ବୈଠକ ସମୟରେ ଶୋଷ ଲାଗିବାରୁ ସାନିଟାଇଜରକୁ ପାଣି ଭାବି ପିଇଦେଲେ ବିଏମସିର ବରିଷ୍ଠ ଅଧିକାରୀ, ଭିଡିଓରେ ଦେଖନ୍ତୁ ତା’ପରର ଦୃଶ୍ୟ
ମୁମ୍ବାଇ: ପାଣି ବଦଳରେ ସାନିଟାଇଜର ପିଇ ହଟହଟା ହେଲେ ବିଏମସି ଅଧିକାରୀ। ଭୁଲବଶତଃ ଏକ ବୈଠକରେ ଜଣେ ବରିଷ୍ଠ ଅଧିକାରୀ ପାଣି ବଦଳରେ ସାନିଟାଇଜର ପିଇବାର ଭିଡିଓ ଏବେ ଭାଇରାଲ ହେବାରେ ଲାଗିଛି। ଭିଡିଓରେ କିଭଳି ଜଣେ ବରିଷ୍ଠ ଅଧିକାରୀଜଣକ ସାନିଟାଇଜର ପିଉଛନ୍ତି ଏବଂ ପିଇବା ପରେ ସେ କିଭଳି ପ୍ରତିକ୍ରିୟା ଦେଇଛନ୍ତି, ସେ ସବୁ ଭିଡିଓରେ କଏଦ ହୋଇଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଘଟଣାଟି ଘଟିଛି ବ୍ରିହନମୁମ୍ବାଇ ମୁନିସିପାଲ କର୍ପୋରେସନର ଯୁଗ୍ମ ମ୍ୟୁନିସିପାଲିଟି କମିସନର ରମେଶ ପାୱାରଙ୍କ ସହ। ଅଧିକାରୀଜଣକ ନାଗରିକ ସଂସ୍ଥାର ଶିକ୍ଷା ବଜେଟ୍ ଉପସ୍ଥାପନ କରୁଥିବାବେଳେ ତାଙ୍କୁ ଶୋଷ ଲାଗିଥିଲା। ଏହି ସମୟରେ ତାଙ୍କ ଆଗରେ ରଖାଯାଇଥିବା ସାନିଟାଇଜର ବୋତଲକୁ ସେ ପାଣି ବୋଲି ଭାବି ପିଇଦେଇଥିଲେ। ପଛପଟେ ଥିବା କର୍ମଚାରୀ ତାଙ୍କୁ ରୋକିବା ପୂର୍ବରୁ ସେ ସାନିଟାଇଜର ପିଇଦେଇଥିଲେ। କିନ୍ତୁ ସଙ୍ଗେ ସଙ୍ଗେ ସେ ସାନିଟାଇଜର ପିଇଦେଇଥିବା ଜାଣି ପାଟିରୁ ସାନିଟାଇଜର କାଢ଼ିବା ସହ ସାଧା ପାଣିରେ ନିଜ ପାଟିକୁ ସଫା କରି ପାଣି ପିଇଥିଲେ।
#WATCH: BMC Joint Municipal Commissioner Ramesh Pawar accidentally drinks from a bottle of hand sanitiser, instead of a bottle of water, during the presentation of Budget in Mumbai. pic.twitter.com/MuUfpu8wGT
— ANI (@ANI) February 3, 2021
ଏହି ଘଟଣାର ୩ଦିନ ପୂର୍ବରୁ ମହାରାଷ୍ଟ୍ରରେ ଥିବା ଏକ ଗାଁରେ ୧୨ଜଣ ଶିଶୁଙ୍କୁ ପୋଲିଓ ବୁନ୍ଦା ପରିବର୍ତ୍ତେ ସାନିଟାଇଜର ଦିଆଯାଇଥିବା ଖବର ମିଳିଥିଲା, ଯାହାକୁ ନେଇ ଅନେକ ବିବାଦ ଦେଖା ଦେଇଥିଲା।