୪.୪୨ଲକ୍ଷ କୋଟି ଟଙ୍କା ଋଣ ନେବେ ମୋଦି ସରକାର, ଏହି କାରଣ ପାଇଁ ନିଆଗଲା ଏତେ ବଡ଼ ନିଷ୍ପତ୍ତି
ନୂଆଦିଲ୍ଲୀ : କେନ୍ଦ୍ର ସରକାର ଆର୍ଥିକ ବର୍ଷ ଆରମ୍ଭ ହେବା ପରେ ପରେ ୪.୪୨ଲକ୍ଷ କୋଟି ଟଙ୍କାର ଋଣ କରିବେ ବୋଲି ସାମ୍ନାକୁ ଆସିଛି । ଆର୍ଥିକ ବର୍ଷ ୨୦୧୯-୨୦ମସିହା ପାଇଁ ସରକାର ବଣ୍ଡକୁ ନିଲାମ କରି ଏହି ଋଣ କରିବେ ବୋଲି ଜଣାପଡ଼ିଛି । ଆର୍ଥିକ ବର୍ଷର ପ୍ରଥମ ୬ମାସ ପାଇଁ ସରକାର ୪.୪୨ଲକ୍ଷ କୋଟି ଟଙ୍କା ଋଣ ନେବା ପାଇଁ ନିଷ୍ପତ୍ତି ନେଇଥିବା ବେଳେ ଦ୍ୱିତୀୟ ୬ମାସ ପାଇଁ ୨.୬୮ଲକ୍ଷ କୋଟି ଟଙ୍କା ଋଣ କରିବେ ସରକାର । ପ୍ରଥମ ୬ମାସ ପାଇଁ ନିଆଯାଉଥିବା ଋଣ ଆଗାମୀ ବର୍ଷ ନିଆଯିବାକୁ ଥିବା ଋଣଠାରୁ ୬୨ପ୍ରତିଶତ ଅଧିକ ବୋଲି ଜଣା ପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ଆର୍ଥିକ ବ୍ୟାପାର ସଚିବ ସୁଭାଷ ଚନ୍ଦ୍ର ଗର୍ଗଙ୍କ କହିବା ଅନୁଯାୟୀ, ବର୍ତ୍ତମାନ ଅର୍ଥମନ୍ତ୍ରାଳୟ ଦାୟିତ୍ୱରେ ଥିବା ମନ୍ତ୍ରୀ ପିୟୁଷ ଗୋୟଲ ଆର୍ଥିକ ବର୍ଷ ୨୦୧୯-୨୦ ପାଇଁ ୭.୧ଲକ୍ଷ କୋଟି ଟଙ୍କା ଯୋଗାଡ କରିବା ପାଇଁ ଲକ୍ଷ୍ୟ ରଖିଥିଲେ । ବର୍ତ୍ତମାନର ଆର୍ଥିକ ବର୍ଷ ପାଇଁ ସରକାର ୫.୭୧ ଲକ୍ଷ କୋଟି ଟଙ୍କା ଋଣ କରିଥିବା ବେଳେ ୧୭ହଜାର କୋଟିର ବଣ୍ଡ ନିଲାମ କରି ସରକାର ଏହି ମୂଲ୍ୟକୁ ବଢ଼ାଇବେ ବୋଲି ଜଣା ପଡ଼ିଛି । ତେବେ ଏତେ ଟଙ୍କାର ଋଣ ନେବା ପଛରେ ସେଭଳି ବଡ଼ କାରଣ ରହିଛି । ପୂର୍ବରୁ ସରକାର ନେଇଥିବା ଋଣକୁ ଶୁଝିବା ପାଇଁ କେନ୍ଦ୍ର ସରକାର ଏତେ ଟଙ୍କା ଋଣ ନେଉଥିବା ସ୍ପଷ୍ଟ ହୋଇଛି । ସରକାର ଆସନ୍ତା ଆର୍ଥିକ ବର୍ଷର ପ୍ରଥମ ୬ମାସରେ ୧.୦୨ଲକ୍ଷ କୋଟି ଟଙ୍କା ଶୁଝିବା ସହ ଦ୍ୱିତୀୟ ୬ମାସରେ ୧.୩୫ଲକ୍ଷ କୋଟି ଟଙ୍କା ଶୁଝିବେ ଜଣା ପଡ଼ିଛି । ପ୍ରଥମ ୬ମାସରେ ଅଧିକ ଋଣ ନେବା ଦ୍ୱାରା ଲାଭ ହେବ ବୋଲି ସରକାର ଆଶା ରଖିିଥିବା କହିଛନ୍ତି ଆର୍ଥିକ ବ୍ୟାପାର ସଚିବ ସୁଭାଷ ଚନ୍ଦ୍ର ଗର୍ଗ ।