୧୨ କୋଟିର ବିଦେଶୀ ଗାଡ଼ି ଚଢ଼ିବା ପରେ ମୋଦୀ ଆଉ ‘ଫକୀର’ ବୋଲି ଦାବି କରିପାରିବେ ନାହିଁ: ସଞ୍ଜୟ ରାଉତ

ନୂଆଦିଲ୍ଲୀ: ଶିବସେନା ସାଂସଦ ସଞ୍ଜୟ ରାଉତ ରବିବାର କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବର୍ତ୍ତମାନ ୧୨ କୋଟି ଟଙ୍କା ମୂଲ୍ୟର ଦାମୀ ଗାଡ଼ି ଚଢ଼ିବା ପରେ ନିଜକୁ ଆଉ ‘ଫକୀର’ କହିବା ଉଚିତ୍‌ ନୁହେଁ।
ସେନା ମୁଖପତ୍ର ସାମନାରେ ଥିବା ତାଙ୍କ ସାପ୍ତାହିକ ସ୍ତମ୍ଭ ରୋକ୍‌ଠୋକରେ ରାଉତ ପୂର୍ବତନ ପ୍ରଧାନମନ୍ତ୍ରୀ ଜବାହରଲାଲ ନେହେରୁଙ୍କୁ ମଧ୍ୟ ପ୍ରଶଂସା କରିଛନ୍ତି ଯେ ସେ ସର୍ବଦା ଏକ ଭାରତୀୟ ନିର୍ମିତ ଗାଡ଼ି ବ୍ୟବହାର କରୁଥିଲେ ଏବଂ ସ୍ୱର୍ଗତ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ତାଙ୍କ ଜୀବନ ପ୍ରତି ବିପଦ ସତ୍ତ୍ୱେ ତାଙ୍କ ସୁରକ୍ଷା କର୍ମୀଙ୍କୁ ବଦଳାଉ ନଥିଲେ।

ଡିସେମ୍ବର ୨୮ରେ ଗଣମାଧ୍ୟମରେ ପ୍ରଧାନମନ୍ତ୍ରୀ ମୋଦୀଙ୍କ ପାଇଁ ବିଦେଶରୁ ଆମଦାନି ହୋଇଥିବା ୧୨ କୋଟି ଟଙ୍କା ମୂଲ୍ୟ ଥିବା ଗାଡ଼ିର ଫଟୋ ପ୍ରକାଶ ପାଇଥିଲା। ନିଜକୁ ଫକୀର ବୋଲି କହୁଥିବା ବ୍ୟକ୍ତି, ଜଣେ ପ୍ରଧାନ ସେବକ, ଏକ ବିଦେଶୀ ନିର୍ମିତ କାର ବ୍ୟବହାର କରିବା ହାସ୍ୟାସ୍ପଦ ଓ ଭାରତ ପାଇଁ ଲଜ୍ଜାଜନକ ବୋଲି ରାଉତ କହିଛନ୍ତି।

ଶିବସେନାର ରାଜ୍ୟସଭା ସାଂସଦ ଥିବା ଶ୍ରୀ ରାଉତ କହିଛନ୍ତି, ପ୍ରଧାନମନ୍ତ୍ରୀଙ୍କ ସୁରକ୍ଷା ଏବଂ ଆରାମ ଗୁରୁତ୍ୱପୂର୍ଣ୍ଣ, କିନ୍ତୁ ବର୍ତ୍ତମାନଠାରୁ ପ୍ରଧାନ ସେବକ ପୁନରାବୃତ୍ତି କରିବା ଉଚିତ୍‌ ନୁହେଁ ଯେ ସେ ଜଣେ ଫକୀର।

ଉଲ୍ଲେଖଯୋଗ୍ୟ, ନିକଟରେ ସ୍ୱତନ୍ତ୍ର ସୁରକ୍ଷା ଗୋଷ୍ଠୀ (ଏସ୍‌ପିଜି) ଦ୍ୱାରା ପ୍ରଧାନମନ୍ତ୍ରୀଙ୍କ କାଭାଲକେଡରେ ଜର୍ମାନ ନିର୍ମିତ ଏକ ମର୍ସିଡିଜ୍‌-ମେବାଚ୍‌ ଏସ୍‌ ୬୫୦ ଗାଡ଼ି ସାମିଲ କରାଯାଇଛି, ଯାହାର ମୂଲ୍ୟ ୧୨ କୋଟି ଟଙ୍କାରୁ ଅଧିକ। ଏହି ପରିପ୍ରେକ୍ଷୀରେ ସାଂସଦ ରାଉତ କହିଛନ୍ତି ଯେ ‘ମେକ୍‌ ଇନ୍‌ ଇଣ୍ଡିଆ’ ଏବଂ ‘ଷ୍ଟାର୍ଟ ଅପ୍‌ ଇଣ୍ଡିଆ’ ଭଳି ‘ସ୍ୱଦେଶୀ’ ପଦକ୍ଷେପ ଆରମ୍ଭ କରିଥିବା ମୋଦୀ ଏକ ବିଦେଶୀ ନିର୍ମିତ କାର ବ୍ୟବହାର କରିବା ଏକ ବିରୋଧାଭାସ।

ଜବାହରଲାଲ ନେହେରୁଙ୍କୁ ପ୍ରଶଂସା କରି ଶିବସେନାର ମୁଖପାତ୍ର କହିଛନ୍ତି ଯେ ବିଭାଜନ ପରେ ସୁରକ୍ଷା ବିପଦ ସତ୍ତ୍ୱେ ଦେଶର ପ୍ରଥମ ପ୍ରଧାନମନ୍ତ୍ରୀ ସର୍ବଦା ଭାରତୀୟ ନିର୍ମିତ ‘ଆମ୍ବାସାଡାର’ କାର ବ୍ୟବହାର କରୁଥିଲେ। ସେହିପରି (ପୂର୍ବତନ ପ୍ରଧାନମନ୍ତ୍ରୀ) ଇନ୍ଦିରା ଗାନ୍ଧୀ ତାଙ୍କ ଜୀବନ ପ୍ରତି ବିପଦ ସତ୍ତ୍ୱେ ତାଙ୍କ ସୁରକ୍ଷା ପାଇଁ ନିୟୋଜିତ ଶିଖ ସୁରକ୍ଷା କର୍ମୀଙ୍କୁ ପରିବର୍ତ୍ତନ କରି ନଥିଲେ। ଏହା ବ୍ୟତୀତ (ପୂର୍ବତନ ପ୍ରଧାନମନ୍ତ୍ରୀ) ରାଜୀବ ଗାନ୍ଧୀ ତାମିଲନାଡୁରେ ଭିଡ଼ ସହିତ ମିଶିବା ପରେ ଏଲଟିଟିଇ ଦ୍ୱାରା ହତ୍ୟାର ଶିକାର ହୋଇଥିଲେ ବୋଲି ସେ କହିଛନ୍ତି।