ସାମୁଦ୍ରିକ ବାତ୍ୟା ତୌତେର ପ୍ରଭାବ: ପ୍ରବଳ ବର୍ଷା ପାଇଁ ସନ୍ଧ୍ୟା ୬ଟା ପର୍ଯ୍ୟନ୍ତ ବନ୍ଦ ରହିଲା ମୁମ୍ବାଇ ବିମାନ ବନ୍ଦର
ନୂଆଦିଲ୍ଲୀ: ମୁମ୍ବାଇ ନିକଟ ଆରବ ସାଗର ଉପର ଦେଇ ସାମୁଦ୍ରିକ ବାତ୍ୟା ‘ତୌତେ’ ପ୍ରବାହ ହେବାର ଆଶଙ୍କା ଥିବାରୁ ଆଜି ସନ୍ଧ୍ୟା ୬ଟା ପର୍ଯ୍ୟନ୍ତ ମୁମ୍ବାଇ ବିମାନ ବନ୍ଦର ବନ୍ଦ ରହିବ। ପୂର୍ବରୁ ଅପରାହ୍ନ ୪ଟା ପର୍ଯ୍ୟନ୍ତ ଏହାକୁ ବନ୍ଦ ରଖାଯାଇଥିଲା | କିନ୍ତୁ ପ୍ରବଳ ବର୍ଷା ପାଇଁ ସମୟ ବଢ଼ାଇ ଦିଆଯାଇଛି | ବାତ୍ୟା ପ୍ରବାହ କାରଣରୁ ମୁମ୍ବାଇରେ ପ୍ରବଳ ବର୍ଷା ବର୍ଷିବା ସହ କ୍ଷିପ୍ର ବେଗରେ ପବନ ବହିବାର ସମ୍ଭାବନା ଥିବାରୁ ଲୋକମାନଙ୍କୁ ଘରୁ ନ ବାହାରିବାକୁ ‘ବିଏମ୍ସି’ ଓ ମୁମ୍ବାଇ ପୁଲିସ କହିଛନ୍ତି। ଏହା ସହ ବାତ୍ୟାର ପ୍ରକୋପ ଧିରେ ଧିରେ ବଢ଼ୁଥିବାରୁ ଗୁଜୁରାଟ ଏବଂ ଗୋଆ ମୁଖ୍ୟମନ୍ତ୍ରୀଙ୍କୁ ଫୋନ କରି ସ୍ଥିତି ପଚାରି ବୁଝିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ |
Sambad is now on WhatsApp
Join and get latest news updates delivered to you via WhatsApp
ପୂର୍ବରୁ, ମୁମ୍ବାଇର ମନୋରେଲ୍ ସେବା ମଧ୍ୟ ଆଜି ପାଇଁ ବାତିଲ କରାଯାଇଥିଲା। ଛତ୍ରପତି ଶିବାଜି ମହାରାଜ ଇଣ୍ଟର୍ନ୍ୟାସ୍ନାଲ୍ ବିମାନ ବନ୍ଦରରେ ଅବତରଣ କରିବାକୁ ଥିବା ତିନୋଟି ବିମାନ ସେମାନଙ୍କର ଗନ୍ତବ୍ୟସ୍ଥଳ ପରିବର୍ତ୍ତନ କରିଥିଲେ। ସ୍ପାଇସ୍ଜେଟ୍କୁ ସୁରଟ ଓ ଇଣ୍ଡିଗୋ ବିମାନକୁ ହାଇଦ୍ରାବାଦ ପଠାଇ ଦିଆଯାଇଥିଲା। ଲକ୍ଷ୍ନୌରୁ ଆସିଥିବା ଅନ୍ୟ ଏକ ଇଣ୍ଡିଗୋ ବିମାନ ପୁନର୍ବାର ଲକ୍ଷ୍ନୌକୁ ଫେରିଯାଇଥିଲା।