ଅମ୍ବାନୀ ଓ ଆଦାନୀଙ୍କୁ ମାଲାମାଲ୍‌ କରାଇଲା ଅସ୍ତ୍ରବିରତି

ନୂଆଦିଲ୍ଲୀ: ଭାରତ-ପାକ୍ ଯୁଦ୍ଧକୁ ନେଇ ପ୍ରାୟ ସମସ୍ତଙ୍କ ମନରେ ଗୋଟିଏ କଥା ଉଙ୍କି ମାରୁଥିଲା, ତାହା ହେଉଛି ଯୁଦ୍ଧ ହେଲେ ଦେଶ ବହୁତ ବର୍ଷ ପଛକୁ ପଳାଇବ । ସେୟାର ବଜାରରେ ହ୍ରାସ ଦେଖିବାକୁ ମିଳିବ । ଯୁଦ୍ଧ ହୋଇଥିଲେ ବୋଧ ହୁଏ ଏକଥା ସତ ବି ହୋଇପାରିଥାନ୍ତା, କିନ୍ତୁ ଭାରତ-ପାକ୍ ଯୁଦ୍ଧ ବନ୍ଦ ହେବା ଭାରତୀୟ ନିବେଶକ ଏବଂ ବଡ ବ୍ୟବସାୟୀଙ୍କୁ ବଡ ଫାଇଦା ଆଣି ଦେଇଛି। 

ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧବିରତି ଘୋଷଣା ପରେ, ସପ୍ତାହର ପ୍ରଥମ ବ୍ୟବସାୟ ଦିନ ସୋମବାର ଷ୍ଟକ ବଜାରରେ ଏକ ବଡ଼ ବୃଦ୍ଧି ଦେଖିବାକୁ ମିଳିଛି । ସେନସେକ୍ସ ୩.୭୪ ପ୍ରତିଶତ ବା ୨୯୭୫.୪୩ ପଏଣ୍ଟ ବୃଦ୍ଧି ପାଇ ୮୨,୪୨୯.୯୦ ରେ ପହଞ୍ଚିଥିବା ଦେଖିବାକୁ ମିଳିଥିଲା । ଦିନର କାରବାର ସମୟରେ, ସେନସେକ୍ସ ୩୦୦୦ ପଏଣ୍ଟରୁ ଅଧିକ ବୃଦ୍ଧି ପାଇଥିଲା । ନିଫ୍ଟି ମଧ୍ୟ ଭଲ ପ୍ରଦର୍ଶନ କରିଥିଲା ଏବଂ ୯୧୬.୬୦ ପଏଣ୍ଟ ଅର୍ଥାତ୍ ୩.୮୨ ପ୍ରତିଶତ ବୃଦ୍ଧି ସହିତ ୨୪୯୨୪.୭୦ ପଏଣ୍ଟରେ ବନ୍ଦ ହୋଇଥିଲା । 

ଲାଭ କମାଇଲେ ଆଦାନୀ-ଅମ୍ବାନୀ 
ସେୟାର ବଜାରରେ ବୃଦ୍ଧି କାରଣରୁ ନିବେଶକଙ୍କ ସମେତ ଅମ୍ବାନୀ ଓ ଆଦାନୀଙ୍କୁ ବି ବଡ ଫାଇଦା ମିଳିଛି । ଦେଶର ଦୁଇ ବଡ଼ ବ୍ୟବସାୟୀ ମୁକେଶ ଅମ୍ବାନୀ ଏବଂ ଗୌତମ ଆଦାନୀ ମଧ୍ୟ ସେୟାର ବଜାରର ଏହି ବୃଦ୍ଧିରୁ ଲାଭ କମାଇଛନ୍ତି । ଦୁହେଁ ଗୋଟିଏ ଦିନରେ ୧୦୦ ବିଲିୟନ ଡଲାର ରୋଜଗାର କରିଛନ୍ତି । 

ସୂଚକାଙ୍କ ଅନୁଯାୟୀ, ସୋମବାର ଦିନ, ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍ ଅଧ୍ୟକ୍ଷ ମୁକେଶ ଅମ୍ବାନୀଙ୍କ ନେଟ୍ ସମ୍ପତ୍ତି ୪.୪୨ ବିଲିୟନ ଡଲାର ଅର୍ଥାତ୍ ପ୍ରାୟ ୪୪୨ କୋଟି ଡଲାର ବୃଦ୍ଧି ପାଇଛି । ଠିକ୍ ସେହିପରି, ଆଦାନୀ ଗ୍ରୁପ୍ ପ୍ରତିଷ୍ଠାତା ଗୌତମ ଆଦାନୀଙ୍କ ନେଟ୍ ସମ୍ପତ୍ତି ଗୋଟିଏ ଦିନରେ ୫.୩୧ ବିଲିୟନ ଡଲାର ଅର୍ଥାତ୍ ୫୩୧ କୋଟି ଡଲାର ବୃଦ୍ଧି ପାଇଛି । ବଡ କଥା ହେଉଛି ଏହା ସହିତ ଗୌତମ ଆଦାନୀ ପୁଣି ଥରେ ବିଶ୍ୱର ୨୦ ଜଣ ଧନୀ ବ୍ୟକ୍ତିଙ୍କ ତାଲିକାରେ ସାମିଲ ହୋଇଛନ୍ତି । ସୋମବାର ଦିନ, ଭାରତୀୟ ଷ୍ଟକ୍ ବଜାରରେ ପ୍ରାୟ ୪ ବର୍ଷ ମଧ୍ୟରେ ସବୁଠାରୁ ବଡ଼ ବୃଦ୍ଧି ଦେଖିବାକୁ ମିଳିଥିଲା । ଫଳସ୍ୱରୂପ, ନିବେଶକମାନେ ଗୋଟିଏ ଦିନରେ ୧୬ ଲକ୍ଷ କୋଟି ଟଙ୍କାରୁ ଅଧିକ ରୋଜଗାର କରିଛନ୍ତି ।