କାର୍ଗିଲରେ ଯବାନମାନଙ୍କ ସହ ଦୀପାବଳି ପାଳିଲେ ମୋଦୀ: ଆମ ଦେଶ ଉପରେ ଆଖି ପକାଇଲେ ତିନି ସେନା ଉଚିତ ଢଙ୍ଗରେ ଜବାବ ଦେବେ

ନୂଆଦିଲ୍ଲୀ: ସୋମବାର ଦିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କାର୍ଗିଲରେ ପହଞ୍ଚି ଦେଶର ଯବାନମାନଙ୍କ ସହ ଦୀପାବଳି ପାଳନ କରୁଛନ୍ତି। ଉଲ୍ଲେଖନୀୟ କଥା ହେଉଛି, ୨୦୧୪ରେ କ୍ଷମତାକୁ ଆସିବା ପରଠାରୁ ସେ ଦୀପାବଳି ପାଳନ କରିବା ପାଇଁ ପ୍ରତ୍ୟେକ ଥର ସେନାଶିବିରଙ୍କୁ ଯାଇଥାନ୍ତି | ଏଥର ଦୀପାବଳି ଅବସରରେ ପ୍ରଧାନମନ୍ତ୍ରୀ କହିଛନ୍ତି ଯେ ଆମେ ଯୁଦ୍ଧକୁ ସର୍ବଦା ଶେଷ ବିକଳ୍ପ ଭାବେ ଗ୍ରହଣ କରିଥାଉ ଏବଂ ଶାନ୍ତି ଉପରେ ବିଶ୍ୱାସ ରଖୁ | କିନ୍ତୁ ଶକ୍ତି ବା ସାମର୍ଥ୍ୟ ବିନା ଶାନ୍ତି ସମ୍ଭବ ନୁହେଁ। ପ୍ରଧାନମନ୍ତ୍ରୀ କହିଛନ୍ତି ଯେ ଯେତେବେଳେ ବି ଭାରତର ଶକ୍ତି ବଢିଥାଏ, ସେତେବେଳେ ବିଶ୍ୱରେ ଶାନ୍ତି ଏବଂ ସମୃଦ୍ଧିର ସମ୍ଭାବନା ମଧ୍ୟ ବଢେ | ମୋଦୀ କହିଛନ୍ତି, ଦେଶର ସୁରକ୍ଷା ପାଇଁ ‘ଆତ୍ମନିର୍ଭରଶୀଳ ଭାରତ’ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ବିଦେଶୀ ଅସ୍ତ୍ରଶସ୍ତ୍ର ଉପରେ ଆମର ନିର୍ଭରଶୀଳତା ସର୍ବନିମ୍ନ ହେବା ଉଚିତ୍। ମୋଦୀ କହିଛନ୍ତି ଯେ କାର୍ଗିଲରେ ଆମର ସେନା ଶତ୍ରୁଙ୍କର ଫଣାକୁ ଭାଙ୍ଗିଦେଇଥିଲେ ଓ ଦେଶରେ ବିଜୟର ଏଭଳି ଦୀପାବଳି ପାଳନ କରାଯାଇଥିଲା , ଯାହାକୁ ଏବେ ବି ସମସ୍ତେ ମନେ ରଖିଛନ୍ତି |

ଏକ ରାଷ୍ଟ୍ର ସେତେବେଳେ ଅମର ହୋଇଯାଏ, ଯେତେବେଳେ ଏହାର ସାହସୀ ପୁଅ ଏବଂ ଝିଅମାନେ ସେମାନଙ୍କର ଶକ୍ତି ଉପରେ ସମ୍ପୂର୍ଣ୍ଣ ବିଶ୍ୱାସ କରନ୍ତି | ଆପଣଙ୍କ ହେତୁ ଦେଶବାସୀ ଶାନ୍ତିପୂର୍ଣ୍ଣ ଭାବରେ ଦେଶରେ ରୁହନ୍ତି, ଏହା ଭାରତର ଲୋକଙ୍କ ପାଇଁ ଖୁସିର ବିଷୟ | ପ୍ରଧାନମନ୍ତ୍ରୀ କହିଛନ୍ତି ଯେ ୟୁକ୍ରେନ ଯୁଦ୍ଧ ସମୟରେ ଆମେ ଦେଖିଲୁ ଯେ ଆମର ଜାତୀୟ ପତାକା ସେଠାରେ ଫସି ରହିଥିବା ନାଗରିକଙ୍କ ପାଇଁ ଢାଲ ସଦୃଶ ହୋଇଥିଲା | ସମଗ୍ର ବିଶ୍ୱରେ ଭାରତର ସମ୍ମାନ ବୃଦ୍ଧି ପାଇଛି | ଏହାର କାରଣ ହେଉଛି ଯେ ଭାରତ ଏହାର ଆଭ୍ୟନ୍ତରୀଣ ତଥା ବାହ୍ୟ ଶତ୍ରୁଙ୍କୁ ସଫଳତାର ସହ ମୁକାବିଲା କରୁଛି | ପ୍ରଧାନମନ୍ତ୍ରୀ ଏହା ମଧ୍ୟ କହିଛନ୍ତି ଯେ ଆପଣ ସୀମାରେ ଦୃଢ ଭାବରେ ଠିଆ ହୋଇଥିବାବେଳେ, ଦେଶର ଆଭ୍ୟନ୍ତରୀଣ ଶତ୍ରୁମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଆତଙ୍କବାଦ, ନକ୍ସଲବାଦ ଇତ୍ୟାଦିର ମୂଳକୁ ହଟାଇବା ପାଇଁ ଦେଶ କ୍ରମାଗତ ଭାବରେ ସଫଳ ଉଦ୍ୟମ କରୁଛି, ଯାହା ଗତ ବର୍ଷରେ ବୃଦ୍ଧି ପାଇଥିଲା।

ସମ୍ବନ୍ଧିତ ଖବର