ଆଜିଠୁ ସର୍ବସାଧାରଣଙ୍କ ଲାଗି ଖୋଲିଲା ରାଷ୍ଟ୍ରପତି ଭବନର ମୋଗଲ୍ ଉଦ୍ୟାନ
ନୂଆଦିଲ୍ଲୀ: ଆଜି ଠାରୁ ରାଷ୍ଟ୍ରପତି ଭବନ ପରିସରରେ ଥିବା ନାନା ଜାତି ଫୁଲଭରା ପ୍ରସିଦ୍ଧ ମୋଗଲ୍ ବାଟିକା ସର୍ବସାଧାରଣଙ୍କ ନିମନ୍ତେ ଉନ୍ମୁକ୍ତ ହୋଇଛି। ସ୍ୱତନ୍ତ୍ର ଭାବେ ରୋପଣ କରାଯାଇଥିବା ଫୁଲଗଛ ସବୁରେ ଏହି ମାସରେ ପର୍ଯ୍ୟାୟକ୍ରମେ ଉଜ୍ଜ୍ୱଳ ରଙ୍ଗର ଫୁଲ ଧରିବ।
Sambad is now on WhatsApp
Join and get latest news updates delivered to you via WhatsApp
ଦର୍ଶକମାନେ ଫେବ୍ରୁଆରି ୧୩ ତାରିଖରୁ ମାର୍ଚ ୨୧ ତାରିଖ ପର୍ଯ୍ୟନ୍ତ ପୂର୍ବାହ୍ନ ୧୦ଟାରୁ ସନ୍ଧ୍ୟା ୫ଟ ପର୍ଯ୍ୟନ୍ତ ଏହି ୧୫ ଏକର ବିଶିଷ୍ଟ ପୁଷ୍ପବାଟିକାରେ ପ୍ରବେଶ କରି ପାରିବେ। କିନ୍ତୁ, ଦେଖାରଖା ନିମନ୍ତେ ପ୍ରତି ସୋମବାର ଦିନ ଉଦ୍ୟାନ ବନ୍ଦ ରହିବ ବୋଲି ରାଷ୍ଟ୍ରପତି ଭବନରୁ ପ୍ରକାଶିତ ବିଜ୍ଞପ୍ତିରେ ଉଲ୍ଲେଖ ରହିଛି।
କୋଭିଡ୍-୧୯ ମହାମାରୀ ଯୋଗୁଁ ଏ ବର୍ଷ କେବଳ ଅନ୍ଲାଇନ୍ ବୁକିଙ୍ଗ୍ ଆଧାରରେ ବାଟିକା ମଧ୍ୟକୁ ପ୍ରବେଶାନୁମତି ମିଳିବ। ପୂର୍ବବର୍ଷମାନଙ୍କ ଭଳି ‘ଓ୍ଵାକ୍-ଇନ୍-ଏଣ୍ଟ୍ରି’ ଏବର୍ଷ ନିଷେଧ କରାଯାଇଛି। ୭ ଘଣ୍ଟିଆ ସ୍ଲଟ୍ରେ ଏହି ଅନ୍ଲାଇନ୍ ବୁକିଙ୍ଗ୍ କରାଯିବ ଏବଂ ପ୍ରତି ସ୍ଲଟ୍ରେ ରହିବେ ୧୦୦ ଜଣ ଦର୍ଶକ।
ରାଷ୍ଟ୍ରପତିଙ୍କ ଗଣମାଧ୍ୟମ ଉପସଚିବ କୀର୍ତ୍ତି ତିଓ୍ଵାରୀ କହିଛନ୍ତି ଯେ, ଉଦ୍ୟାନ ମଧ୍ୟରେ ଦର୍ଶକମାନଙ୍କ ଯାତାୟାତ ପଥରେ ପିଇବା ପାଣି, ଶୌଚାଳୟ ଏବଂ ପ୍ରାଥମିକ ଚିକିତ୍ସା ଆଦି ବ୍ୟବସ୍ଥା କରାଯାଇଛି।
ରାଷ୍ଟ୍ରପତିଙ୍କ ଇଷ୍ଟେଟ୍ର ୩୫ ନମ୍ବର ଫାଟକ ମଧ୍ୟରେ ଦେଇ ଅନ୍ଲାଇନ୍ ଦର୍ଶକମାନେ ପ୍ରବେଶ ଓ ପ୍ରସ୍ଥାନ କରି ପାରିବେ। ଏଠାରେ ଉତ୍ତର ଆଭେନ୍ୟୁ ରାଷ୍ଟ୍ରପତି ଭବନ ସହ ମିଶିଛି।