ମୋ ଅନୁପସ୍ଥିତରେ ମୋ ଘରେ ଟଙ୍କା ରଖାଯାଇଛି: ଅର୍ପିତା ମୁଖାର୍ଜୀ

କୋଲକାତା: ପଶ୍ଚିମବଙ୍ଗ ଶିକ୍ଷକ ନିଯୁକ୍ତି ଦୁର୍ନୀତି ମାମଲାରେ ଗିରଫ ପୂର୍ବତନ ମନ୍ତ୍ରୀ ପାର୍ଥ ଚାଟାର୍ଜୀ ଓ ତାଙ୍କ ଘନିଷ୍ଠ ସହଯୋଗୀ ଅର୍ପିତା ମୁଖାର୍ଜୀ ଇଡି ଜାଲରେ ବାନ୍ଧି ହୋଇ ପଡ଼ିଛନ୍ତି। ଅର୍ପିତାଙ୍କ ଘରୁ କୋଟି କୋଟି ଟଙ୍କା ଜବତ ହେଉଥିବା ବେଳେ ଏହି ଟଙ୍କାଗୁଡ଼ିକ ସେ ନଥିବା ବେ‌ଳେ ପାର୍ଥ ତାଙ୍କ ଘରେ ରଖୁଥିଲେ ବୋଲି ଇଡିକୁ କହିଛନ୍ତି। ସେ କହିଛନ୍ତି ଯେ ‘ଏହି ଟଙ୍କା ମୋର ନୁହେଁ କି ମୁଁ ଉପସ୍ଥିତ ଥିବା ସମୟରେ ଏହା ମୋର ଘରେ ରଖାଯାଇ ନାହିଁ’।

ଏବେ ସୁଦ୍ଧା ପାର୍ଥ ଚାଟାର୍ଜୀ ଓ ଅର୍ପିତା ମୁର୍ଖାଜୀଙ୍କ ବିଭିନ୍ନ ଫ୍ଲାଟ୍‌ରୁ ୫୦ କୋଟିରୁ ଊର୍ଦ୍ଧ୍ବ ଟଙ୍କା ଜବତ କଲା ପରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)ର ଦୃଷ୍ଟି ଏବେ ପଡ଼ିଛି ପାର୍ଥ-ଅର୍ପିତାଙ୍କ ୧୧ଟି ବ୍ୟାଙ୍କ ଆକାଉଣ୍ଟ ଉପରେ।

ଏଥିରୁ ୩ଟି ଆକାଉଣ୍ଟ ହେଉଛି ପାର୍ଥଙ୍କର ଏବଂ ୮ଟି ଅର୍ପିତାଙ୍କର। ଏହି ଆକାଉଣ୍ଟଗୁଡ଼ିକରେ ପ୍ରାୟ ୮ କୋଟି ଟଙ୍କା ରହିଥିବା ବେଳେ ସେଥିରୁ ୨.୫ କୋଟି ଟଙ୍କାକୁ ଫ୍ରିଜ୍ (ଅଚଳ) କରିଦିଆଯାଇଛି। ଇଡିର କହିବା ଅନୁସାରେ ପାର୍ଥଙ୍କର ୫ଟି ଆକାଉଣ୍ଟ ଅଛି। ସେଥିରୁ ଦୁଇଟି ଅଛି ରାଷ୍ଟ୍ରାୟତ୍ତ ବ୍ୟାଙ୍କରେ ଏବଂ ଗୋଟିଏ ଅଛି ଘରୋଇ ବ୍ୟାଙ୍କରେ।

ସେ ୨୦୨୧ରେ ନିର୍ବାଚନ କମିସନ ନିକଟରେ କରିଥିବା ସତ୍ୟପାଠ ଅନୁଯାୟୀ ତାଙ୍କ ବ୍ୟାଙ୍କ ଖାତାଗୁଡ଼ିକରେ ପ୍ରାୟ ୬୦ ଲକ୍ଷ ଟଙ୍କା ଥିଲା। ଅର୍ପିତାଙ୍କ ସହ ତାଙ୍କର ୧୦ ବର୍ଷରୁ ଅଧିକ କାଳ ହେଲା ସମ୍ପର୍କ ରହିଛି ବୋଲି ଇଡି କେତେକ କାଗଜପତ୍ରରୁ ଜାଣିବାକୁ ପାଇଛି। କାରଣ ଅନେକ ବୀମା ପଲିସିରେ ପାର୍ଥ ଅର୍ପିତାଙ୍କୁ ନୋମିନି କରିଛନ୍ତି। ୨୦୧୨ ଜାନୁଆରିରେ ଦୁହେଁ ବୋଲପୁରରେ ଜମି କିଣିଥିଲେ। ୨୦ ଲକ୍ଷ ଟଙ୍କା ଦେଇ ସେମାନେ ୨ ମହଲା ଘର ସହ ୨୦ କାଠା ଜମି କିଣିଥିଲେ।