ବରିଷ୍ଠ ନାଗରିକଙ୍କୁ ଉପହାର ଦେଲେ ମୋଦୀ: ୧୨,୮୫୦କୋଟିର ସ୍ୱାସ୍ଥ୍ୟସେବା ପ୍ରକଳ୍ପ ଆରମ୍ଭ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଧନତେରାସ ଅବସରରେ ଦେଶର ବରିଷ୍ଠ ନାଗରିକମାନଙ୍କୁ ଉପହାର ଦେଇଛନ୍ତି। ଏହା ଅନ୍ତର୍ଗତ ବରିଷ୍ଠ ନାଗରିକଙ୍କ ପାଇଁ ୧୨,୮୫୦କୋଟି ଟଙ୍କା ମୂଲ୍ୟର ସ୍ୱାସ୍ଥ୍ୟ ସେବା ପ୍ରକଳ୍ପର ଶୁଭାରମ୍ଭ କରାଯାଇଛି।  ମୋଦୀଙ୍କ ଏହି ଘୋଷଣା ଅନୁଯାୟୀ ଆୟୁଷ୍ମାନ ଭାରତ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା ( ପିଏମଜେଏୱାଇ ) ରେ ମଧ୍ୟ ପରିବର୍ତ୍ତନ କରାଯାଇଛି । ଯାହାର ପ୍ରତ୍ୟକ୍ଷ ସୁବିଧା ୭୦ବର୍ଷରୁ ଅଧିକ ବୟସ୍କ ନାଗରିକଙ୍କ ପାଇଁ ଉପଲବ୍ଧ ହେବ।

ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମଓ)ଅନୁଯାୟୀ ବର୍ତ୍ତମାନ ଆୟୁଷ୍ମାନ ଭାରତ ଯୋଜନା ଅଧୀନରେ ୭୦ ବର୍ଷରୁ ଅଧିକ ବୟସ୍କ ସମସ୍ତ ନାଗରିକ ଆୟକର ନିର୍ବିଶେଷରେ ମାଗଣା ସ୍ୱାସ୍ଥ୍ୟ କଭରେଜ ପାଇବେ। ଏହା ସହିତ ସେମାନେ କୌଣସି ଆର୍ଥିକ ଚିନ୍ତା ନ କରି ସ୍ୱାସ୍ଥ୍ୟ ସୁବିଧାଗୁଡ଼ିକର ଲାଭ ପାଇପାରିବେ।

ଏହା ସହିତ ପ୍ରଧାନମନ୍ତ୍ରୀ ମୋଦୀ ବୈଷୟିକ ପ୍ରଗତି, ସ୍ୱଚ୍ଛ ନିଯୁକ୍ତି ପ୍ରକ୍ରିୟା ଏବଂ ଖାଡି ପରି ପାରମ୍ପାରିକ ଶିଳ୍ପ ବିକାଶ ପାଇଁ ସରକାରଙ୍କ ପ୍ରତିବଦ୍ଧତା ବିଷୟରେ ଗୁରୁତ୍ବାରୋପ କରିଛନ୍ତି। ଭାରତକୁ ଏକ ଆତ୍ମନିର୍ଭରଶୀଳ ତଥା ପ୍ରଗତିଶୀଳ ଦେଶ କରିବା ଦିଗରେ ପ୍ରଧାନମନ୍ତ୍ରୀ ମୋଦୀଙ୍କ ଦୃଷ୍ଟିକୋଣ ରହିଛି। ଭାରତର ବୈଷୟିକ ପ୍ରଗତି ଏବଂ ଆତ୍ମନିର୍ଭରଶୀଳତା ହାସଲ କରିବା ମୁଖ୍ୟ ଲକ୍ଷ୍ୟ ବୋଲି ପ୍ରଧାନମନ୍ତ୍ରୀ କହିଛନ୍ତି।

ବୈଷୟିକ ପ୍ରଗତିର ଗୁରୁତ୍ୱକୁ ଦର୍ଶାଇ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ପୂର୍ବରୁ ଆଧୁନିକ ଜ୍ଞାନକୌଶଳ ଭାରତରେ ବିଳମ୍ବରେ ଆସୁଥିଲା। କେବଳ ପାଶ୍ଚାତ୍ୟ ଦେଶଗୁଡିକର ପୁରୁଣା ଟେକ୍ନୋଲୋଜି ଭାରତରେ ପହଞ୍ଚୁଥିଲା ଯାହା ଆମ ବିକାଶର ଗତି ମନ୍ଥର କରିଦେଉଥିଲା।  ଏହି ମାନସିକତାକୁ ପରିବର୍ତ୍ତନ କରିବାକୁ ପ୍ରଧାନମନ୍ତ୍ରୀ ନିଷ୍ପତ୍ତି ନେଇଛନ୍ତି।

ସେ କହିଛନ୍ତି ଯେ ପୂର୍ବ ସରକାରଙ୍କ ପୁରୁଣା ଚିନ୍ତାଧାରାରୁ ଦେଶକୁ ମୁକ୍ତ କରିବା ପାଇଁ ଆମେ କାମ ଆରମ୍ଭ କରିଛୁ। ଆମେ ମହାକାଶ, ସେମିକଣ୍ଡକ୍ଟର, ଇଲେକ୍ଟ୍ରୋନିକ୍ସ ଏବଂ ବୈଦ୍ୟୁତିକ ଯାନରେ ଦ୍ରୁତ ଅଗ୍ରଗତି କରିଛୁ। ଏହି କ୍ଷେତ୍ରଗୁଡିକରେ ଆତ୍ମନିର୍ଭରଶୀଳ ହେବା ଦ୍ୱାରା ନୂତନ ନିଯୁକ୍ତି ସୁଯୋଗ ସୃଷ୍ଟି ହେବ ଏବଂ ଭାରତ ବିଶ୍ୱ ବୈଷୟିକ ଦୌଡ଼ରେ ଆଗକୁ ବଢ଼ିପାରିବ ବ‌ୋଲି ପ୍ରଧାନମନ୍ତ୍ରୀ କହିଛନ୍ତି।

ଅଧିକ ପଢ଼ନ୍ତୁ:

ଜିନ୍‌ପିଙ୍ଗଙ୍କ ସ୍ୱପ୍ନର ପ୍ରକଳ୍ପକୁ ବଡ଼ ଝଟକା, ଭାରତର ବନ୍ଧୁ ବିଆରଆଇରେ ଯୋଗଦେବ ନାହିଁ

ଭାରତ ନଇଁବ ନାହିଁ, କାନାଡା ବିରୋଧରେ କଠୋର ଆଭିମୁଖ୍ୟ ଗ୍ରହଣ କରିବ: ଜୟଶଙ୍କର