ଲୋକଙ୍କ ପାଖରେ ପହଂଚୁଛନ୍ତି ନା ନାହିଁ କର୍ମୀ, ମୋବାଇଲ ଆପରୁ ଜାଣିବ ବିଜେପି
କୋଲକାତା: ୨୦୨୩ ପଞ୍ଚାୟତ ନିର୍ବାଚନ ଏବଂ ୨୦୨୪ ଲୋକସଭା ନିର୍ବାଚନକୁ ଦୃଷ୍ଟିରେ ରଖି ପଶ୍ଚିମବଙ୍ଗରେ ଏହାର ଜିଲ୍ଲା ୟୁନିଟମାନଙ୍କ ପାଇଁ ବିଜେପି ଏକ ମୋବାଇଲ୍ ଆପ୍ ବିକାଶ କରୁଛି। ଦଳର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା କିଛି ଦିନ ପୂର୍ବରୁ କୋଲକାତାରେ ରୁଦ୍ଧ ଦ୍ୱାର ବୈଠକ କରି ପଶ୍ଚିମବଙ୍ଗର ନେତାମାନଙ୍କ ସହ ଏବାବଦରେ ଆଲୋଚନା କରିଥିଲେ | କୁହାଯାଉଛି ଯେ ଏହି ଆପରେ ଜିପିଏସ୍ ବ୍ୟବହାର କରିବାର ସମ୍ଭାବନା ରହିଛି । ଯଦିଓ ବିଜେପି ସବୁ ରାଜ୍ୟରେ ସୋସିଆଲ ମିଡିଆ ଆପ୍ ଏବଂ ଗୁଗୁଲ୍ ମ୍ୟାପ୍ ଲୋକେସନକୁ ବହୁଳ ଭାବରେ ବ୍ୟବହାର କରୁଛି, ଏହା ପ୍ରଥମ ଥର ପାଇଁ ପଶ୍ଚିମବଙ୍ଗର କର୍ମୀମାନଙ୍କ ପାଇଁ ଏକ ସ୍ୱତନ୍ତ୍ର ଆପ୍ ପ୍ରସ୍ତୁତ କରାଯାଉଛି | ଏହା ପୂର୍ବରୁ ଉତ୍ତରପ୍ରଦେଶରେ ମଧ୍ୟ ସମାନ ଆପ୍ ବ୍ୟବହୃତ ହୋଇଥିଲା |
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ ଜୁନ ୯ରେ ନଡ୍ଡା ପଶ୍ଚିମବଙ୍ଗ ଗସ୍ତରେ ଯାଇ ୨୨ଟି ଜିଲ୍ଲାର ମଣ୍ଡଳ ସଭାପତିଙ୍କ ସହ ଆଲୋଚନା କରିଥିଲେ | ଏହି ବୈଠକରେ ଉପସ୍ଥିତ ନେତାମାନେ କହିଛନ୍ତି ଯେ ଏହି ଆପକୁ ପ୍ରତିଦିନ ମନିଟରିଂ ପାଇଁ ବ୍ୟବହାର କରାଯିବ। କର୍ମୀମାନେ କେତେ ଘର ପରିଦର୍ଶନ କରୁଛନ୍ତି ଏହା ଦର୍ଶାଇବ | ସେହିପରି କର୍ମୀ ଏବଂ ନେତାମାନଙ୍କୁ ଆପରେ ସବିଶେଷ ତଥ୍ୟ ଦେବାକୁ ପଡ଼ିବ | ଯେଉଁଥିରେ ସେମାନେ କ’ଣ କରିଛନ୍ତି ଏବଂ କେତେ ଭୋଟରଙ୍କ ସହିତ ଯୋଗାଯୋଗ କରିଛନ୍ତି, ସେବାବଦରେ ତଥ୍ୟ ଦେବେ |
ସେହିପରି ନଡ୍ଡା କର୍ମୀମାନଙ୍କୁ ନିର୍ଦ୍ଦେଶ ଦେଇଛନ୍ତି ଯେ ସମସ୍ତ ବିଧାୟକ ଏବଂ ସାଂସଦମାନେ ଘର ଘର ଯାଇ ଲୋକଙ୍କୁ ଭେଟିବା ଉଚିତ | ସୂଚନା ଥାଉ କି ୨୦୨୧ରେ ପଶ୍ଚିମବଙ୍ଗର ୨୯୪ ବିଧାନସଭା ଆସନରୁ ବିଜେପି ୭୭ଟି ଜିତିଥିବାବେଳେ ତୃଣମୂଳ କଂଗ୍ରେସ (ଟିଏମସି) ୨୧୩ଟି ଆସନ ଜିତିଥିଲା । ପାଞ୍ଚଜଣ ବିଧାୟକ ଟିଏମସିରେ ଯୋଗଦେବା ପରେ ବିଜେପିର ଆସନ ସଂଖ୍ୟା ୭୦କୁ ଖସି ଆସିଛି, ତେବେ ଏହି ବିଧାୟକମାନେ ଦଳରୁ ଇସ୍ତଫା ଦେଇନାହାଁନ୍ତି।