ମୁମ୍ବାଇ ଆକ୍ରମଣକୁ ୯ବର୍ଷ
ନୂଆଦିଲ୍ଲୀ: ମୁମ୍ବାଇ ଆତଙ୍କବାଦୀ ହମ୍ଲାକୁ ୯ବର୍ଷ ପୂରିଲା। ସାରା ବିଶ୍ୱ ସ୍ତବ୍ଧ ହୋଇଯାଇଥିବା ସେ ଦିନର ଘଟଣା ମନେ ପଡ଼ିିଲେ ଅଙ୍ଗେ ନିଭେଇଥିବା ଲୋକଙ୍କ ଲୋମ ଏବେ ବି ଟାଙ୍କୁରି ଉଠେ। ତେବେ ମାୟାନଗରୀରେ ମୃତ୍ୟୁର ତାଣ୍ଡବଲୀଳା ରଚାଇଥିବା ମାଷ୍ଟରମାଇଣ୍ଡ୍ ହାଫିଜ୍ ସୟିଦ୍ ଏବେ ବି ପାକିସ୍ତାନର ଛତ୍ରଛାୟାରେ ସୁରକ୍ଷିତ। ପ୍ରାୟ ୩୦୦ ଦିନ ଧରି ଲୋକଦେଖାଣିଆ ଗୃହବନ୍ଦୀ ରଖିବା ପରେ ପାକ୍ ସରକାର ହାଫିଜ୍କୁ ପୁଣି ଖୋଲା ଛାଡ଼ିଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଉଲ୍ଲେଖ ଥାଉ କି, ୨୦୦୮ ନଭେମ୍ବର ୨୬ ରାତି ପ୍ରାୟ ୧୦ଟାରେ ଆରମ୍ଭ ହୋଇଥିବା ଏହି ଆତଙ୍କବାଦୀ ହମ୍ଲାରେ ୧୬୬ ଜଣଙ୍କ ଜୀବନ ଯିବା ସହ ୩୦୦ରୁ ଅଧିକ ଆହତ ହୋଇଥିଲେ। ଦୀର୍ଘ ୪ ଦିନ ଧରି ମୁମ୍ବାଇର ପ୍ରମୁଖ ରେଳ ଷ୍ଟେସନ ସିଏମ୍ଟି, ତାଜ ଓ ଟ୍ରାଇଡେଣ୍ଟ ଆଦି ହୋଟେଲ ଏବଂ ଡାକ୍ତରଖାନା ସମେତ ରାସ୍ତାରେ ଯାଉଥିବା ଯାନବାହାନ ମଧ୍ୟ ଆକ୍ରମଣର ଶିକାର ହୋଇଥିଲେ। ପୁଲିସ୍ ସହ ମୁହାଁମୁହିଁ ହୋଇ ମୋଟ ୧୦ ଜଣରୁ ୯ଜଣ ଆତଙ୍କବାଦୀ ନିହତ ହେଲେ। ଜୀବନ୍ତ ଧରାପଡ଼ିଥିବା ମୁଖ୍ୟ ଆସାମୀ ଅଜମଲ କସାବକୁ ୨୦୧୨ ନଭେମ୍ବର ୨୧ରେ ଫାଶୀ ଦିଆଗଲା।
ମୁମ୍ବାଇର ସୁରକ୍ଷା କେବଳ ପୁଲିସ ନେଇ ପାରିବନି ବୋଲି ଏନ୍ଏସ୍ଜି କମାଣ୍ଡୋଙ୍କୁ ଅତିରିକ୍ତ ସୁରକ୍ଷା ପାୟିତ୍ୱ ଦେବାକୁ ଘଟଣାର ତଦନ୍ତ କମିଟି ସୁପାରିସ କଲେ। ସମଗ୍ର ସହରକୁ ସିସିଟିଭି କ୍ୟାମେରାରେ ଆଚ୍ଛାଦିତ ହେଲା। ଅପରପକ୍ଷେ, ତଟୀୟ ସୁରକ୍ଷା ପାଇଁ ନିୟୋଜିତ ଶହଶହ ହାଇସ୍ପିଡ୍ ବୋଟ୍ ଏବେ ଅଚଳ। ନିୟମିତ ପାଟ୍ରୋଲିଂ ପାଇଁ ସେଗୁଡ଼ିକରେ ଇନ୍ଧନ ମଧ୍ୟ ରହୁନାହିଁ। ସେହିପରି ଅଗାମୀ ଦିନରେ ଆକାଣ ମାର୍ଗରୁ ହିଁ ୨୬/୧୧ର ପୁନରାବୃତ୍ତି ଆଶଙ୍କା ଥିବା ୪ବର୍ଷ ତଳେ ଗୁଇନ୍ଦା ବିଭାଗ ରିପୋର୍ଟ ଦେଇଥିଲା। ମାତ୍ର ଏଯାଏ କୌଣସି ପ୍ରତିକାର ନାହିଁ। ଫଳରେ ଏବେ ସୁଦ୍ଧା ମୁମ୍ବାଇବାସୀ ଆତଙ୍କିତ ଜୀବନ ଯାପନ କରୁଛନ୍ତି।