ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ତାଙ୍କ ଥାଇଲାଣ୍ଡ ପ୍ରତିପକ୍ଷ ପେତୋଙ୍ଗତର୍ନ ଶିନୱାତ୍ରାଙ୍କ ସହ ବ୍ୟାଙ୍କକ୍‌ରେ  ଦ୍ବିପାକ୍ଷିକ ଆଲୋଚନା କରିଛନ୍ତି। ଷଷ୍ଟ ବିମଷ୍ଟେକ୍‌ ସମ୍ମିଳନୀ‌ରେ ଯୋଗ ଦେବାପାଇଁ ମୋଦୀ ଆଜି ଥାଇଲାଣ୍ଡରେ ପହଞ୍ଚିବାର କିଛି ଘଣ୍ଟା ପରେ ଥାଇଲାଣ୍ଡ ପ୍ରତିପକ୍ଷଙ୍କ ସହ   କଥାବାର୍ତ୍ତା କରିଛନ୍ତି। ବ୍ୟାଙ୍କକ୍‌ରେ ଆଜି ମୋଦୀଙ୍କୁ ତାଙ୍କ ଥାଇ ପ୍ରତିପକ୍ଷ ଭବ୍ୟ ସ୍ବାଗତ କରିଥିଲେ।  ଏହାପରେ ୨  ନେତାଙ୍କ ମଧ୍ୟରେ ଦ୍ବିପାକ୍ଷିକ ବୈଠକ ଆରମ୍ଭ ହୋଇଥିଲା। କଥାବାର୍ତ୍ତା ପରେ  ପ୍ରଧାନମନ୍ତ୍ରୀ ମୋଦୀ କହିଛନ୍ତି, ପେତୋଙ୍ଗତର୍ନ ଶିନୱାତ୍ରାଙ୍କ ସହ ଅତ୍ୟନ୍ତ ଫଳପ୍ରଦ କଥାବାର୍ତ୍ତା ହୋଇଛି।

Advertisment

ବାଣିଜ୍ୟ ଓ ବିନିଯୋଗ, ପ୍ରତିରକ୍ଷା, ସୁରକ୍ଷା ଏବଂ ସାଇବର ଅପରାଧ ନିରାକରଣ ଓ ମାନବ ଚୋରାଚାଲାଣ କ୍ଷେତ୍ରରେ ଉଭୟ ରାଷ୍ଟ୍ର ଏକାଠି କାମ କରିବେ ଏବଂ ସହଯୋଗ ବୃଦ୍ଧି କରିବେ ବୋଲି ଉଭୟ ନେତା ରାଜି ହୋଇଛନ୍ତି। ସେହିପରି ସୁରକ୍ଷା ସଂସ୍ଥାଗୁଡ଼ିକ ମଧ୍ୟରେ ରଣନୀତିକ କଥାବାର୍ତ୍ତା କରିବା ସଂକ୍ରାନ୍ତରେ ମଧ୍ୟ ଆମେ ଆଲୋଚନା କରିଛୁ ବୋଲି ମୋଦୀ କହିଛନ୍ତି।   ଉଲ୍ଲେଖଯୋଗ୍ୟ,  ଆସନ୍ତାକାଲି  ବିମ୍‌ଷ୍ଟେକ୍‌ ସମ୍ମିଳନୀ ଅଛି। ଥାଇଲାଣ୍ଡ୍‌ ଦ୍ବାରା ଚଳିତ ବର୍ଷ ବିମଷ୍ଟେକ୍‌ ସମ୍ମିଳନୀ ଆୟୋଜନ ହେଉଛି। ଚୀନ୍‌କୁ ଇଙ୍ଗିତ କରି ମୋଦୀ କହିଛନ୍ତି, ଆମେ ବିକାଶ ନୀତିରେ ବିଶ୍ବାସ କରୁ, ବିସ୍ତାରବାଦରେ ନୁହେଁ।  ମୋଦୀ ମଧ୍ୟ ଥାଇଲାଣ୍ଡ୍‌ରେ ଭୂକମ୍ପଜନିତ ମୃତ୍ୟୁ ପାଇଁ ଗଭୀର ଶୋକ ପ୍ରକାଶ କରିଛନ୍ତି।  ଥାଇଲାଣ୍ଡରେ ସାଇବର ଅପରାଧର ଶିକାର ହୋଇଥିବା ଭାରତୀୟ ନାଗରିକଙ୍କୁ  ଫେରାଇବାରେ ଥାଇ ସରକାର କରିଥିବା ସହଯୋଗ ପାଇଁ ମୋଦୀ କୃତଜ୍ଞତା ଜ୍ଞାପନ କରିଛନ୍ତି।