ନୂଆଦିଲ୍ଲୀ : ଭାରତ ବିଶ୍ବ ପରିବେଶକୁ କମ କ୍ଷତି ପହଞ୍ଚାଇଥିଲେ ବି ପରିବେଶ ସଂରକ୍ଷଣ ଦିଗରେ କାମ କରିଚାଲିଛି । ଅନ୍ୟପକ୍ଷରେ ବିକଶିତ ଦେଶମାନେ ଅଧିକ ପ୍ରାକୃତିକ ସମ୍ବଳ ବ୍ୟବହାର କରୁଛନ୍ତି ଓ ସର୍ବାଧିକ ଅଙ୍ଗାରକାମ୍ଳ ବାଷ୍ପ ନିର୍ଗତ କରୁଛନ୍ତି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ବିଶ୍ବ ପରିବେଶ ଦିବସ ଉପଲକ୍ଷେ ଇଶା ଫାଉଣ୍ଡେସନ ଦ୍ବାରା ଆୟୋଜିତ ଏକ ସମାରୋହରେ ଯୋଗ ଦେଇ ମୋଦୀ କହିଛନ୍ତି ଯେ, ଗତ ୮ ବର୍ଷରେ ଭାରତ ସରକାର ଆଣିଥିବା ଅଧିକାଂଶ କାର୍ଯ୍ୟକ୍ରମରେ ପରିବେଶ ସୁରକ୍ଷାର ବାର୍ତ୍ତା ରହିଛି । ସେଗୁଡ଼ିକ ମଧ୍ୟରେ ରହିଛି ସ୍ବଚ୍ଛ ଭାରତ ଅଭିଯାନ, ନମାମୀ ଗଙ୍ଗେ, ଓ୍ବାନ ସନ ଓ୍ବାନ ଗ୍ରୀଡ ଇତ୍ୟାଦି ।
ସୂଚନାଯୋଗ୍ୟ ଯେ ଜାତିସଂଘ ପକ୍ଷରୁ ୧୯୭୨ରୁ ପ୍ରତ୍ୟେକ ବର୍ଷ ଜୁନ ୫ରେ ବିଶ୍ବ ପରିବେଶ ଦିବସ ପାଳନ କରାଯାଉଛି । ପ୍ରଥମ ବର୍ଷ ବିଶ୍ବ ପରିବେଶ ଦିବସର ଶୀର୍ଷକ ଥିଲା ‘କେବଳ ଗୋଟିଏ ପୃଥିବୀ’ । ଚଳିତ ବର୍ଷର ବିଶ୍ବ ପରିବେଶ ଦିବସର ଶୀର୍ଷକ ମଧ୍ୟ ସମାନ ରହିଛି ।
ବିଶ୍ବ ପରିବେଶ ଦିବସ ଅବସରରେ ମୋଦୀ ଆଜି ଲାଇଫଷ୍ଟାଇଲ ଫର ଏନଭାରମେଣ୍ଟ (ଲାଇଫ) ଅଭିଯାନ ଆରମ୍ଭ କରିଛନ୍ତି । ଆମର ଜୀବନଯାପନ ଯେପରି ପରିବେଶ ଅନୁକୂଳ ହେବ ତାହା ଉପରେ ଏହି ଅଭିଯାନ ମାଧ୍ୟମରେ ଗୁରୁତ୍ବ ଦିଆଯାଉଛି । ଏପରି ଜୀବନ ବଞ୍ଚୁଥିବା ଲୋକମାନଙ୍କୁ ପୃଥିବୀ ଅନୁକୂଳ ଲୋକ ବୋଲି କୁହାଯାଇପାରିବ ବୋଲି ସେ କହିଛନ୍ତି ।