ହୃଦଘାତରେ ପ୍ରାଣ ହରାଇଲେ ଟିଏମସି ନେତା ମୁକୁଲ ରାୟଙ୍କ ପତ୍ନୀ, ଚେନ୍ନାଇରେ ଚାଲିଥିଲା ଚିକିତ୍ସା

ଚେନ୍ନାଇ: ଟିଏମସି ନେତା ମୁକୁଲ ରାୟଙ୍କ ପତ୍ନୀ କୃଷ୍ଣାଙ୍କର ହୃଦଘାତରେ ମୃତ୍ୟୁ ହୋଇଛି । ଚେନ୍ନାଇର ଏକ ଘରୋଇ ହସ୍ପିଟାଲରେ ଚିକିତ୍ସା ଚାଲିଥିବା ବେଳେ ମଙ୍ଗଳବାର ଦିନ ତାଙ୍କର ମୃତ୍ୟୁ ହୋଇଛି । ପ୍ରଥମେ ସେ କରୋନାରେ ସଂକ୍ରମିତ ହୋଇଥିଲେ । କରୋନା ସଂକ୍ରମଣରୁ ସୁସ୍ଥ ହେବା ପରେ ସେ ବାରମ୍ବାର ବିଭିନ୍ନ ରୋଗରେ ଆକ୍ରାନ୍ତ ହୋଇଥିଲେ । ତାଙ୍କର ଲିଭର ଟ୍ରାନ୍ସପ୍ଲାଣ୍ଟ କରାଇବାକୁ ଜୁନ ୧୭ ତାରିଖରେ ତାଙ୍କୁ ଚେନ୍ନାଇ ନିଆଯାଇଥିଲା । ହେଲେ ମଙ୍ଗଳବାର ଦିନ ହୃଦଘାତରେ ତାଙ୍କର ମୃତ୍ୟୁ ହୋଇଛି ।

ତାଙ୍କର ମୃତ୍ୟୁ ଖବର ପାଇବା ପରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ମୁକୁଲଙ୍କ ସଲ୍ଟଲେକ୍ ସ୍ଥିତ ବାସଭବନରେ ପହଞ୍ଚିଥିଲେ। ଏନେଇ ମମତା କହିଛନ୍ତି କି, ମୁକୁଲ ଦୀର୍ଘଦିନ ଧରି ତାଙ୍କର ସହଯୋଗୀ ଥିବାରୁ ସେ ବ୍ୟକ୍ତିଗତ ଭାବେ ମୁକୁଲଙ୍କ ସ୍ତ୍ରୀକୁ ଜାଣିଛନ୍ତି । ମମତାଙ୍କ ସହ ଅଭିଷେକ ବାନାର୍ଜୀ ବି ମୁକୁଲ ରାୟଙ୍କ ଘରେ ପହଞ୍ଚିଥିବା କୁହାଯାଇଛି । ଅନ୍ୟପଟେ ପଶ୍ଚିମବଙ୍ଗ ରାଜ୍ୟପାଳ ଜଗଦୀପ ଧନଖର କୃଷ୍ଣାଙ୍କ ମୃତ୍ୟୁରେ ଶୋକ ପ୍ରକାଶ କରିଛନ୍ତି । ଏହାସହ ମୁକଲ ରାୟ ଓ ତାଙ୍କ ପରିବାର ପ୍ରତି ସମବେଦନା ଜଣାଇଛନ୍ତି ରାଜ୍ୟପାଳ । କହିରଖୁ କି ପଶ୍ଚିମବଙ୍ଗ ବିଧାନସଭା ନିର୍ବାଚନ ପରେ ମୁକୁଲ ରାୟ ଓ ତାଙ୍କ ପୁଅ ସୁଭ୍ରାଂଶୁ ବିଜେପି ଛାଡି ଟିଏମସିରେ ଯୋଗ ଦେଇଛନ୍ତି ।