ଉଦ୍ଧବ ଠାକ୍‌ରେ ମୁଖ୍ୟମନ୍ତ୍ରୀ ବାସଭବନ ଛାଡ଼ିବା ପରେ ଆସାମସ୍ଥିତ ସିନ୍ଦେଙ୍କ ଶିବିରରେ ଯୋଗ ଦେଉଛନ୍ତି ଅଧିକ ବିଧାୟକ

ମୁମ୍ବାଇ: ବୁଧବାର ରାତିରେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ଉଦ୍ଧବ ଠାକ୍‌ରେ ସରକାରୀ ବାସଭବନ ‘ବର୍ଷା’ରୁ ପାରିବାରିକ ବାସଭବନ ‘ମାତୋଶ୍ରୀ’କୁ ଚାଲିଯିବା ପରେ ଆସାମସ୍ଥିତ ଏକନାଥ ସିନ୍ଦେଙ୍କ ଶିବିରରେ ଅଧିକ ବିଧାୟକ ଯୋଗ ଦେଉଥିବା କଥା ବିଭିନ୍ନ ଗଣମାଧ୍ୟମ ରିପୋର୍ଟ କରୁଛନ୍ତି।

ସେହି କ୍ରମରେ ଆଜି ମଧ୍ୟ ବିଦ୍ରୋହୀ ଶିବସେନା ନେତା ଏକନାଥ ସିନ୍ଦେ ଏବଂ ଅନ୍ୟ ବିଧାୟକମାନଙ୍କ ସହିତ ଯୋଗ ଦେବା ପାଇଁ ମହାରାଷ୍ଟ୍ରର ଆଉ ୩ଜଣ ବିଧାୟକ ଆସାମର ଗୌହାଟୀରେ ପହଞ୍ଚିଛନ୍ତି। ବୁଧବାର ରାତିରେ ମଧ୍ୟ ବିଧାୟକ ଚନ୍ଦ୍ରକାନ୍ତ ପାଟିଲ୍‌, ଯୋଗେଶ କଦମ, ମଞ୍ଜୁଳା ଗାୱିତ୍‌ ଏବଂ ଗୁଲାବରାଓ ପାଟିଲ୍‌ ମଧ୍ୟ ସିନ୍ଦେ ଓ ତାଙ୍କ ସହଯୋଗୀ ନେତାମାନେ ଶିବିର ପକାଇଥିବା ଗୌହାଟୀସ୍ଥିତ ରେଡିସନ୍‌ ବ୍ଲୁ ହୋଟେଲ୍‌ରେ ପହଞ୍ଚିଥିଲେ।

Image Courtesy of Times of India

ମହାରାଷ୍ଟ୍ରର ରାଜ୍ୟପାଳ ଭଗତ ସିଂହ କୋଶ୍ୟାରୀଙ୍କୁ ‘ଶିବସେନା ବିଧାୟକ ଦଳ’ଦ୍ବାରା ଅନୁମୋଦିତ ୩୪ଜଣ ବିଧାୟକଙ୍କ ସ୍ବାକ୍ଷର ଥିବା ଏକ ପ୍ରସ୍ତାବନାରେ ଉଲ୍ଲେଖ ଅଛି ଯେ, ବ‌ିଦ୍ରୋହୀ ନେତା ଏକନାଥ ସିନ୍ଦେ ସେମାନଙ୍କର ନେତା ଅଟନ୍ତି। ମଙ୍ଗଳବାର ଦିନ ଗୃହୀତ ହୋଇଥିବା ଉକ୍ତ ପ୍ରସ୍ତାବନା‌ରେ ଉଲ୍ଲେଖ ଅଛି ଯେ, ୨୦୧୯ରେ ସର୍ବସମ୍ମତିକ୍ରମେ ‘ଶିବସେନା ବିଧାୟକ ଦଳ’ର ନେତା ନିର୍ବାଚିତ ହୋଇଥିବା ଏକନାଥ ସିନ୍ଦେ ବିଧାୟକ ଦଳର ନେତା ହୋଇ ରହିବେ।

ଆଜି ୧୧.୩୦ରେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ଉଦ୍ଧବ ଠାକ୍‌ରେ ତାଙ୍କ ପାରିବାରିକ ବାସଭବନ ‘ମାତୋଶ୍ରୀ’ରେ ଦଳୀୟ ବୈଠକ ଡକାଇଛନ୍ତି।

ସମ୍ବନ୍ଧିତ ଖବର