ଏଆଇ ଅନ୍ୟ ଟେକନଲୋଜୀଠାରୁ ଅଲଗା, ସତର୍କ ରହିବା ଜରୁରୀ : ମୋଦୀ

ପ୍ୟାରିସ : ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରୋନଙ୍କ ସହ ବହୁ ପ୍ରତୀକ୍ଷିତ ଏଆଇ ଆକ୍ସନ ଶିଖର ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଙ୍ଗଳବାର ମିଳିତ ଭାବେ ଅଧ୍ୟକ୍ଷତା କରିଛନ୍ତି। ଶିଖର ସମ୍ମିଳନୀରେ ଅଂଶଗ୍ରହଣ କରି ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ ଏଆଇ ଅନ୍ୟ ଟେକ୍ନୋଲୋଜିଠାରୁ ସମ୍ପୂର୍ଣ୍ଣ ଭିନ୍ନ ଏବଂ ଏଥିପାଇଁ ସତର୍କ ରହିବାର ଆବଶ୍ୟକତା ରହିଛି।

ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ)ର ବିକାଶ ଦ୍ରୁତ ଗତିରେ ଚାଲିଛି ବୋଲି ସେ କହିଛନ୍ତି। ଏହାକୁ ଆହୁରି ଶୀଘ୍ର ନିୟୋଜିତ କରାଯାଉଛି। ଏଆଇର ଭବିଷ୍ୟତ ସମସ୍ତଙ୍କ ପାଇଁ ଭଲ ବୋଲି ସୁନିଶ୍ଚିତ କରିବା ପାଇଁ ଭାରତ ଏହାର ଅଭିଜ୍ଞତା ଏବଂ ଦକ୍ଷତା ବାଣ୍ଟିବାକୁ ପ୍ରସ୍ତୁତ ଅଛି । ଏଆଇକୁ ଗ୍ରହଣ କରିବା ସହିତ ଡାଟା ଗୋପନୀୟତା ପାଇଁ ଏକ ଟେକ୍ନୋଲୋଜି-ଲିଗାଲ ଫ୍ରେମୱାର୍କ ପ୍ରତିଷ୍ଠା କରିବାରେ ମଧ୍ୟ ଭାରତ ଅଗ୍ରଣୀ ରହିଛି । ଜନସାଧାରଣଙ୍କ ମଙ୍ଗଳ ପାଇଁ ଆମେ ଏଆଇ ଆପ୍ଲିକେସନ୍ ବିକଶିତ କରୁଛୁ । ଭାରତ ଏହାର ୧.୪ ବିଲିୟନରୁ ଅଧିକ ଲୋକଙ୍କ ପାଇଁ ଅତ୍ୟନ୍ତ କମ୍ ଖର୍ଚ୍ଚରେ ସଫଳତାର ସହ ଡିଜିଟାଲ ସାର୍ବଜନୀନ ଭିତ୍ତିଭୂମି ନିର୍ମାଣ କରିଛି । ଏଆଇ ସମ୍ବନ୍ଧୀୟ ସମସ୍ୟାର ସମାଧାନ ପାଇଁ ଆମକୁ ବିଶ୍ୱସ୍ତରୀୟ ମାନଦଣ୍ଡର ଆବଶ୍ୟକତା ରହିଛି ବୋଲି ସେ କହିଛନ୍ତି ।