ଦଳର କର୍ମୀଙ୍କୁ ବିବାହ କଲେ ବିଧାୟିକା, ଅତିଥି ଭାବେ ଯୋଗ ଦେଲେ ମୁଖ୍ୟମନ୍ତ୍ରୀଙ୍କ ପତ୍ନୀ
ଚଣ୍ଡୀଗଡ଼: ପଞ୍ଜାବର ସଙ୍ଗରୁରରୁ ବିଧାୟିକା ଥିବା ନରିନ୍ଦର କୌର ଆଜି ଆମ ଆଦମୀ ପାର୍ଟିର ଜଣେ କର୍ମୀ ମନଦୀପ ସିଂଙ୍କୁ ବିବାହ କରିଛନ୍ତି | ଏହି ବିବାହ ସମାରୋହ ପଟିଆଲାର ରୋରେୱାଲ ଗ୍ରାମରେ ଅନୁଷ୍ଠିତ ହୋଇଥିଲା। ସମ୍ପର୍କୀୟଙ୍କ ଉପସ୍ଥିତିରେ ଗାଁର ଗୁରୁଦ୍ୱାରରେ ଏହି ବିବାହ ସମାରୋହ ଅନୁଷ୍ଠିତ ହୋଇଥିଲା। ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କ ପତ୍ନୀ ଡକ୍ଟର ଗୁରୁପ୍ରୀତ କୌର ଏହି ବିବାହରେ ଅତିଥି ଭାବରେ ଯୋଗ ଦେଇଥିଲେ | ସୂଚନା ଥାଉ କି ଯେ ନରିନ୍ଦର ସର୍ବକନିଷ୍ଠ (୨୮ ବର୍ଷ) ବିଧାୟିକା ହୋଇଥିବାବେଳେ ସେ ୨୦୨୨ ପଞ୍ଜାବ ବିଧାନସଭା ନିର୍ବାଚନରେ ସଙ୍ଗରୁର ଆସନ ଜିତିଥିଲେ।
Sambad is now on WhatsApp
Join and get latest news updates delivered to you via WhatsApp
ସେ ତାଙ୍କର ନିକଟତମ ପ୍ରତିଦ୍ୱନ୍ଦ୍ୱୀ ବିଜୟ ଇନ୍ଦର ସିଙ୍ଗଲାଙ୍କୁ ୩୮୦୦୦ ଭୋଟ ବ୍ୟବଧାନରେ ପରାସ୍ତ କରିଛନ୍ତି। ବିଜୟ ଇନ୍ଦର ମଧ୍ୟ ପୂର୍ବ କଂଗ୍ରେସ ସରକାରରେ କ୍ୟାବିନେଟ ମନ୍ତ୍ରୀ ଥିଲେ, କିନ୍ତୁ ନରିନ୍ଦର ତାଙ୍କୁ ପରାସ୍ତ କରି ଏହି ଆସନକୁ କବଜା କରିଥିଲେ। ମନଦୀପଙ୍କ ବାବଦରେ କହିବାକୁ ଗଲେ ପଞ୍ଜାବର ଆପର ସେ ଜଣେ ସକ୍ରିୟ କର୍ମୀ | ସେ ସଙ୍ଗରୁର ବିଧାନସଭାରେ ମିଡିଆ ଇନଚାର୍ଜ ଭାବରେ କାମ କରିଥିଲେ ।
ଉଲ୍ଲେଖ ଥାଉ କି ନରିନ୍ଦର ପଞ୍ଜାବ ବିଶ୍ୱବିଦ୍ୟାଳୟ ପଟିଆଲାରୁ ଏଲଏଲବି ପଢ଼ିଥିବାବେଳେ ସେ ମଧ୍ୟ ଦୁଇଥର ଆପର ଜିଲ୍ଲା ଯୁବ ସଭାପତି ରହିଛନ୍ତି। ୨୦୧୪ ଲୋକସଭା ନିର୍ବାଚନରେ, ଯେତେବେଳେ ସେ ନିଜ ଗାଁରେ ଆପ ବୁଥ୍ ସ୍ଥାପନ କରିଥିଲେ ସେତେବେଳେ ଲୋକଲୋଚନକୁ ଆସିଥିଲେ। ଏହା ପରେ ସେ ଭଗବନ୍ତ ମାନଙ୍କ ମାଧ୍ୟମରେ ରାଜନୀତିରେ ପ୍ରବେଶ କରିଥିଲେ। ସୂଚନାଯୋଗ୍ୟ ଯେ ପଞ୍ଜାବରେ ଆପ କ୍ଷମତାକୁ ଆସିବାର କିଛି ମାସ ପରେ ମୁଖ୍ୟମନ୍ତ୍ରୀ ଭଗବନ୍ତ ମାନ ମଧ୍ୟ ଦ୍ୱିତୀୟ ବିବାହ କରି ଚର୍ଚ୍ଚାରେ ଆସିଥିଲେ। ମାନ ୭ ଜୁଲାଇରେ ଡକ୍ଟର ଗୁରୁପ୍ରୀତ କୌରଙ୍କୁ ବିବାହ କରିଥିଲେ।