ନୂଆଦିଲ୍ଲୀରୁ ବିକାଶର ମନ୍ତ୍ର ପଢ଼ିଲେ ମୋଦୀ: ସବୁଠୁ ସଶକ୍ତ, ସମୃଦ୍ଧ ରାଜ୍ୟ ହେବ ଓଡ଼ିଶା

ନୂଆଦିଲ୍ଲୀ: ୨୦୩୬ରେ ଓଡ଼ିଶା ରାଜ୍ୟ ସ୍ଥାପନାର ୧୦୦ ବର୍ଷ ପୂର୍ତ୍ତି ପାଳିବ। ଏହାକୁ ଦେଶର ସଶକ୍ତ, ସମୃଦ୍ଧ ତଥା ଦ୍ରୁତ ଅଗ୍ରସର ରାଜ୍ୟରେ ପରିଣତ କରିବାକୁ ଲକ୍ଷ୍ୟ ରଖାଯାଇଛି। ଓଡ଼ିଶା ଦେଶର ସଶକ୍ତ ରାଜ୍ୟ ହେଉ, ଏହା ଆମର ଲକ୍ଷ୍ୟ। ଏହା ପୂର୍ବ ଭାରତର ବିକାଶ ଇଞ୍ଜିନ୍‌ଭାବେ କାର୍ଯ୍ୟ କରିବ। ଓଡ଼ିଶାକୁ ଶୀର୍ଷ ସ୍ଥାନରେ ପହଞ୍ଚାଇବା ପାଇଁ ଗତ ଦଶ ବର୍ଷ ହେଲା ଅନବରତ ପ୍ରୟାସ ଜାରି ରହିଛି। ଫଳରେ ରାଜ୍ୟ ପାଇଁ ଆଜି ନୂଆ ଭବିଷ୍ୟତର ସମ୍ଭାବନା ବଢ଼ିଛି। ସ୍ଥାନୀୟ ଜବାହରଲାଲ ନେହରୁ ଷ୍ଟାଡିୟମ୍‌ରେ ଆୟୋଜିତ ୩ ଦିନିଆ ଓଡ଼ିଶା ପର୍ବ-୨୦୨୪ର ଉଦ୍‌ଯାପନୀ ସମାରୋହରେ ମୁଖ୍ୟ  ଅତିଥି ଭାବେ ଯୋଗ ଦେଇ ଏହା କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ପ୍ରଧାନମନ୍ତ୍ରୀ କହିଲେ, ଗତବର୍ଷ ତୁଳନାରେ ଏଥର କେନ୍ଦ୍ର ସରକାର ଓଡ଼ିଶାକୁ ୩୦ ପ୍ରତିଶତ ଅଧିକ ବଜେଟ୍‌ ଦେଇଛନ୍ତି। ଏବେ ରାଜ୍ୟରେ ‘ଇଜ୍‌ ଅଫ୍‌ ଡୁଇଂ ବିଜିନେସ୍‌’କୁ ବ୍ୟାପକ କରାଯିବ। ଓଡ଼ିଶା ନିବେଶକଙ୍କ ପାଇଁ ପ୍ରଥମ ପସନ୍ଦ ହେବ। ରାଜ୍ୟରେ ନୂଆ ସରକାର ଆସିବାର ପ୍ରଥମ ୧୦୦ ଦିନରେ ୪୫ ହଜାର କୋଟିର ନିବେଶକୁ ମଞ୍ଜୁରି ମିଳିଛି। ଓଡ଼ିଶା ପାଖରେ ଭିଜନ୍‌ ଓ ରୋଡ୍‌ମ୍ୟାପ୍‌ ରହିଛି। ପଶ୍ଚିମ ଓଡ଼ିଶାର ଜିଲ୍ଲାଗୁଡ଼ିକରେ ନୂଆ ଭିତ୍ତିଭୂମି ଜରିଆରେ ନୂଆ ସୁଯୋଗ ସୃଷ୍ଟି କରାଯିବ ବୋଲି ପ୍ରଧାନମନ୍ତ୍ରୀ ସୂଚନା ଦେଇଥିଲେ। ଓଡ଼ିଆରେ ‘ଜୟ ଜଗନ୍ନାଥ’ ସହ ଭାଷଣ ଆରମ୍ଭ କରିଥିଲେ ମୋଦୀ। ପ୍ରଧାନମନ୍ତ୍ରୀ କହିଥିଲେ, ଓଡ଼ିଶା ନିଜର ସାଂସ୍କୃତିକ ବିବିଧତା ଦ୍ବାରା ଭାରତକୁ ଜୀବନ୍ତ ରଖିବାରେ ବହୁତ ବଡ଼ ଭୂମିକା ପ୍ରତିପାଦନ କରୁଛି। ଓଡ଼ିଶା ଆରମ୍ଭରୁ ହିଁ ସନ୍ଥ ଓ ବିଦ୍ବାନଙ୍କ ଧରିତ୍ରୀ। ଏଠାରେ ବିଦ୍ବାନମାନେ ଲୋକଭାଷାରେ ସାରଳା ମହାଭାରତ, ଓଡ଼ିଆ ଭାଗବତ ଗ୍ରନ୍ଥକୁ ଘରେ ଘରେ ପହଞ୍ଚାଇବା କମ୍‌ କଥା ନୁହେଁ। ଏହା ଭାରତୀୟ ସଂସ୍କୃତିକୁ ରୁଦ୍ଧିମନ୍ତ କରିବାରେ ବେଶ ସହାୟକ ହୋଇଛି। ମହାପ୍ରଭୁ  ଜଗନ୍ନାଥଙ୍କ ରଥଯାତ୍ରାର ମହିମା ଅନନ୍ୟ। ଏହି ଅବସରରେ ମାଣିକ ଗଉଡ଼ୁଣୀ ଉପାଖ୍ୟାନ କଥା କହିଥିଲେ ପ୍ରଧାନମନ୍ତ୍ରୀ। 

ସନ୍ଥକବି ଭୀମଭୋଇଙ୍କ କାଳଜୟୀ ଲେଖା ‘ମୋ ଜୀବନ ପ‌ଛେ ନର୍କେ ପଡ଼ିଥାଉ ଜଗତ ଉଦ୍ଧାର ହେଉ’ ପଂକ୍ତିକୁ ପ୍ରଧାନମନ୍ତ୍ରୀ ବଖାଣି କହିଥିଲେ ଯେ ଏହା ହିଁ ହେଉଛି ଓଡ଼ିଶାର ପରମ ସଂସ୍କୃତି। ଓଡ଼ିଶାର ଝିଅ ଦ୍ରୌପଦୀ ମୁର୍ମୁ ଦେଶର ରାଷ୍ଟ୍ରପତି ଗର୍ବର ବିଷୟ। ଓଡ଼ିଶାର ମହିଳା ଆଗକୁ ବଢ଼ିଲେ ଓଡ଼ିଶା ଆଗକୁ ବଢ଼ିବ। ସ୍ବାଧୀନତା ଆନ୍ଦୋଳନରେ ଓଡ଼ିଆ ବୀରଙ୍କ ଅନେକ ଅବଦାନ ରହିଛି। ପାଇକ ବିଦ୍ରୋହ ଏହାର ଏକ ବଡ଼ ଉଦାହରଣ।  ପ୍ରଧାନମନ୍ତ୍ରୀ କଟକର ଐତିହାସିକ ବାଲିଯାତ୍ରା ଓଡ଼ିଶାର ସାମୁଦ୍ରିକ ସାମର୍ଥ୍ୟର ପ୍ରତୀକ ବୋଲି କହିଥିଲେ। ମୋଦୀ କହିଥିଲେ, ଯେତେବେଳେ ପ୍ରଯୁକ୍ତି ନଥିଲା ଏଠାକାର ନାବିକ ସମୁଦ୍ରରେ ଯାତ୍ରା କରୁଥିଲେ। ବେପାରୀମାନେ ସମୁଦ୍ରରେ ଇଣ୍ଡୋନେସିଆ, ବାଲି, ସୁମାତ୍ରା, ଜାଭା  ଯାଉଥିଲେ। ବ୍ୟବସାୟ ବାଣିଜ୍ୟ ତଥା ସଂସ୍କୃତିର ବିକାଶ ହୋଇଥିଲା। ବିକଶିତ ଭାରତ ପାଇଁ ଓଡ଼ିଶାର ସାମୁଦ୍ରିକ ଶକ୍ତିର ମହତ୍ତ୍ବପୂର୍ଣ୍ଣ ଭୂମିକା ରହିଛି।