ସାଇପ୍ରସ୍‌ରେ ମୋଦୀଙ୍କୁ ଭବ୍ୟ ସ୍ବାଗତ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର  ୩ ରାଷ୍ଟ୍ର   ଗସ୍ତରେ ଯାଇଛନ୍ତି। ପ୍ରଧାନମନ୍ତ୍ରୀ ଆଜି ପ୍ରଥମ ଦିବସରେ ସାଇପ୍ରସ  ଗସ୍ତ ଆରମ୍ଭ କରିଥିବା ବେଳେ ପରବର୍ତ୍ତୀ ସମୟରେ କାନାଡା ଓ କ୍ରୋଏସିଆ ଗସ୍ତ କରିବେ। ଏହି ୪ ଦିନିଆ ଗସ୍ତ କାଳରେ ପ୍ରଧାନମନ୍ତ୍ରୀ ୨୭ ହଜାର ୭୪୫ କିଲୋମିଟର ଯାତ୍ରା କରିବେ। ପ୍ରଧାନମନ୍ତ୍ରୀଙ୍କୁ ଆଜି ସାଇପ୍ରସ୍‌ରେ ଭବ୍ୟ ସ୍ବାଗତ କରାଯାଇଛି। ବିମାନବନନ୍ଦରରେ ମୋଦୀଙ୍କୁ ସାଇପ୍ରସ୍‌ ରାଷ୍ଟ୍ରପତି ନିକୋସ୍‌ ଖ୍ରିଷ୍ଟୋଡୋଲିଡେସ ଏବଂ ଅର୍ଥମନ୍ତ୍ରୀ କନ୍‌ଷ୍ଟାଣ୍ଟିନୋସ୍‌ କୋମ୍ବୋସ ପାଛୋଟି ନେଇଥିଲେ। ପ୍ରଧାନମନ୍ତ୍ରୀଙ୍କ ଏହି ଗସ୍ତ କାଳରେ ଭାରତ-ସାଇପ୍ରସ ମଧ୍ୟରେ ଗୁରୁତ୍ବପୂର୍ଣ୍ଣ  ରଣନୀତିକ ଚୁକ୍ତି ସ୍ବାକ୍ଷର ହେବା ସମ୍ଭାବନା ରହିଛି। 

ବୈଦେଶିକ ବ୍ୟାପାର ମନ୍ତ୍ରଣାଳୟ ଅନୁଯାୟୀ ପ୍ରଧାନମନ୍ତ୍ରୀ ଜୁନ୍ ୧୬ ପର୍ଯ୍ୟନ୍ତ ସାଇପ୍ରସରେ ରହିବେ। ଜୁନ୍ ୧୬ ଓ ୧୭ତାରିଖରେ ସେ କାନାଡାରେ ହେବାକୁ ଥିବା ଜି-୭ ଶିଖର ସମ୍ମିଳନୀରେ ଯୋଗଦେବେ। ଏହାପରେ ସେ ଜୁନ୍ ୧୮ରେ କ୍ରୋଏସିଆ ଗସ୍ତ କରିବେ। ଜୁନ୍ ୧୯ରେ ସେ ଭାରତ ଫେରିବେ। ସାଇପ୍ରସ୍‌ ଗସ୍ତରେ ଯାଇଥିବା ମୋଦି ହେଉଛନ୍ତି ତୃତୀୟ ଭାରତୀୟ ପ୍ରଧାନମନ୍ତ୍ରୀ । ୧୯୮୩ରେ ଇନ୍ଦିରା ଗାନ୍ଧୀ ଓ ୨୦୦୨ରେ ଅଟଳ ବିହାରୀ ବାଜପେୟୀ ସାଇପ୍ରସ୍‌ ଗସ୍ତରେ ଆସିଥିଲେ। 

ଭାରତ ଓ ସାଇପ୍ରସ୍‌ ମଧ୍ୟରେ କୂଟନୈତିକ ସମ୍ପର୍କ ସବୁବେଳେ ସୁଦୃଢ଼ ରହିଥିଲେ ହେଁ ଏଭଳି ଉଚ୍ଚସ୍ତରୀୟ ଗସ୍ତ ବିରଳ। ରାଷ୍ଟ୍ରପତି ରାମନାଥ କୋବିନ୍ଦ ୨୦୧୮ରେ ଏବଂ ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର ୨୦୨୨ରେ ସାଇପ୍ରସ୍‌ ଗସ୍ତ କରିଥିଲେ। ରାଜଧାନୀ ନିକୋସିଆରେ ପ୍ରଧାନମନ୍ତ୍ରୀଙ୍କ ବିଭିନ୍ନ କାର୍ଯ୍ୟକ୍ରମ ରହିଛି। ସେ ଲିମାସୋଲରେ ବ୍ୟବସାୟୀ ନେତାମାନଙ୍କୁ ମଧ୍ୟ ସମ୍ବୋଧିତ କରିବେ। ୨୦୧୫ ସୁଦ୍ଧା ସାଇପ୍ରସ୍‌ରେ ୨୭୦୦ ଭାରତୀୟ ରହୁଥିଲେ। ଏବେ ଏହି ସଂଖ୍ୟା ପ୍ରାୟ ୧୧,୫୦୦ରେ ପହଞ୍ଚିଛି ବୋଲି ସାଇପ୍ରସ୍‌ରେ ଅବସ୍ଥାପିତ ଭାରତୀୟ ହାଇକମିସନର  କହିଛନ୍ତି। ଯାହା କି ଗତ ୧୦ ବର୍ଷ ମଧ୍ୟରେ ୪ ଗୁଣ ବୃଦ୍ଧି ପାଇଛି । ଭାରତର ଯୋଗ ଏବଂ ଆୟୁର୍ବେଦ ମଧ୍ୟ ଏଠାରେ ବହୁତ ଲୋକପ୍ରିୟ । ଅନେକ ଭାରତୀୟ ଯୁବକ ଏଠାରେ ଯୋଗ ଶିକ୍ଷକ ଭାବେ କାର୍ଯ୍ୟ କରୁଛନ୍ତି।  ପ୍ରଧାନମନ୍ତ୍ରୀଙ୍କ ଏହି ଗସ୍ତ ତୁର୍କୀ ପାଇଁ ଏକ ବଡ଼ ଚେତାବନୀ ବୋଲି କୁହାଯାଉଛି।