୧୦୦ ଥର ହାତ ମିଳାଇଲେଣି, କିନ୍ତୁ ମନ ମିଶୁନାହିଁ: ମୋଦୀ

ଜୟପୁର: ଆସନ୍ତା ୨୫ ନଭେମ୍ବରରେ ରାଜସ୍ଥାନରେ ବିଧାନସଭା ନିର୍ବାଚନ ପାଇଁ ମତଦାନ ଅନୁଷ୍ଠିତ ହେବ। ଏଥିପାଇଁ ଏବେ କଂଗ୍ରେସ ଏବଂ ବିଜେପିର ପ୍ରଚାର ଅଭିଯାନ ଜୋରସୋରରେ ଚାଲିଛି | ରାଜସ୍ଥାନର ନାଗୋରରେ ଏକ ସମାବେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି, "ରାଜସ୍ଥାନର ଲାଲ ଡାଏରୀକୁ ନେଇ ଅନେକ ମାସ ଧରି ଚର୍ଚ୍ଚା ଚାଲିଛି। ଲାଲ ଡାଏରୀରେ କଂଗ୍ରେସର ନିଜ ନେତା କଂଗ୍ରେସର କୁଶାସନର ସମ୍ପୂର୍ଣ୍ଣ ବିବରଣୀ ଲେଖିଛନ୍ତି। ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ବର୍ତ୍ତମାନ ନିର୍ବାଚନ ସମୟରେ ଏହି ଲୋକମାନେ(ଗେହଲୋଟ-ପାଇଲଟ) ଅନିଚ୍ଛା ସତ୍ତ୍ୱେ ଫଟୋ ଉଠାଉଛନ୍ତି। " ସେ କହିଛନ୍ତି, "ଏଠାରେ ମୁଖ୍ୟମନ୍ତ୍ରୀ ନିଜେ ଏକ ସାଧାରଣ ସଭାରେ ସ୍ୱୀକାର କରିଛନ୍ତି ଯେ ତାଙ୍କ ପ୍ରାର୍ଥୀ, ତାଙ୍କ ବିଧାୟକମାନେ କୌଣସି କାମ କରିନାହାଁନ୍ତି ... କାରଣ ସେମାନେ ଏଠାରେ ନିଜ ଆସନ ବଂଚାଇବାରେ ବ୍ୟସ୍ତ ଥିଲେ।

ବର୍ତ୍ତମାନ, ଏପରି ପରିସ୍ଥିତିରେ ଥିବା ଦଳ ଆପଣମାନଙ୍କ ପାଇଁ କଣ କରିବ? ପ୍ରଧାନମନ୍ତ୍ରୀ ମୋଦୀ କହିଛନ୍ତି, "ରାଜସ୍ଥାନରେ କଂଗ୍ରେସ ଆପଣଙ୍କୁ ୫ ବର୍ଷରେ ବିଶ୍ୱାସଘାତକତା ଛଡା ଆଉ କିଛି ଦେଇ ନାହିଁ। କଂଗ୍ରେସ ଆପଣଙ୍କୁ ଏଠାରେ ଏମିତି ଏକ ସରକାର ଦେଇଛି ଯାହାକି ଦୁର୍ନୀତିରେ ପରିପୂର୍ଣ୍ଣ | ଯେଉଁଠାରେ ଲୋକଙ୍କ ଜୀବନ ସୁରକ୍ଷିତ ନୁହେଁ, ସେଠାରେ ଭଉଣୀ ଏବଂ ଝିଅଙ୍କ ସମ୍ମାନ ସୁରକ୍ଷିତ ନୁହେଁ | କଂଗ୍ରେସକୁ କଡା ଟାର୍ଗେଟ କରି ସେ କହିଛନ୍ତି, ରାଜସ୍ଥାନରେ ଗତ ପାଞ୍ଚ ବର୍ଷ ମଧ୍ୟରେ ପ୍ରତ୍ୟେକ ମାଫିଆ, ପ୍ରତ୍ୟେକ ଦଙ୍ଗାକାରୀ ନିଜକୁ କଂଗ୍ରେସ ସରକାରଙ୍କ ମୁଖ୍ୟମନ୍ତ୍ରୀଙ୍କଠାରୁ କମ୍ ବୋଲି ଭାବୁନଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅଶୋକ ଗେହଲୋଟ ଏବଂ ପାଇଲଟଙ୍କ ମଧ୍ୟରେ ହୋଇଥିବା କଳହ ଉପରେ କହିଛନ୍ତି, ଯେ ସେମାନେ ୧୦୦ ଥର ହାତ ମିଳାଇଲେଣି ସତ କିନ୍ତୁ ଉଭୟଙ୍କ ମଧ୍ୟରେ କୌଣସି ସମନ୍ୱୟ ନାହିଁ | ଉଭୟଙ୍କ ହୃଦୟ ମିଶିନାହିଁ | ହାତ ମିଶାଇବାର ମିଛ ଅଭିନୟ ହିଁ କରୁଛନ୍ତି |