ମୁଇଜୁଙ୍କ ଭାରତ ଗସ୍ତ: ମାଳଦ୍ୱୀପ ସହ ମୁଦ୍ରା ଅଦଳବଦଳ ଚୁକ୍ତି

ନୂଆଦିଲ୍ଲୀ: ଭାରତ ଓ ମାଳଦ୍ୱୀପ ମଧ୍ୟରେ ୪୦୦ ନିୟୁତ ଆମେରିକୀୟ ଡଲାର ବା ୩୦୦୦ କୋଟି ଟଙ୍କାର ମୁଦ୍ରା ଅଦଳବଦଳ ଚୁକ୍ତି ହୋଇଛି। ମାଳଦ୍ବୀପ ରାଷ୍ଟ୍ରପତି ମୁଇଜୁ ତାଙ୍କର ପ୍ରଥମ ରାଷ୍ଟ୍ରୀୟ ଗସ୍ତରେ ଭାରତ ଆସିଥିବା ବେଳେ ଏହି ଚୁକ୍ତି କରାଯାଇଛି। ମୁଇଜୁ ରବିବାର ସନ୍ଧ୍ୟାରେ ଦିଲ୍ଲୀରେ ପହଞ୍ଚିଥିଲେ। ଗୋଟିଏ ଦିନର ବିଶ୍ରାମ ପରେ ରାଷ୍ଟ୍ରପତିଭବନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କୁ ଆନୁଷ୍ଠାନିକ ସ୍ୱାଗତ କରିଥିଲେ। ଏହାପରେ ରାଜଘାଟରେ ମହାତ୍ମା ଗାନ୍ଧୀଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିବା ପରେ ମୁଇଜୁ ମୋଦୀଙ୍କ ସହ ଆଲୋଚନା କରିଥିଲେ।

ଦୁଇ ନେତାଙ୍କ ସାକ୍ଷାତ୍ ପରେ ଏକ ମିଳିତ ବିବୃତିରେ ମୋଦୀ ଏହି ଦ୍ୱୀପ ରାଷ୍ଟ୍ରକୁ ‘ଘନିଷ୍ଠ ବନ୍ଧୁ’ ଭାବରେ ଦେଖୁଥିବା ନେଇ ନୂଆଦିଲ୍ଲୀର ଆଭିମୁଖ୍ୟ ଉପରେ ଆଲୋକପାତ କରିଥିଲେ ଏବଂ ତାଙ୍କ ‘ପଡ଼ୋଶୀ ପ୍ରଥମ’ ନୀତି ଉପରେ ଗୁରୁତ୍ୱାରୋପ କରିଥିଲେ। ମୋଦୀ କହିଥିଲେ, ଅତ୍ୟାବଶ୍ୟକ ସାମଗ୍ରୀ ହେଉ, କୋଭିଡ୍ ଟିକା ଯୋଗାଣ ହେଉ କିମ୍ବା ପିଇବା ପାଣି ହେଉ... ଆମେ ଏକ ଭଲ ପଡ଼ୋଶୀ ଭୂମିକା ନିଭାଇଛୁ।  ଭାରତ ଆଜି ହା ଧାଲୁ ଆଟୋଲରେ ହନିମାଧୁ ଅନ୍ତର୍ଜାତୀୟ ବିମାନବନ୍ଦରକୁ ଭର୍ଚୁଆଲ ଭାବେ ଉଦ୍‌ଘାଟନ କରିଥିଲା ଏବଂ ଏହା ପୂର୍ବରୁ ୭୦୦ଟି ସାମାଜିକ ଆବାସ ୟୁନିଟ୍ ହସ୍ତାନ୍ତର କରିବା ସହିତ ୨୮ଟି ଦ୍ୱୀପରେ ପାଖାପାଖି ୩୦,୦୦୦ ଲୋକଙ୍କୁ ସେବା ଯୋଗାଇବା ପାଇଁ ପାନୀୟ ଜଳ ଓ ସ୍ୱେରେଜ୍ ପ୍ରକଳ୍ପ ସ୍ଥାପନ କରିଥିଲା। ଗତବର୍ଷ ‘ଚୀନ୍ ସମର୍ଥକ’ ନେତା ଭାବେ ପରିଚିତ ମୁଇଜୁ ‘ଇଣ୍ଡିଆ ଆଉଟ୍’ ସ୍ଲୋଗାନ୍ ଦେଇ ନିର୍ବାଚନ ଜିତିବା ପରେ ଏହାକୁ ସରକାର ଭିତରେ ଅନେକ ଲୋକ ବିରୋଧ କରିଥିଲେ। ପୂର୍ବରୁ ମୁଇଜୁ ତିନୋଟି ବିମାନ ଚଳାଚଳ ପାଇଁ ମାଳଦ୍ୱୀପରେ ଥିବା ଭାରତର ୯୦ ଜଣ ସାମରିକ କର୍ମଚାରୀଙ୍କୁ ପ୍ରତ୍ୟାହାର କରିବାକୁ ଦିଲ୍ଲୀକୁ ଅନୁରୋଧ କରିଥିଲେ।

ଏହି ତିନୋଟି ବିମାନ- ଦୁଇଟି ହେଲିକପ୍ଟର ଓ ଗୋଟିଏ ଡୋନିୟର ବିମାନ ମାନବିକ ଓ ଚିକିତ୍ସା ସହାୟତା ପାଇଁ ଭାରତ ପକ୍ଷରୁ ଉପହାର ସ୍ବରୂପ ଦିଆଯାଇଥିଲା। ଆଲୋଚନା ପରେ ଦିଲ୍ଲୀ ସାମରିକ କର୍ମଚାରୀଙ୍କ ସ୍ଥାନରେ ଦକ୍ଷ ବୈଷୟିକ କର୍ମଚାରୀଙ୍କୁ ନିଯୁକ୍ତି ଦେଇଛି। ସାମରିକ କର୍ମଚାରୀଙ୍କୁ ପ୍ରତ୍ୟାହାର ବିଷୟରେ ମୁଇଜୁ କହିଛନ୍ତି, ମାଳଦ୍ୱୀପ ଲୋକମାନେ ମୋତେ ଯାହା କହିଥିଲେ ମୁଁ କେବଳ ତାହା ହିଁ କରିଛି।  ଇତିମଧ୍ୟରେ, ସମ୍ପର୍କ ପୁନଃସ୍ଥାପନ କରିବାର ଏକ ଅଂଶ ଭାବରେ, ଭାରତ ଓ ମାଳଦ୍ୱୀପ ଉକ୍ତ ମୁଦ୍ରା ଅଦଳବଦଳ ଚୁକ୍ତି ଘୋଷଣା କରିଛନ୍ତି। ଏହା ଏକ ଆର୍ଥିକ ଚୁକ୍ତି ଯେଉଁଥିରେ ଦୁଇ ପକ୍ଷ ଏକ ନିର୍ଦ୍ଦିଷ୍ଟ ସମୟ ମଧ୍ୟରେ ବିଭିନ୍ନ ମୁଦ୍ରାରେ ଋଣର ମୂଳ ଓ ସୁଧ ବିନିମୟ କରିପାରିବେ, ଯାହା ମାଲେକୁ ବୈଦେଶିକ ମୁଦ୍ରା ସଂରକ୍ଷଣ ସମସ୍ୟାରୁ ମୁକୁଳିବାରେ ସାହାଯ୍ୟ କରିବ। ଶ୍ରୀଲଙ୍କା ସମେତ ମାଲେ ଓ ଭାରତ ମହାସାଗରୀୟ ଅଞ୍ଚଳରେ ଚୀନ୍‌ର ପ୍ରଭାବକୁ ଦୂର କରିବା ପାଇଁ ଦିଲ୍ଲୀ ଚାହୁଥିବାରୁ ଏହା ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି।

ଭାରତ ମଧ୍ୟ ଟ୍ରେଜେରି ବିଲ୍‌ ବାବଦକୁ ୧୦୦ ନିୟୁତ ଆମେରିକୀୟ ଡଲାରର ରୋଲଓଭର ପ୍ରଦାନ କରିଛି। ୪୦୦ ନିୟୁତ ଆମେରିକୀୟ ଡଲାର ଦ୍ୱିପାକ୍ଷିକ ମୁଦ୍ରା ଅଦଳବଦଳ ବ୍ୟତୀତ ୩୦ ବିଲିୟନ ଟଙ୍କା ସହାୟତା ପ୍ରଦାନ କରିବାକୁ ଭାରତର ନିଷ୍ପତ୍ତି ପାଇଁ ମୁଇଜୁ ନୂଆଦିଲ୍ଲୀକୁ ଧନ୍ୟବାଦ ଜଣାଇଛନ୍ତି। ଅନ୍ୟ ଦ୍ୱିପାକ୍ଷିକ ପଦକ୍ଷେପଗୁଡ଼ିକ ହେଲା ନ୍ୟାସନାଲ ପେମେଣ୍ଟ କର୍ପୋରେସନ୍ ଅଫ୍ ଇଣ୍ଡିଆ ଦ୍ୱାରା ଜାରି ‘ରୁପେ’ କାର୍ଡର ଶୁଭାରମ୍ଭ। ଗ୍ରେଟର ମାଲେ ଅଞ୍ଚଳ ପାଇଁ ଏକ ଭିତ୍ତିଭୂମି ପ୍ରକଳ୍ପରେ ମଧ୍ୟ ଭାରତ ମାଳଦ୍ୱୀପକୁ ସହାୟତା କରୁଛି।