ମୋହାଲି : ନିକଟରେ ମୋହାଲିସ୍ଥିତ ପଂଜାବ ପୁଲିସର ଗୁଇନ୍ଦା ମୁଖ୍ୟାଳୟ ଉପରେ ହୋଇଥିବା ଗ୍ରେନେଡ୍ ଆକ୍ରମଣ ପଛରେ ଖଲିସ୍ଥାନୀ ଆତଙ୍କବାଦୀ ସଂଗଠନ ବାବର ଖାଲସା ଓ ପାକିସ୍ତାନର ଗୁଇନ୍ଦା ସଂସ୍ଥା ଆଇଏସଆଇ ରହିଛି ବୋଲି ପଂଜାବ ପୁଲିସ ପକ୍ଷରୁ କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
ପଂଜାବ ପୁଲିସ ମହାନିର୍ଦ୍ଦେଶକ ଭି.କେ.ଭାଓ୍ବରା କହିଛନ୍ତି ଯେ, ଏହି ଆକ୍ରମଣ ଘଟଣାର ମୁଖ୍ୟ ଅଭିଯୁକ୍ତ ହେଉଛି ଲଖବୀର ସିଂ ଲଣ୍ଡା । ସେ ତରନତାରନ ଜିଲ୍ଲାର ଅଧିବାସୀ ଓ ଜଣେ ଗ୍ୟାଙ୍ଗଷ୍ଟର । ସେ ୨୦୧୭ରୁ କାନାଡାରେ ରହୁଛି । ସେ ହରିନ୍ଦର ସିଂ ରିଣ୍ଡାର ଜଣେ ଘନିଷ୍ଠ ସହଯୋଗୀ । ରିଣ୍ଡା ପାକିସ୍ତାନରେ ରହୁଛି ଓ ଆଇଏସଆଇ ନିର୍ଦ୍ଦେଶରେ କାମ କରୁଛି ।
ଲଣ୍ଡାର ଦୁଇ ସହଯୋଗୀ ନିଶାନ ସିଂ ଓ ଚରଦ ସିଂ ମଧ୍ୟ ତରନତାରନ ଜିଲ୍ଲାର ଅଧିବାସୀ । ଦୁଇଦିନ ତଳେ ଫରିଦକୋଟ ପୁଲିସ ଦ୍ବାରା ଗିରଫ ହୋଇଥିବା ନିଶାନ ସିଂ ମୁଖ୍ୟ ଅଭିଯୁକ୍ତମାନଙ୍କୁ ଆଶ୍ରୟ ଦେଇଥିଲା । ନିଶାନ ସିଂ ହିଁ ଅଭିଯୁକ୍ତକୁ ଆରପିଜି ( ରକେଟ ପ୍ରୋପେଲଡ ଗ୍ରେନେଡ୍) ପ୍ରଦାନ କରିଥିଲା ।
ଗତ ସୋମବାର ସଂଧ୍ୟାରେ ମୋହାଲି ସ୍ଥିତ ପଂଜାବ ପୁଲିସର ଗୁଇନ୍ଦା ମୁଖ୍ୟାଳୟର ୩ୟ ମହଲାଗକୁ ଲକ୍ଷ୍ୟ କରି ଖଲିସ୍ଥାନୀ ଆତଙ୍କବାଦୀମାନେ ଏକ ଆରପିଜି ନିକ୍ଷେପ କରିଥିଲେ । ଅତି ସୁରକ୍ଷିତ ଏହି କୋଠା ଉପରକୁ ଗ୍ରେନେଡ ମାଡ ପରେ ସାରା ରାଜ୍ୟରେ ଆତଙ୍କ ଖେଳିଯାଇଥିଲା ।