କରୋନା ଭାଇରସ : ୟୁରୋପ ଗସ୍ତ ବାତିଲ କଲେ ମୋଦୀ, ଦିଲ୍ଲୀର ସବୁ ପ୍ରାଥମିକ ସ୍କୁଲ ମାର୍ଚ୍ଚ ୩୧ ପର୍ଯ୍ୟନ୍ତ ଛୁଟି
ନୂଆଦିଲ୍ଲୀ : ସାରା ବିଶ୍ୱରେ କରୋନା ଭାଇରସ (କୋଭିଡ୍-୧୯) ସଂକ୍ରମଣ ବଢିଚାଲିଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜର ବ୍ରସେଲ୍ସ ଗସ୍ତ ବାତିଲ କରିଦେଇଛନ୍ତି । ଚଳିତ ମାସରେ ବେଲଜିୟମ ରାଜଧାନୀ ବ୍ରସେଲ୍ସରେ ଭାରତ ଓ ୟୁରୋପୀୟ ସଂଘର ସମ୍ମିଳନୀ ହେବାକୁ ଥିଲା । ଏଥିରେ ଯୋଗ ଦେବାକୁ ପ୍ରଧାନମନ୍ତ୍ରୀ ବ୍ରସେଲ୍ସ ଯିବାର ଥିଲା । କିନ୍ତୁ ସ୍ୱାସ୍ଥ୍ୟ ମନ୍ତ୍ରାଳୟର ପରାମର୍ଶ ପରେ ଏହି ଗସ୍ତକୁ ବାତିଲ କରାଯାଇଛି ବୋଲି ବୈଦେଶିକ ମନ୍ତ୍ରାଳୟର ମୁଖପାତ୍ର ରବିଶ କୁମାର କହିଛନ୍ତି । ସେ କହିଛନ୍ତି ଯେ ଏହି ସମ୍ମିଳନୀ ପାଇଁ ଏକ ନୂଆ ତାରିଖ ଧାର୍ଯ୍ୟ କରାଯିବ ।
Sambad is now on WhatsApp
Join and get latest news updates delivered to you via WhatsApp
ସେହିପରି, କରୋନା ସଂକ୍ରମଣକୁ ଦୃଷ୍ଟିରେ ରଖି ଦିଲ୍ଲୀ ସରକାର ସବୁ ପ୍ରାଥମିକ ସ୍କୁଲକୁ ଆସନ୍ତା ୩୧ ତାରିଖ ପର୍ଯ୍ୟନ୍ତ ଛୁଟି ଘୋଷଣା କରିଛନ୍ତି । ସତର୍କତାମୂଳକ ପଦକ୍ଷେପ ସ୍ୱରୂପ ଏହି ନିଷ୍ପତ୍ତି ନିଆଯାଇଛି ବୋଲି ଦିଲ୍ଲୀ ଉପମୁଖ୍ୟମନ୍ତ୍ରୀ ମନିଷ ସିସୋଦିଆ କହିଛନ୍ତି ।
ଗତକାଲି ୧୦ମ ଓ ୧୨ଶ ବୋର୍ଡ ପରୀକ୍ଷା ଦେଉଥିବା ଛାତ୍ରଛାତ୍ରୀମାନେ ମାସ୍କ ପିନ୍ଧି ପରୀକ୍ଷା ହଲରେ ବସିପାରିବେ ବୋଲି ସିବିଏସଇ ଅନୁମତି ଦେଇଥିଲା । ଏହା ସହିତ ସେମାନେ ନିଜ ପାଖରେ ହାଣ୍ଡ ସାନିଟାଇଜର ରଖିପାରିବେ ।
ଅନ୍ୟପକ୍ଷରେ ସମଗ୍ର ବିଶ୍ୱରେ କରୋନା ଭାଇରସ ଜନିତ ମୃତ୍ୟୁସଂଖ୍ୟା ୩୩୦୦ ଛୁଇଁଛି । ଏହା ସହିତ ବିଶ୍ୱରେ ପ୍ରାୟ ୯୫ ହଜାର ଜଣ ସଂକ୍ରମିତ ହୋଇଛନ୍ତି, ଏହା ମଧ୍ୟରୁ ୮୮ ହଜାର ଚୀନର ବୋଲି ଜଣାପଡ଼ିଛି ।