ନୂଆଦିଲ୍ଲୀ : ଆମେରିକା ଗସ୍ତରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିଭିନ୍ନ ଟେକନଲୋଜୀ କମ୍ପାନିର ସିଇଓମାନଙ୍କୁ ଭେଟି ଭାରତରେ ନିବେଶ କରିବାକୁ ଆମନ୍ତ୍ରଣ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ମୋଦୀ ୫ଟି ଆମେରିକୀୟ କମ୍ପାନିର ସିଇଓଙ୍କୁ ଭେଟିବାକୁ ଥିବାବେଳେ ଆଜି କ୍ବାଲକମର ସିଇଓ କ୍ରିଷ୍ଟିଆନୋ ଆମୋନଙ୍କ ସହ ବୈଠକ କରିଛନ୍ତି । ମୋଦୀଙ୍କୁ ଭେଟିବା ପରେ ଆମୋନ କହିଛନ୍ତି ଯେ ସେ ଭାରତରେ ୫ଜି, ସେମି-କଣ୍ଡକ୍ଟର, ଡିଜିଟାଲ ଇଣ୍ଡିଆ ଆଦି କ୍ଷେତ୍ରରେ କାର୍ଯ୍ୟକରିବାକୁ ଆଗ୍ରହୀ ଅଛି । ଭାରତରେ କ୍ବାଲକମକୁ ସବୁପ୍ରକାରର ସହାୟତା ଯୋଗାଇଦିଆଯିବ ବୋଲି ମୋଦୀ କହିଛନ୍ତି ।
ମୋଦୀ ମଧ୍ୟ ଆଡୋବି କମ୍ପାନିର ଅଧ୍ୟକ୍ଷ ଶାନ୍ତନୁ ନାରାୟନନଙ୍କ ସହ ଆଲୋଚନା କରିଛନ୍ତି । ଭାରତର ଇଲେକ୍ଟ୍ରୋନିକ୍ସ ଓ ଟେଲିକମ୍ୟୁନିକେସନ କ୍ଷେତ୍ରରେ ନିବେଶ କରିବାକୁ ପ୍ରଧାନମନ୍ତ୍ରୀ ଏହି କମ୍ପାନିକୁ ଆମନ୍ତ୍ରଣ କରିଛନ୍ତି ।
ଏହା ପରେ ମୋଦୀ ଜେନେରାଲ ଆଟମିକ୍ସର ସିଇଓ ବିବେକ ଲାଲ ଓ ବ୍ଲାକଷ୍ଟୋନର ସିଇଓ ଷ୍ଟିଫେନ ସ୍ବାର୍ଜମ୍ୟାନଙ୍କୁ ଭେଟିବେ । ଜେନେରାଲ ଆଟମିକ୍ସ କମ୍ପାନି ଲଢୁଆ ଡ୍ରୋନ ପ୍ରିଡେଟର ନିର୍ମାଣ କରୁଥିବାରୁ ମୋଦୀଙ୍କ ସହ ବିବେକଙ୍କ ବୈଠକକୁ ଗୁରୁତ୍ବ ଦିଆଯାଉଛି ।
ପରବର୍ତ୍ତୀ ସମୟରେ ମୋଦୀ ଆମେରିକାର ଉପରାଷ୍ଟ୍ରପତି କମଳା ହ୍ୟାରିସ, ଅଷ୍ଟ୍ରେଲିଆ ଓ ଜାପାନ ପ୍ରଧାନମନ୍ତ୍ରୀଙ୍କୁ ଭେଟିବାର କାର୍ଯ୍ୟକ୍ରମ ରହିଛି ।