ବିଜେପି ପ୍ରାର୍ଥୀ ତାଲିକାରେ ନାମ ନଥିବା ଦେଖି ଭୋଭୋ ହୋଇ କାନ୍ଦି ନେତା କହିଲେ, ‘ଏହା ମୋତେ ବହୁତ କଷ୍ଟ ଦେଇଛି’

ନୂଆଦିଲ୍ଲୀ: ଆଗକୁ ରାଜସ୍ଥାନ ବିଧାନସଭା ନିର୍ବାଚନ ହେବାକୁ ଯାଉଛି। ଏଥିପାଇଁ ବିଜେପି ତା'ର ପ୍ରଥମ ପ୍ରାର୍ଥୀ ତାଲିକା ଜାରି କରି ଦେଇଛି। ଜାରି ହୋଇଥିବା ତାଲିକାରେ ଦଳରୁ ଟିକେଟ ମିଳିବ ବୋଲି ଆଶା କରିଥିବା କିଛି ନେତା ନିଜ ନାମ ସେଥିରେ ନଥିବା ଦେଖି ନିରାଶ ହୋଇ ପଡ଼ିଥି‌ଲେ। ଏମିତି କି ନିଜ ସମର୍ଥକଙ୍କ ଗହଣରେ ଛିଡ଼ା ହୋଇ ଭୋଭୋ ହୋଇ କାନ୍ଦିଥିଲେ। ଏମିତି ଜଣେ  ନେତା ହେଉଛନ୍ତି ମୁକେଶ ଗୋଏଲ୍‌।

ରାଜସ୍ଥାନର କୋଟପୁତଲି ଆସନରୁ ବିଜେପି ତାଙ୍କୁ ଟିକେଟ ଦେବ ବୋଲି ସେ ଆଶା କରିଥିଲେ। ଏମିତି କି ପ୍ରାର୍ଥୀ ହେବାପରେ ସେ କ’ଣ କ’ଣ କରିବେ ସେସବୁର ଯୋଜନା ବି କରି ‌ଦେଇଥିଲେ। ହେଲେ ବିଜେପି ପ୍ରାର୍ଥୀ ତାଲିକାରେ ତାଙ୍କ ନାମ ରଖି ନଥିଲା। ଏହା ଜାଣିବା ପରେ ମୁକେଶ ନିରାଶ ହେବା ସହିତ ତାଙ୍କର ସମସ୍ତ ଆଶ ଆକାଂକ୍ଷା ପାଣି ଫୋଟକା ପରି ମେଳାଇ ଯାଇଛି।

ଏହି ଘଟଣାପରେ ସେ ତାଙ୍କ ସମର୍ଥକଙ୍କ ଗହଣକୁ ‌ଆସି ‌ଭୋଭୋ ହୋଇ କାନ୍ଦିଥିଲେ। ଏମିତି କି ଗଣମାଧ୍ୟମ ତାଙ୍କ ସାମ୍ନାକୁ ଆସିବା ପରେ ବି ସେ ନିଜ କୋହକୁ ଅଟକାଇ ପାରି ନଥିଲେ। ପ୍ରାର୍ଥୀ ତାଲିକାରେ ନିଜର ନାମକୁ ନପାଇବା ଘଟଣା ତାଙ୍କୁ ବହୁତ କଷ୍ଟ ଦେଇଛି ବୋଲି ମୁକେଶ କହିଛନ୍ତି।

ମୁକେଶ ଗୋଏଲଙ୍କ ରାଜନୀତି ଜୀବନ କଥା କହିବାକୁ ଗଲେ ସେ ୨୦୧୮ ରାଜସ୍ଥାନ ବିଧାନସଭା ନିର୍ବାଚନ ଲଢ଼ିଥିଲେ । ହେଲ ସେ ଏଥିରେ ପରାଜିତ ହୋଇଯାଇଥିଲେ। କଂଗ୍ରେସ ପ୍ରାର୍ଥୀ ରାଜେନ୍ଦ୍ର ସିଂହ ଯାଦବ ତାଙ୍କୁ ୧୩ ହଜାର ଭୋଟ୍‌ ବ୍ୟବଧାନରେ ହରାଇ ଦେଇଥିଲେ। ଏହାପରେ ସେ ରାଜସ୍ଥାନର କୋଟପୁତଲି ଆସନରୁ ବିଜେପି ଟିକେଟ ପାଇବେ ବୋଲି ଆଶା ରଖିଥିଲେ, କିନ୍ତୁ ଏହା ବି ହୋଇ ପାରିଲା ନାହିଁ।