ଧାରା ୩୭୦ ପାଇଁ ବି ମୋଦୀ କ୍ଷମା ମାଗିବେ : ଜମ୍ମୁ ଓ କଶ୍ମୀର କଂଗ୍ରେସ ମୁଖ୍ୟ
ଶ୍ରୀନଗର : କୃଷି ଆଇନ ପ୍ରତ୍ୟାହାର ପରେ କଶ୍ମୀରରେ ପୁଣି ଧାରା ୩୭୦ ଲାଗୁ ପାଇଁ ଜୋର ଦାବି ଉଠିବାରେ ଲାଗିଛି । ପିଡିପି ଓ ନ୍ୟାସନାଲ କନଫରେନ୍ସ ପରେ ଏବେ କଂଗ୍ରେସ ବି ଏହି ଦାବି କରିଛି ।
Sambad is now on WhatsApp
Join and get latest news updates delivered to you via WhatsApp
ପ୍ରଧାନମନ୍ତ୍ରୀ ଯେପରି କୃଷି ଆଇନ ପ୍ରତ୍ୟାହାର କରି କୃଷକମାନଙ୍କୁ କ୍ଷମା ମାଗିଲେ ସେପରି ୩୭୦ ପ୍ରତ୍ୟାହାର ପାଇଁ ସେ ଖୁବଶୀଘ୍ର କ୍ଷମା ମାଗିବେ ବୋଲି ଜମ୍ମୁ ଓ କଶ୍ମୀର କଂଗ୍ରେସ ମୁଖ୍ୟ ଗୁଲାମ ଅହମ୍ମଦ ମୀର କହିଛନ୍ତି । ଦକ୍ଷିଣ କଶ୍ମୀରର ଅନନ୍ତନାଗ ଜିଲ୍ଲାରେ ଦଳୀୟ କର୍ମୀମାନଙ୍କୁ ଉଦବୋଧନ ଦେବା ବେଳେ ସେ ଏକଥା କହିଛନ୍ତି ।
ପୂର୍ବରୁ ପିଡିପି ମୁଖ୍ୟ ମେହେବୁବା ମୁଫତି ଓ ନ୍ୟାସନାଲ କନଫରେନ୍ସ ମୁଖ୍ୟ ଫାରୁକ ଅବଦ୍ଦୁଲ୍ଲା ମଧ୍ୟ ଜମ୍ମୁ ଓ କଶ୍ମୀରରୁ ଧାରା ୩୭୦ ପ୍ରତ୍ୟାହାର ପାଇଁ ଦାବି କରିସାରିଛନ୍ତି । ଗତକାଲି କୃଷି ଆଇନ ପ୍ରତ୍ୟାହାର ସମ୍ପର୍କରେ ଘୋଷଣା ପରେ ମେହେବୁବା କହିଥିଲେ ଯେ ଆଗାମୀ ନିର୍ବାଚନରେ ହାରିବାର ଭୟ କାରଣରୁ ମୋଦୀ ସରକାର ଏପରି ନିଷ୍ପତ୍ତି ନେବାକୁ ବାଧ୍ୟ ହେଲେ । ଲୋକମାନଙ୍କୁ ସନ୍ତୁଷ୍ଟ କରିବାକୁ ବିଜେପି ଏହା କରିବାକୁ ବାଧ୍ୟ ହେଲା । ତେବେ ଦୁଃଖର କଥା ହେଉଛି କଶ୍ମୀରବାସୀଙ୍କୁ ଅପମାନିତ କଲେ ବିଜେପିର ମୁଖ୍ୟ ଭୋଟ ବ୍ୟାଙ୍କ ସନ୍ତୁଷ୍ଟ ହେଉଛନ୍ତି । ବିଜେପି ନିଜ ଭୋଟରମାନଙ୍କୁ ସନ୍ତୁଷ୍ଟ କରିବାକୁ ହିଁ କଶ୍ମୀରରୁ ଧାରା ୩୭୦ ପ୍ରତ୍ୟାହାର କରିଥିଲା । ଏବେ ସରକାର ନିଜର ଭୁଲ ସୁଧାରିବେ ବୋଲି ସେ ଆଶା ପ୍ରକାଶ କରିଥିଲେ । ସେହିପରି ଫାରୁକ ମଧ୍ୟ ଜମ୍ମୁ ଓ କଶ୍ମୀରରେ ଧାରା ୩୭୦, ୩୫କ ଲାଗୁ କରିବା ସହ ପୂର୍ଣ୍ଣ ରାଜ୍ୟମାନ୍ୟତା ଫେରାଇ ଦେବାକୁ ଦାବି କରିଥିଲେ ।