ନୂଆଦିଲ୍ଲୀ: ସଂସଦର ମୌସୁମୀ ଅଧିବେଶନ ଆଜିଠାରୁ ଆରମ୍ଭ ହୋଇଛି। ଅଧିବେଶନର ପ୍ରଥମ ଦିନରେ ଉଭୟ ଗୃହରେ ବିରୋଧୀଙ୍କ ହୋହଲ୍ଲା ଏବଂ ହଟ୍ଟଗୋଳ ଦେଖିବାକୁ ମିଳିଛି। ପହଲଗାମ ଆତଙ୍କବାଦୀ ଆକ୍ରମଣ ଏବଂ ଅପରେସନ୍‌ ସିନ୍ଦୂର ସଂକ୍ରାନ୍ତରେ ଆଲୋଚନା ଦାବି କରି ବିରୋଧୀମାନେ ଗୃହରେ ହୋହଲ୍ଲା କରିବାରୁ ପ୍ରଥମ ଦିନରେ ଲୋକସଭାକୁ ୪ ଥର ମୁଲତବୀ କରିବାକୁ ପଡ଼ିଥିଲା। ରାଜ୍ୟସଭାକୁ ମଧ୍ୟ ବାରମ୍ବାର ମୁଲତବୀ କରାଯାଇଥିଲା। ପରେ ଉଭୟ ଗୃହକୁ ଆସନ୍ତାକାଲି ପର୍ଯ୍ୟନ୍ତ ମୁଲତବୀ ରଖାଯାଇଛି। ହୋହଲ୍ଲା ମଧ୍ୟରେ ଆଜି ରାଜ୍ୟସଭାରେ ବିଲ୍‌ସ ଅଫ୍‌ ଲେଡିଂ ବିଲ୍‌-୨୦୨୫ ଗୃହୀତ ହୋଇଛି। ପୂର୍ବରୁ ଗତ ମାର୍ଚ୍ଚରେ ଏହି ବିଲ୍‌ ଲୋକସଭାରେ ଗୃହୀତ ହୋଇଥିଲା। ଏହି ବିଲ୍‌ ଗୃହୀତ ହେବା ଫଳରେ ଜାହାଜ ଚଳାଚଳ ସଂକ୍ରାନ୍ତ ଦସ୍ତାବିଜର ଆଇନଗତ ଢାଞ୍ଚା ସରଳ ହେବ।   

Advertisment

ଜଷ୍ଟିସ୍‌ ବର୍ମାଙ୍କ ବିରୋଧରେ ମହାଭିଯୋଗ ନୋଟିସ୍‌କୁ ୨୦୦ରୁ ଅଧିକ ସାଂସଦଙ୍କ ସମର୍ଥନ

ପହଲଗାମ ଆତଙ୍କବାଦୀ ଆକ୍ରମଣର ଷଡ୍‌ଯନ୍ତ୍ରକାରୀ ଏବେ ବି ଧରାପଡ଼ି ନଥିବାରୁ ବିରୋଧୀ ସଦସ୍ୟମାନେ ଏଥିପାଇଁ ସରକାରଙ୍କୁ କଡ଼ା ସମାଲୋଚନା କରିଛନ୍ତି ଏବଂ ଗୃହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପସ୍ଥିତି ଦାବି କରିଥିଲେ। ଇତିମଧ୍ୟରେ ରାଜ୍ୟସଭାରେ କେନ୍ଦ୍ରମନ୍ତ୍ରୀ ଜେପି ନଡ୍ଡା ଏବଂ ଲୋକସଭାରେ କିରଣ ରିଜିଜୁ କହିଛନ୍ତି, ସରକାର ଯେକୌଣସି ପ୍ରସଙ୍ଗରେ ଆଲୋଚନା ପାଇଁ ପ୍ରସ୍ତୁତ ଅଛନ୍ତି। କିନ୍ତୁ ଏହା ନିୟମ ଅନୁଯାୟୀ ‌ହେବା ଉଚିତ। ଅନ୍ୟପକ୍ଷେ ସଂସଦରେ ଗୁରୁତ୍ୱପୂର୍ଣ୍ଣ ପ୍ରସଙ୍ଗଗୁଡ଼ିକ ଉପରେ ଆଲୋଚନା ପାଇଁ ସରକାର ସମୟ ଦେଇଛନ୍ତି। ଅପରେସନ୍ ସିନ୍ଦୂର ସଂକ୍ରାନ୍ତରେ ଲୋକସଭାରେ ୧୬ ଘଣ୍ଟା ଏବଂ ରାଜ୍ୟସଭାରେ ୯ ଘଣ୍ଟା ପାଇଁ ବିତର୍କ ହେବ। ଏହା ବ୍ୟତୀତ, ଆୟକର ସଂଶୋଧନ ବିଲ୍ ଉପରେ ଲୋକସଭାରେ ୧୨ ଘଣ୍ଟା ବିତର୍କ ହେବାର କାର୍ଯ୍ୟକ୍ରମ ରହିଛି।
ଅନ୍ୟପକ୍ଷରେ ଅହମଦାବାଦରେ ହୋଇଥିବା ଏୟାର ଇଣ୍ଡିଆର ବିମାନ ଦୁର୍ଘଟଣା ପ୍ରସଙ୍ଗ ମଧ୍ୟ ବିରୋଧୀ ଉଠାଇଥିଲେ। ସେହିଭଳି ଜଷ୍ଟିସ୍ ଯଶବନ୍ତ ବର୍ମାଙ୍କ ମହାଭିଯୋଗ ପ୍ରସଙ୍ଗରେ ସହମତି ଦେଖାଦେଇଛି। ମହାଭିଯୋଗ ପ୍ରସ୍ତାବ ନୋଟିସ୍‌ରେ ୨୦୦ରୁ ଅଧିକ ସାଂସଦ ଦସ୍ତଖତ କରିଛନ୍ତି। ସେମାନଙ୍କ ମଧ୍ୟରେ ଲୋକସଭାର ୧୪୫ ସାଂସଦ ଏବଂ ରାଜ୍ୟସଭାର ୬୩ ସାଂସଦ ରହିଛନ୍ତି। ବିଚାରପତିଙ୍କୁ ବିଦା କରିବା ପାଇଁ ନୋଟିସ୍‌ରେ ଅତିକମ୍‌ରେ ଲୋକସଭାର ୧୦୦ ଏବଂ ରାଜ୍ୟସଭାର ୫୦ ସାଂସଦଙ୍କ ଦସ୍ତଖତ ଆବଶ୍ୟକ।