ଶଶୀ ଆଉ କଂଗ୍ରେସର ନୁହନ୍ତି : ମୂରଲୀଧରନ

ତିରୁଅନନ୍ତପୁରମ: କଂଗ୍ରେସରେ ଥିବା ବିରୋଧାଭାସ ପୁଣିଥରେ ପଦାକୁ ଆସିଛି। କେରଳ କଂଗ୍ରେସର ବରିଷ୍ଠ ନେତା କେ. ମୁରଲୀଧରନ ସିଧାସଳଖ ଶଶି ଥରୁରଙ୍କୁ ଟାର୍ଗେଟ୍ କରି କହିଛନ୍ତି ଯେ ଯେପର୍ଯ୍ୟନ୍ତ ସେ ଜାତୀୟ ସୁରକ୍ଷା ଉପରେ ତାଙ୍କର ମତ ପରିବର୍ତ୍ତନ କରନ୍ତି ନାହିଁ, ସେପର୍ଯ୍ୟନ୍ତ ତାଙ୍କୁ ତିରୁଅନନ୍ତପୁରମର କୌଣସି କଂଗ୍ରେସ କାର୍ଯ୍ୟକ୍ରମରେ ନିମନ୍ତ୍ରଣ କରାଯିବ ନାହିଁ। ମୁରଲୀଧରନ ସ୍ପଷ୍ଟଭାବେ କହିଥିଲେ ଯେ ଥରୁର ଆଉ ଆମର (କଂଗ୍ରେସର) ନୁହଁନ୍ତି। ଆମେ ତାଙ୍କ ବକ୍ତବ୍ୟକୁ ପସନ୍ଦ କରୁନାହୁଁ।

ମୁରଲୀଧରନଙ୍କ ବକ୍ତବ୍ୟ ଏପରି ସମୟରେ ଆସିଛି ଯେତେବେଳେ ଥରୁର କେନ୍ଦ୍ର ସରକାର ଏବଂ ସେନାକୁ ସମର୍ଥନ କରି ବୟାନ ଦେଇଥିଲେ ।  କୋଚିରେ ଏକ କାର୍ଯ୍ୟକ୍ରମ ସମୟରେ ଜାତୀୟ ସୁରକ୍ଷାକୁ ସର୍ବୋପରି ବୋଲି କହିଥିଲେ। ଥରୁର କହିଥିଲେ, ମୋ ପାଇଁ ଦେଶ ପ୍ରଥମେ ଆସେ, ଦଳ ପରେ ଆସେ।

କିଛିଦିନ ତଳେ ଥରୁର ଏକ ଖବରକାଗଜରେ ଏକ ଲେଖା ଲେଖିଥିଲେ ଯେଉଁଥିରେ ସେ ଜରୁରୀକାଳୀନ ପରିସ୍ଥିତି ସମୟରେ ଇନ୍ଦିରା ଗାନ୍ଧୀଙ୍କ ନୀତିକୁ ସମାଲୋଚନା କରିଥିଲେ। ଏଥିରେ ମଧ୍ୟ ମୁରଲୀଧରନ ରାଗି ଯାଇଥିଲେ ଏବଂ କହିଥିଲେ ଯେ ଯଦି ଥରୁର କଂଗ୍ରେସରେ ଅସହଜ ଅନୁଭବ କରୁଛନ୍ତି, ତେବେ ତାଙ୍କୁ ଅନ୍ୟ କୌଣସି ରାଜନୈତିକ ରାସ୍ତା ଖୋଜିବା ଉଚିତ।