୨୫ରେ ଜାତିସଂଘ ସାଧାରଣ ପରିଷଦକୁ ସମ୍ବୋଧନ କରିବେ ମୋଦୀ, କ୍ବାଡ୍ ବୈଠକରେ ଯୋଗ ଦେବେ
ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆସନ୍ତା ୨୪ ତାରିଖରେ ଦୁଇଦିନିଆ ଆମେରିକା ଗସ୍ତରେ ଯିବେ । ୨୪ ତାରିଖରେ ସେ ଗୁରୁତ୍ବପୂର୍ଣ୍ଣ କ୍ବାଡ୍ ସଂଗଠନ ସମ୍ମିଳନୀରେ ଯୋଗ ଦେବେ । ତା’ ପର ଦିନ ସେ ମିଳିତ ଜାତିସଂଘର ସାଧାରଣ ପରିଷଦକୁ ସମ୍ବୋଧନ କରିବେ । ଏହା ସହିତ ମୋଦୀ ଆମେରିକା ରାଷ୍ଟ୍ରପତି ଜୋ ବାଇଡେନଙ୍କୁ ଭେଟିବେ ।
Sambad is now on WhatsApp
Join and get latest news updates delivered to you via WhatsApp
ପ୍ରଧାନମନ୍ତ୍ରୀଙ୍କ ଗସ୍ତ କାର୍ଯ୍ୟକ୍ରମ ସମ୍ପର୍କରେ ସୂଚନା ଦେଇ ବୈଦେଶିକ ମନ୍ତ୍ରାଳୟର ମୁଖପାତ୍ର ଅରିନ୍ଦମ୍ ବାଗଚୀ କହିଛନ୍ତି ଯେ ପ୍ରଧାନମନ୍ତ୍ରୀ ୨୪ରେ ଆମେରିକା ପହଞ୍ଚିବା ପରେ କ୍ବାଡ୍ ସଂଗଠନର ଏକ ଗୁରୁତ୍ବପୂର୍ଣ୍ଣ ବୈଠକରେ ଅଂଶଗ୍ରହଣ କରିବେ । ହ୍ବାଇଟ ହାଉସରେ ଅନୁଷ୍ଠିତ ହେବାକୁ ଥିବା ଏହି ବୈଠକରେ ମୋଦୀଙ୍କ ବ୍ୟତୀତ ବାଇଡେନ, ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ସ୍କଟ୍ ମୋରିସନ, ଜାପାନ ପ୍ରଧାନମନ୍ତ୍ରୀ ୟୋସିହିଡେ ସୁଗା ମଧ୍ୟ ଯୋଗ ଦେବେ ।
ତାଲିବାନ ଆଫଗାନିସ୍ତାନକୁ ଦଖଲ କରିବା ପରେ ସମଗ୍ର ବିଶ୍ବର ସୁରକ୍ଷା ପରିସ୍ଥିତି ବଦଳିବାରେ ଲାଗିଛି । ଆଫଗାନିସ୍ତାନରେ ଆତଙ୍କବାଦୀ ସଂଗଠନଗୁଡ଼ିକ ପୁଣି ନିଜର କାର୍ଯ୍ୟକଳାପ ଆରମ୍ଭ କରିବାର ଆଶଙ୍କା ରହିଛି । ଆହୁରି ମଧ୍ୟ ତାଲିବାନ ଉପରେ ପାକିସ୍ତାନ ଓ ଚୀନର ପ୍ରଭାବ ଯୋଗୁଁ ଭାରତ ପ୍ରତି ବିପଦ ବଢିବାର ଆଶଙ୍କା ରହିଛି । ବିଶ୍ବରେ ବଢିଚାଲିଥିବା ଚୀନର ଆଧିପତ୍ୟ ପରିପ୍ରେକ୍ଷୀରେ କ୍ବାଡ୍ ସଂଗଠନର ଗୁରୁତ୍ବ ବଢିଯାଇଛି ।