ମନି ଲଣ୍ଡରିଂ ଗିରଫଦାରୀ ‘ମନମୁଖୀ ନୁହେଁ’: ସୁପ୍ରିମ୍ କୋର୍ଟ
ନୂଆଦିଲ୍ଲୀ: ମନି ଲଣ୍ଡରିଂ ନିବାରଣ ଆଇନ (ପିଏମଏଲଏ) ଅଧୀନରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)ର କ୍ଷମତାକୁ ବୁଧବାର ସୁପ୍ରିମ କୋର୍ଟ ସମର୍ଥନ କରିଛନ୍ତି। ସୁପ୍ରିମ୍ କୋର୍ଟ ନିଜ ରାୟରେ କହିଛନ୍ତି ଯେ ମନି ଲଣ୍ଡରିଂ ନିବାରଣ ଆଇନ ଅଧୀନରେ ଅଭିଯୁକ୍ତକୁ ଗିରଫ କରିବାର କ୍ଷମତା ସହିତ ଜଡିତ ଧାରା ୧୯ ମନମୁଖୀତାର ଦୁର୍ଗୁଣରେ ପୀଡିତ ନୁହେଁ।
Sambad is now on WhatsApp
Join and get latest news updates delivered to you via WhatsApp
ପିଏମଏଲଏର କିଛି ବ୍ୟବସ୍ଥାର ବୈଧତାକୁ ବଜାୟ ରଖି ସୁପ୍ରିମ୍ କୋର୍ଟର ବିଚାରପତି ଜଷ୍ଟିସ ଏଏମ ଖାନୱିଲକରଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଏହା ମଧ୍ୟ କହିଛନ୍ତି ଯେ ମନି ଲଣ୍ଡରିଂରେ ଜଡିତ ବ୍ୟକ୍ତିଙ୍କ ସମ୍ପତ୍ତି ବାଜ୍ୟାପ୍ତ ବା ସଂଲଗ୍ନ କରିବା ସମ୍ବନ୍ଧୀୟ ଆଇନର ଧାରା ୫ ସାମ୍ବିଧାନିକ ଭାବରେ ବୈଧ ଅଟେ। ସର୍ବୋଚ୍ଚ ଅଦାଲତ କହିଛନ୍ତି ଯେ ସମ୍ପୃକ୍ତ ବ୍ୟକ୍ତିଙ୍କୁ ପ୍ରତ୍ୟେକ କ୍ଷେତ୍ରରେ ଏନଫୋର୍ସମେଣ୍ଟ କେସ୍ ସୂଚନା ରିପୋର୍ଟ (ଇସିଆଇଆର) ଯୋଗାଣ ବାଧ୍ୟତାମୂଳକ ନୁହେଁ।
ଇସିଆଇଆର ହେଉଛି ଇଡିର ପୁଲିସ ଏଫଆଇଆରର ସମକକ୍ଷ। ସୁପ୍ରିମ୍ କୋର୍ଟର ବିଚାରପତି ଜଷ୍ଟିସ ଏଏମ ଖାନୱିଲକରଙ୍କ ଅଧ୍ୟକ୍ଷତାରେ ଜଷ୍ଟିସ ଦୀନେଶ ମହେଶ୍ୱରୀ ଏବଂ ଜଷ୍ଟିସ ସିଟି ରବିକୁମାରଙ୍କୁ ନେଇ ଗଠିତ ତିନି ଜଣିଆ ଖଣ୍ଡପୀଠ କହିଛନ୍ତି ଯେ ଗିରଫ ସମୟରେ ଇଡି ଗିରଫଦାରୀର ଆଧାର ପ୍ରକାଶ କଲେ ଏହା ଯଥେଷ୍ଟ।
ପିଏମଏଲଏ ଅଧିନିୟମ ୨୦୦୨ର ଧାରା ୧୯ର ସାମ୍ବିଧାନିକ ବୈଧତା ପାଇଁ ହୋଇଥିବା ଚ୍ୟାଲେଞ୍ଜକୁ ପ୍ରତ୍ୟାଖ୍ୟାନ କରି ସର୍ବୋଚ୍ଚ ନ୍ୟାୟାଳୟ କହିଛନ୍ତି, ୨୦୦୨ ଅଧିନିୟମର ଧାରା ୧୯ର ସାମ୍ବିଧାନିକ ବୈଧତା ଚ୍ୟାଲେଞ୍ଜକୁ ମଧ୍ୟ ପ୍ରତ୍ୟାଖ୍ୟାନ କରାଯାଇଛି। ଧାରା ୧୯ରେ କଠୋର ସୁରକ୍ଷା ବ୍ୟବସ୍ଥା ପ୍ରଦାନ କରାଯାଇଛି ଏହି ବ୍ୟବସ୍ଥା ମନମୁଖୀତାର ଦୁର୍ଗୁଣରେ ପୀଡିତ ନୁହେଁ ବୋଲି ସୁପ୍ରିମ୍ କୋର୍ଟ ସ୍ପଷ୍ଟ କରି ଦେଇଛନ୍ତି।