ଖୁବ୍‌ଶୀଘ୍ର ମୋଦୀ ଲଗାଇବେ ‘ଏକ ଦେଶ, ଏକ ନିର୍ବାଚନ’ ନୀତି

ନୂଆଦିଲ୍ଲୀ: ବିଜେପି ନେତୃତ୍ୱାଧୀନ ଜାତୀୟ ଗଣତାନ୍ତ୍ରିକ ମେଣ୍ଟ (ଏନ୍‌ଡିଏ) ସରକାର ଚଳିତ କାର୍ଯ୍ୟକାଳ ମଧ୍ୟରେ ହିଁ ‘ଏକ ଦେଶ, ଏକ ନିର୍ବାଚନ’  ନୀତି କାର୍ଯ୍ୟକାରୀ କରିବାକୁ ପ୍ରସ୍ତୁତି ଚଳାଇଛନ୍ତି। ଏହି ଗୁରୁତ୍ୱପୂର୍ଣ୍ଣ ନିର୍ବାଚନ ସଂସ୍କାର ବିଜେପିର ଦୀର୍ଘଦିନର ଏଜେଣ୍ଡା  ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କ ରାଜନୈତିକ ପ୍ରଚାର ସମୟରେ ଏହା ପ୍ରତି ତାଙ୍କର ପ୍ରତିବଦ୍ଧତା ଦୋହରାଇଛନ୍ତି। ଚଳିତ କାର୍ଯ୍ୟକାଳରେ ହିଁ ‘ଏକ ରାଷ୍ଟ୍ର, ଏକ ନିର୍ବାଚନ’ ବିଲ୍‌  ସଂସଦରେ ଗୃହୀତ ହେବ ବୋଲି ସରକାରଙ୍କ ବିଶ୍ୱାସ ରହିଛି।

 ସୂତ୍ରରୁ ପ୍ରକାଶ ଯେ ଏନ୍‌ଡିଏ ସରକାର  ଏହି କାର୍ଯ୍ୟକାଳରେ  ‘ଏକ ଦେଶ, ଏକ ନିର୍ବାଚନ’ ବିଲ୍‌  ଗୃହୀତ କରାଇପାରିବେ ବୋଲି ବିଶ୍ୱାସ ରଖିଛନ୍ତି। ୨୦୨୪ ଲୋକସଭା ନିର୍ବାଚନରେ ବିଜେପି ୨୪୦ଟି ଆସନ ହାସଲ କରିଥିଲା, ଯାହା ଏକକ ଦଳୀୟ ସଂଖ୍ୟାଗରିଷ୍ଠତା ପାଇଁ ଆବଶ୍ୟକ ୨୭୨ଟି ଆସନଠାରୁ କମ୍ ଥିଲା। ତେବେ ସହଯୋଗୀ ଦଳର ସମର୍ଥନରେ ସରକାର ଗଠନ ହୋଇଥିବାରୁ ଏକକାଳୀନ ନିର୍ବାଚନ ସଂସ୍କାର ପାଇଁ ଦଳୀୟ ସମର୍ଥନ ହାସଲ ହୋଇପାରିବ ବୋଲି ବିଜେପି ଆଶାବାଦୀ ରହିଛି। ଉଭୟ ଜାତୀୟ ଓ ରାଜ୍ୟ ନିର୍ବାଚନ ଏକା ସାଙ୍ଗରେ କରି ନିର୍ବାଚନ ପ୍ରକ୍ରିୟାକୁ ଶୃଙ୍ଖଳିତ କରିବା ‘ଏକ ଦେଶ, ଏକ ନିର୍ବାଚନ’ ନୀତିର ଲକ୍ଷ୍ୟ। ରାଜନୀତି ବିଶେଷଜ୍ଞମାନେ ଯୁକ୍ତି ବାଢ଼ିଛନ୍ତି ଯେ ଏହା ଭାରତୀୟ ରାଜନୀତିରେ ବର୍ତ୍ତମାନ ପ୍ରାଧାନ୍ୟ ରଖିଥିବା ବାରମ୍ବାର ନିର୍ବାଚନ ପ୍ରକ୍ରିୟାକୁ ହ୍ରାସ କରିବ ଏବଂ ଶାସନରେ ବାଧା ସୃଷ୍ଟିକୁ ରୋକିବ।  

ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ନେତୃତ୍ୱରେ ଗଠିତ ଏକ କମିଟି ଚଳିତ ବର୍ଷ ପ୍ରାରମ୍ଭରେ  ଏ ବାବଦ ରିପୋର୍ଟ ଦାଖଲ କରିବା ପରେ ଏହାକୁ ନେଇ ଏବେ ସରକାର ପ୍ରକ୍ରିୟା ତ୍ବରାନ୍ବିତ କରିବାକୁ ଚାହୁଛନ୍ତି। ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ପ୍ରଦାନ କରାଯାଇଥିବା ଏହି କମିଟିର ରିପୋର୍ଟ ଲୋକସଭା ଓ ବିଧାନସଭା ନିର୍ବାଚନ ଏକାସାଙ୍ଗରେ କରିବା ବିଚାରକୁ ଦୃଢ଼ ସମର୍ଥନ କରିଛି।