ନୂଆଦିଲ୍ଲୀ: ଜୁଲାଇ ୨୧ରୁ ସଂସଦର ମୌସୁମୀ ଅଧିବେଶନ ଆରମ୍ଭ ହେବାକୁ ଯାଉଛି। ଏହି ଅଧିବେଶନରେ ପୁଣି ଥରେ ଶାସକ ବିଜେପି ଓ କଂଗ୍ରେସ ନେତୃତ୍ୱାଧୀନ ଇଣ୍ଡି ମେଣ୍ଟ ସମେତ ବିରୋଧୀଙ୍କ ମଧ୍ୟରେ ତମ୍ବିତୋଫାନ ହେବା  ସମ୍ଭାବନା ରହିଛି। ମିଳିଥିବା ସୂଚନା ଅନୁଯାୟୀ, ମୌସୁମୀ ଅଧିବେଶନ ପାଇଁ ୮ଟି ନୂଆ ବିଲ୍ ଏବଂ ମଣିପୁରରେ ରାଷ୍ଟ୍ରପତି ଶାସନ ବୃଦ୍ଧି ପ୍ରସ୍ତାବ ଏଜେଣ୍ଡାରେ ରହିଛି।
 ବିହାର ବିଧାନସଭା ନିର୍ବାଚନ ସଂପ ଆଲୋଚନା
ଅଗଷ୍ଟ ୨୧ ତାରିଖ ପର୍ଯ୍ୟନ୍ତ ହେବାକୁ ଥିବା ଅଧିବେଶନରେ ଅଗଷ୍ଟ ୧୨ରୁ ୧୮ ପର୍ଯ୍ୟନ୍ତ ଛୁଟିକୁ ମିଶାଇ ମୋଟ ୨୧ଟି ବୈଠକ ବସିବ। ଚଳିତ ବର୍ଷ ଶେଷଭାଗରେ ହେବାକୁ ଥିବା ବିହାର ବିଧାନସଭା ନିର୍ବାଚନ ପୂର୍ବରୁ ନିର୍ବାଚନ ଆୟୋଗଙ୍କ ଦ୍ୱାରା କରାଯାଉଥିବା ଏକ ସ୍ୱତନ୍ତ୍ର ଭୋଟର ତାଲିକା ସଂଶୋଧନ ମଧ୍ୟ ବିତର୍କର ବିଷୟ ହେବ। ନିର୍ବାଚନର କିଛି ମାସ ପୂର୍ବରୁ ଭୋଟର ତାଲିକା ସଂଶୋଧନ ନିଷ୍ପତ୍ତିକୁ ବିହାରରେ ବିରୋଧୀ, କଂଗ୍ରେସ ଓ ଆର୍‌ଜେଡି ବିରୋଧ କରୁଛନ୍ତି।
 ଜଷ୍ଟିସ୍ ଯଶବନ୍ତ ବର୍ମାଙ୍କ ବିରୋଧରେ ମହାଭିଯୋଗ ନେଇ ହେବ ଚର୍ଚ୍ଚା
ଚଳିତ ଅଧିବେଶନରେ ଦିଲ୍ଲୀ ହାଇକୋର୍ଟର ପୂର୍ବତନ ବିଚାରପତି ଯଶୋବନ୍ତ ବର୍ମାଙ୍କ ବିରୋଧରେ ମଧ୍ୟ ଆଲୋଚନା ହେବାର ସମ୍ଭାବନା ରହିଛି। ମାର୍ଚ୍ଚ ମାସରେ ଦିଲ୍ଲୀସ୍ଥିତ ତାଙ୍କ ବଙ୍ଗଳାରେ ନିଆଁ ଲିଭାଇବା ସମୟରେ ଅଗ୍ନିଶମ ବାହିନୀ ବସ୍ତାବସ୍ତା ଦରପୋଡ଼ା ନଗଦ ଟଙ୍କା ପାଇଥିଲେ। ବିଚାରପତି ତାଙ୍କ ତରଫରୁ କୌଣସି ଭୁଲ୍‌କୁ ଅସ୍ୱୀକାର କରିବା ସହ ଜବତ ନଗଦ ଟଙ୍କାକୁ ଏକ ଷଡ଼୍‌ଯନ୍ତ୍ର ବୋଲି କହିଥିଲେ।
 ‘ଅପରେସନ୍ ସିନ୍ଦୂର’ ଉପରେ ବି ଆଲୋଚନା ହୋଇପାରେ
ସଂସଦରେ ପହଲଗାମ ଆତଙ୍କବାଦୀ ଆକ୍ରମଣ ଓ ପରବର୍ତ୍ତୀ ସମୟରେ ଭାରତ ଦ୍ୱାରା କରାଯାଇଥିବା ସାମରିକ ଅଭିଯାନ ‘ଅପରେସନ ସିନ୍ଦୂର’ ଉପରେ ମଧ୍ୟ ଆଲୋଚନା ହେବାର  ସମ୍ଭାବନା ରହିଛି।
 ନୂଆ ଆୟକର ବିଲ୍ ପାସ୍‌ ହୋଇପାରେ
ଏହାବ୍ୟତୀତ ନୂଆ ଆୟକର ବିଲ୍‌କୁ ମଧ୍ୟ ପାରିତ କରିବାକୁ ସରକାର ବିଚାର କରିବେ। ଗତ ଅଧିବେଶନରେ ଏହାକୁ ଉପସ୍ଥାପିତ କରାଯାଇଥିଲା ଏବଂ ପରେ ଅଧିକ ଯାଞ୍ଚ ପାଇଁ ଏକ ଯୁଗ୍ମ ସଂସଦୀୟ କମିଟିକୁ ପଠାଯାଇଥିଲା। ଯଦି ଏହି ଅଧିବେଶନରେ ଏହା ପାରିତ ହୁଏ ତେବେ ଏହା ଖୁବ୍‌ଶୀଘ୍ର ଆଇନରେ ପରିଣତ ହେବ। ଅର୍ଥମନ୍ତ୍ରୀ ନିର୍ମଳା ସୀତାରମଣ ଫେବ୍ରୁଆରି ମାସରେ ସଂସଦରେ କହିଥିଲେ ଯେ ଏହି ନୂତନ ବିଲ୍ ୧୯୬୧ର ଆୟକର ଆଇନର ଜଟିଳ ପରିଭାଷାକୁ ହ୍ରାସ କରିବ। ଯଦି ଏହି ଅଧିବେଶନରେ ଏହା ପାରିତ ହୁଏ ତେବେ ୨୦୨୬ ଏପ୍ରିଲ ପହିଲାରୁ ଏହି ଆଇନ ଲାଗୁ ହେବ।