ଜିତୁଜିତୁ ଅଳ୍ପକେ ହାରିଗଲେ ଉପମୁଖ୍ୟମନ୍ତ୍ରୀ, କଣ ହେବ ମୌର୍ଯ୍ୟଙ୍କ ଭାଗ୍ୟ?
ନୂଆଦିଲ୍ଲୀ: ଉତ୍ତରପ୍ରଦେଶରେ ଭାରତୀୟ ଜନତା ପାର୍ଟି (ବିଜେପି) ର ଐତିହାସିକ ବିଜୟ ପରେ ଯୋଗୀ ଆଦିତ୍ୟନାଥ ପୁଣିଥରେ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବେ | ଯଦିଓ ଯୋଗୀ ଆଦିତ୍ୟନାଥ ତାଙ୍କ ଗଡ଼ ଗୋରଖପୁରରୁ ସହଜରେ ଜିତିଛନ୍ତି, କିନ୍ତୁ ସିରାଥୁରେ ବିଜେପିକୁ ଏକ ବଡ଼ ଝଟକା ଲାଗିଛି | କାରଣ ଏଠାରୁ ପ୍ରାର୍ଥୀ ଭାବେ ନିର୍ବାଚନ ଲଢ଼ିଥିବା ଉତ୍ତରପ୍ରଦେଶର ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ନିର୍ବାଚନରେ ହାରିଯାଇଛନ୍ତି । ବର୍ତ୍ତମାନ ବଡ ପ୍ରଶ୍ନ ହେଉଛି, ଯେ କେଶବ ପ୍ରସାଦ ମୋୖର୍ଯ୍ୟଙ୍କ ରାଜନୈତିକ ଯାତ୍ରା ଉପରେ ଏହି ପରାଜୟର ପ୍ରଭାବ କ’ଣ ପଡିବ? ପରାଜୟ ସତ୍ତ୍ୱେ ବିଜେପି ତାଙ୍କୁ ଉପମୁଖ୍ୟମନ୍ତ୍ରୀ କରିବ ନା ତାଙ୍କ ଭୂମିକାରେ କୌଣସି ପରିବର୍ତ୍ତନ ହେବ ? ସୂଚନା ଥାଉ କି ଗତକାଲି ଆସିଥିବା ଫଳାଫଳରେ ସମାଜବାଦୀ ପାର୍ଟିର ଚିହ୍ନରେ ନିର୍ବାଚନ ଲଢ଼ୁଥିବା ଅପନା ଦଳ ନେତ୍ରୀ ପଲ୍ଲବୀ ପଟେଲ ମୌର୍ଯ୍ୟଙ୍କୁ ୭,୩୩୭ ଭୋଟରେ ପରାସ୍ତ କରିଥିଲେ ।
Sambad is now on WhatsApp
Join and get latest news updates delivered to you via WhatsApp
ପଲ୍ଲବୀଙ୍କୁ ୪୬.୪୯ ପ୍ରତିଶତ ଭୋଟ୍ ଏବଂ ମୌର୍ଯ୍ୟଙ୍କୁ ୪୩.୨୮% ଭୋଟ୍ ପାଇଥିଲେ । ଫଳାଫଳ ଘୋଷଣା ପରେ ମୌର୍ଯ୍ୟ ଟ୍ୱିଟ୍ କରି କହିଛନ୍ତି ଯେ ମୁଁ ସିରାଥୁବାସୀଙ୍କ ନିଷ୍ପତ୍ତିକୁ ନମ୍ରତାର ସହ ଗ୍ରହଣ କରୁଛି। ମୁଁ ବିଜେପି କର୍ମୀଙ୍କୁ ସେମାନଙ୍କ କଠିନ ପରିଶ୍ରମ ପାଇଁ ଧନ୍ୟବାଦ ଜଣାଉଛି ଏବଂ ଭୋଟରଙ୍କ ପାଖରେ କୃତଜ୍ଞ, ଯେଉଁମାନେ ମୋ ଉପରେ ବିଶ୍ୱାସ ରଖିଛନ୍ତି। ଏକୁଟିଆ ୨୫୫ଟି ଆସନ ଜିତିଥିବା ବିଜେପି ପାଇଁ ଏହା ଏକ ବଡ ଝଟକା ହୋଇଥିବାବେଳେ ମୌର୍ଯ୍ୟଙ୍କ ଭୂମିକା କଣ ହେବ ତାହାକୁ ନେଇ ଏବେ ପ୍ରଶ୍ନ ଉଠିଛି |
ମୌର୍ଯ୍ୟ ପୁଣି ଥରେ ଉପମୁଖ୍ୟମନ୍ତ୍ରୀ ବା କ୍ୟାବିନେଟ ମନ୍ତ୍ରୀ ହେବେ ନା ନାହିଁ ତାହାକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଥିବାବେଳେ ମନ୍ତ୍ରୀ ହେବା ପାଇଁ ବିଧାନସଭା କିମ୍ବା ବିଧାନ ପରିଷଦର ସଦସ୍ୟ ହେବା ଆବଶ୍ୟକ। ତଥାପି, ଜଣେ ସଦସ୍ୟ ନଥିଲେ ମଧ୍ୟ ଶପଥ ନେଇପାରିବେ କିନ୍ତୁ ୬ ମାସ ମଧ୍ୟରେ ଉଭୟ ଗୃହରୁ କୌଣସି ଗୋଟିଏ ବି ଗୃହକୁ ନିର୍ବାଚିତ ହେବାକୁ ପଡ଼ିବ |