ତୃତୀୟ କରୋନା ଟିକା ଭାବେ ବ୍ରିଟେନରେ ବ୍ୟବହାର ଅନୁମତି ପାଇଲା ମଡର୍ଣ୍ଣା

ଲଣ୍ଡନ: ମଡର୍ଣ୍ଣା ଟିକାକୁ ଜରୁରୀ ବ୍ୟବହାର ପାଇଁ ଅନୁମତି ଦେଇଛି ଇଂଲଣ୍ଡ । ଫାଇଜର, ଅକ୍ସଫୋର୍ଡ ପରେ ବ୍ରିଟେନରେ ତୃତୀୟ କରୋନା ଟିକା ଭାବେ ମଡର୍ଣ୍ଣାକୁ ଅନୁମତି ମିଳିଛି । କରୋନାର ନୂଆ ଷ୍ଟ୍ରେନ୍ ଇଂଲଣ୍ଡରେ ଆତଙ୍କ ଖେଳାଇ ଦେଇଥିବା ବେଳେ ବ୍ୟାପକ ଟିକାକରଣ ଉପରେ ଗୁରୁତ୍ୱ ଦେଇଛନ୍ତି ସରକାର । ମଡର୍ଣ୍ଣା ଟିକାର ୭୦ ଲକ୍ଷ ଡୋଜ୍ ଯୋଗାଇ ଦେବା ପାଇଁ ପୂର୍ବରୁ କଂପାନୀକୁ ଅର୍ଡର ଦେଇଥିଲେ ବ୍ରିିଟେନ୍ ସରକାର । ଇଂଲଣ୍ଡରେ ପ୍ରାୟ ୧୫ ଲକ୍ଷ ଲୋକଙ୍କୁ ଫାଇଜର ଟିକାର ଗୋଟିଏ ଡୋଜ୍ ଦିଆଯାଇଛି ।

ତେବେ ଫାଇଜର ଟିକା ପାଇଁ ମାଇନସ୍ ୭୦ ଡିଗ୍ରି ତାପମାତ୍ରା ଆବଶ୍ୟକ ହେଉଥିବାରୁ ବ୍ୟାପକ ଟିକାକରଣରେ ସମସ୍ୟା ସୃଷ୍ଟି ହେଉଛି । ସାଧାରଣ ଫ୍ରିଜ୍ ତାପମାତ୍ରାରେ ଅକ୍ସଫୋର୍ଡ-ଆଷ୍ଟ୍ରାଜେନେକା ଟିକାକୁ ଗଚ୍ଛିତ ରଖିବା ଓ ପରିବହନ ସହଜ ହୋଇଥିବାରୁ ଏହା ଉପରେ ନିର୍ଭରଶୀଳତା ବଢ଼ିଯାଇଛି । ତେଣୁ ତୃତୀୟ ଟିକା ଭାବେ ମଡର୍ଣ୍ଣାକୁ ବ୍ୟବହାର କରିବା ପାଇଁ ଅନୁମତି ଦେଇଛି ବ୍ରିିଟେନ୍ ।

ଆମେରିକୀୟ  କଂପାନୀ ମଡର୍ଣ୍ଣା ପ୍ରସ୍ତୁତ କରିଥିବା କରୋନା ଟିକାକୁ ୩୦ ହଜାର ଲୋକଙ୍କ ଉପରେ ପରୀକ୍ଷଣ କରାଯାଇଛି । କୋଭିଡ ମୁକାବିଲାରେ ଏହା ୯୪ରୁ ୯୫ ପ୍ରତିଶତ ଫଳପ୍ରଦ ବୋଲି ରିପୋର୍ଟ ପ୍ରକାଶ ପାଇଛି । ଦ୍ୱିତୀୟ ଡୋଜର ୧୪ ଦିନ ପରେ ଏହା ଶରୀରରେ ଆଂଟିବଡି ବା ରୋଗ ପ୍ରତିରୋଧକ ଶକ୍ତି ତିଆରି କରିଥାଏ । ଅକ୍ସଫୋର୍ଡ ଟିକା ଭଳି ମଡର୍ଣ୍ଣା ଟିକା, ସାଧାରଣ ଫ୍ରିଜ୍ ତାପମାତ୍ରାରେ ଗଚ୍ଛିତ ଓ ପରିବହନ ସାପେକ୍ଷ ହୋଇଥିବାରୁ ଏହି ଟିକାକୁ ଗୁରୁତ୍ୱ ଦେଉଛି ବ୍ରିଟେନ୍ ।