ମୋଦୀ ସରକାର ମୁସଲମାନ ବିରୋଧୀ, ପାକିସ୍ତାନକୁ ପସନ୍ଦ କରନ୍ତି ନାହିଁ: ଫୱାଦ ଚୌଧୁରୀଙ୍କ ଆପତ୍ତିଜନକ ମନ୍ତବ୍ୟ

ଇସଲାମାବାଦ: ପାକିସ୍ତାନର ରାଜଧାନୀ ଇସଲାମାବାଦରେ ସାଂଘାଇ ସହଯୋଗ ସଂଗଠନ (ଏସସିଓ)ର ବାର୍ଷିକ ସମ୍ମିଳନୀ ଅନୁଷ୍ଠିତ ହେଉଛି। ଏସିଓର ସଦସ୍ୟ ହୋଇ ବୈଦେଶିକ ମନ୍ତ୍ରୀ ଏସ ଜୟଶଙ୍କର ମଙ୍ଗଳବାର ଦିନ ଭାରତ ପକ୍ଷରୁ ଶିଖର ସମ୍ମିଳନୀରେ ଯୋଗଦେବା ପାଇଁ ପାକିସ୍ତାନରେ ପହଞ୍ଚିଛନ୍ତି। ଦୀର୍ଘ ସମୟ ପରେ ଜଣେ ବରିଷ୍ଠ ଭାରତୀୟ ନେତା ପାକିସ୍ତାନ ଗସ୍ତ କରିଛନ୍ତି, ତେଣୁ ଜୟଶଙ୍କରଙ୍କ ଗସ୍ତ ନେଇ ଉଭୟ ଦେଶରେ ବହୁ ଚର୍ଚ୍ଚା ହେଉଛି। ଇମ୍ରାନ ଖାନଙ୍କ ଦଳର ବରିଷ୍ଠ ନେତା ତଥା ପୂର୍ବତନ କେନ୍ଦ୍ର ମନ୍ତ୍ରୀ ଫୱାଦ ଚୌଧରୀ ଏନେଇ ନିଜ ପ୍ରତିକ୍ରିୟା ରଖିଛନ୍ତି। 

ଫୱାଦ ଚୌଧରୀ କହିଛନ୍ତି ଯେ ଜୟଶଙ୍କରଙ୍କ ଆଗମନ ଭଲ କିନ୍ତୁ ଦୁଇ ଦେଶ ମଧ୍ୟରେ କୌଣସି ଆଲୋଚନା ହେବାକୁ ଯାଉନାହିଁ। ଫୱାଦ କହିଛନ୍ତି ଯେ ଏସ ଜୟଶଙ୍କର ଦ୍ୱିପାକ୍ଷିକ ଆଲୋଚନା ପାଇଁ ନୁହେଁ ଏସସିଓ ସମ୍ମିଳନୀରେ ଯୋଗଦୋକୁ ଆସିଛନ୍ତି। ତାଙ୍କ ପାଇଁ ଭାରତ ଏବଂ ପାକିସ୍ତାନର ଲୋକଙ୍କ ଅପେକ୍ଷା ଏସସିଓ ଅଧିକ ଗୁରୁତ୍ୱପୂର୍ଣ୍ଣ। ଏଭଳି ପରିସ୍ଥିତିରେ ଦୁଇ ଦେଶ ମଧ୍ୟରେ ଥିବା ସମ୍ପର୍କ ନେଇ ଅଧିକ କିଛି ଆଶା କରାଯାଇପାରିବ ନାହିଁ।

ପାକିସ୍ତାନ ସହ ଆଲୋଚନା ପାଇଁ ସର୍ତ୍ତ ଭାବରେ ଆତଙ୍କବାଦକୁ ରୋକିବା ପାଇଁ ଭାରତର ପ୍ରଶ୍ନ ଉପରେ ଚୌଧୁରୀ କହିଛନ୍ତି, ଭାରତ ଆମକୁ ଦାୟୀ କରୁଛି କିନ୍ତୁ ଏହି ସମୟରେ ଭାରତ ନିଜେ ଅନେକ ଦେଶରୁ କଠିନ ପ୍ରଶ୍ନର ସମ୍ମୁଖୀନ ହେଉଛି। ଆମେରିକା ଏବଂ କାନାଡା ଆଡକୁ ସୂଚାଇ ଚୌଧୁରୀ କହିଛନ୍ତି, କିଛି ଦେଶ ଭାରତରେ ନିଜ ମାଟିରେ ହିଂସା ହେଉଥିବା ଅଭିଯୋଗ କରିଛନ୍ତି। ଯଦି ଆମେରିକା ଏବଂ କାନାଡା ଏହା କହୁଛନ୍ତି ତେବେ ଆମକୁ ଏଥିପାଇଁ ଗମ୍ଭୀରତା ଦେଖାଇବାକୁ ପଡ଼ିବ।

ଚୌଧୁରୀ କହିଛନ୍ତି ଆମେ ଚାହୁଁ ଭାରତ ଏବଂ ପାକିସ୍ତାନ ମଧ୍ୟରେ ସମ୍ପର୍କ ସୁଦୃଢ଼ ହେଉ। ଆମେ ଇତିହାସକୁ ଧରି ରହିପାରିବା ନାହିଁ। କିନ୍ତୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସରକାରଙ୍କ ରାଜନୀତି ମୁସଲମାନ ଏବଂ ପାକିସ୍ତାନ ବିରୋଧୀ। ତେଣୁ ଆଲୋଚନା ଆଗକୁ ଯାଇପାରିବ ନାହିଁ। ଆତଙ୍କବାଦ ପ୍ରଶ୍ନରେ ସେ କହିଛନ୍ତି ତାଙ୍କ ଦେଶ ଭାରତ ଅପେକ୍ଷା ଅଧିକ ଯନ୍ତ୍ରଣା ଭୋଗୁଛି। ଭାରତ ଅପେକ୍ଷା ଆତଙ୍କବାଦ ଯୋଗୁ ପାକିସ୍ତାନରେ ଶତାଧିକ ଲୋକ ପ୍ରାଣ ହରାଇଛନ୍ତି।

ତାଙ୍କର ଏଭଳି ଆପତ୍ତିଜନକ ମନ୍ତବ୍ୟ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି। ପାକିସ୍ତାନରୁ ଆତଙ୍କବାଦୀ ପଠାଇବା ପ୍ରଶ୍ନରେ ସେ କହିଛନ୍ତି  ଭାରତର ଅଭିଯୋଗ ଆମ ବିରୋଧ‌ରେ। ଆମେ ଏହା ମଧ୍ୟ କହୁଛୁ ଯେ ପାକିସ୍ତାନରେ ଆତଙ୍କବାଦୀଙ୍କୁ ଭାରତ ସାହାଯ୍ୟ କରୁଛି। କୁଲଭୂଷଣ ଯାଦବଙ୍କ ପରି ଆମର ଉଦାହରଣ ଅଛି, ଯିଏ ଏଠାରେ ଆତଙ୍କବାଦ ବିସ୍ତାର କରିବାରେ ଲାଗିଥିଲେ ଏବଂ କୋର୍ଟ ତାଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ଆମେ ଏହା ଉପରେ ଭାରତକୁ ମଧ୍ୟ ପ୍ରଶ୍ନ ପଚାରୁଛୁ।

ସେ କହିଛନ୍ତି ଭାରତରେ ହିନ୍ଦୁବାଦୀ ରାଜନୀତିକୁ ପ୍ରୋତ୍ସାହିତ କରିବାକୁ ଚେଷ୍ଟା କରାଯାଉଥିବାରୁ ସେଠାରେ ଥିବା ଲୋକମାନେ ବୋଧହୁଏ ଖୁସି ନୁହଁନ୍ତି। ସମ୍ପ୍ରତି ସାଧାରଣ ନିର୍ବାଚନରେ ​​ବିଜେପିର ଆସନ ହ୍ରାସରୁ ଏହା ଜଣାପଡିଛି। ଭାରତର ସାଧାରଣ ବ୍ୟକ୍ତି ହିନ୍ଦୁବାଦୀ ରାଜନୀତିରୁ ଦୂରେଇ ଯାଉଛନ୍ତି ଏବଂ ପାକିସ୍ତାନ ସହ ଭଲ ସମ୍ପର୍କ ଚାହୁଁଛନ୍ତି। ଆମେ ଏହା ମଧ୍ୟ ସ୍ପଷ୍ଟ କରୁଛୁ ଯେ, ଆମେ ଭାରତ ସହିତ ଭଲ ସମ୍ପର୍କ ଚାହୁଁ।