ଦେଇଛନ୍ତି । ତାଙ୍କ ବିରୋଧରେ ଏକାଧିକ ମହିଳା ଯୌନ ନିର୍ଯ୍ୟାତନା ଅଭିଯୋଗ କରିଥିବାରୁ କେନ୍ଦ୍ର ସରକାରଙ୍କ ଉପରେ ଚାପ ବଢିଚାଲିଥିଲା ।
ନିଜର ଇସ୍ତଫା ସଂପର୍କରେ ଏକ ବୟାନ ଜାରି କରି ସେ କହିଛନ୍ତି ଯେ ତାଙ୍କ ବିରୋଧରେ ଆସିଥିବା ମିଥ୍ୟା ଅଭିଯୋଗ ବିରୋଧରେ ନ୍ୟାୟ ପାଇବା ପାଇଁ ସେ ନିଜେ ଲଢେଇ କରିବାକୁ ନିଷ୍ପତ୍ତି ନେଇଛନ୍ତି । ଏ ପରିପ୍ରେକ୍ଷୀରେ ସେ ନିଜର ସରକାରୀ ଦାୟିତ୍ୱରେ ରହିବା ଉଚିତ ମନେକରୁନାହାନ୍ତି । ଏଣୁ ସେ କେନ୍ଦ୍ର ବୈଦେଶିକ ବ୍ୟାପାର ରାଷ୍ଟ୍ରମନ୍ତ୍ରୀ ପଦରୁ ଇସ୍ତଫା ଦେଉଛନ୍ତି । ଦେଶର ସେବା କରିବାକୁ ସୁଯୋଗ ଦେଇଥିବାରୁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ କେନ୍ଦ୍ର ବୈଦେଶିକ ବ୍ୟାପାର ମନ୍ତ୍ରୀ ସୁଷମା ସ୍ୱରାଜଙ୍କୁ କୃତଜ୍ଞତା ଜଣାଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଆକବରଙ୍କ ବିରୋଧରେ ସର୍ବପ୍ରଥମେ ଯୌନ ନିର୍ଯ୍ୟାତନା ଅଭିଯୋଗ ଲଗାଇଥିବା ସାମ୍ବାଦିକା ପ୍ରିୟା ରମାନିଙ୍କ ବିରୋଧରେ ସେ ଏକ ମାନହାନୀ ମକଦ୍ଦମା କରିଛନ୍ତି । ଆସନ୍ତା କାଲି ଏହି ମାମଲାର ଶୁଣାଣି ଆରମ୍ଭ ହେବ । ଆକବର ଇସ୍ତଫା ଦେବା ପରେ ପ୍ରିୟା ରମାନି ଟ୍ଵିଟ କରି କହିଛନ୍ତି ଯେ ଏହି ଇସ୍ତଫା ପରେ ତାଙ୍କ ଅଭିଯୋଗ ସତ ବୋଲି ପ୍ରମାଣିତ ହୋଇଛି ।